Read nande Emĩsyo 11 Bible Online

Emĩsyo 11 - nande bible

Emĩsyo 11

¹Olulengo lwʼobũtebya ni nye oko Mwami Mukulu; Nĩkwa ekĩrengĩ kĩhĩkene kĩkamũtsemesaya.

²Omugulu eriyanza lĩkahĩka, neryo esĩsonĩ sĩkahĩka; Nĩkwa amenge ali haguma nʼabakayolobeka.

³Obugenge bwʼabatunganene bwasyasondolabo; Nĩkwa erĩsĩngĩsĩrya lyʼesyonyenge-habiri lyasyaheryabo.

⁴Ebindu sibyereta endũndĩ oko kiro kyʼerihitana; Nĩkwa eritunganene lĩkalamaya oko luholo.

⁵Eritunganene lyʼoyũhĩkene lyasyasondola enzira yiwe, Nĩkwa omubi asyawa omo bubi buwe ĩyowene.

⁶Eritunganene lyʼabatunganene lyasyalamyabo; Nĩkwa abʼesyonyenge-habiri basyahambwa omo bibi byabo.

⁷Omugulu omundu mubi akahola amaha wuwe asyahera; Nʼamaha wʼababi asyahera.

⁸Abatunganene bakalamĩbawa oko bũlĩge; Nʼababi bakahĩka omo mwanya wuwe.

⁹Oyute na Nyamuhanga akaheraya mũlĩkyabo omo buno buwe; Nĩkwa abatunganene bakalamĩbawa busana nʼeriminya.

¹⁰Omugulu abatunganene bakowana, omũyĩ akatsema; Omugulu ababi bakahera, hali bogo.

¹¹Omũyĩ akahamĩbawa busana nʼomũyĩsa wʼabatunganene; Nĩkwa akagusawa busana nʼobuno bwʼababi.

¹²Oyukapona mũlĩkyabo siawite mutima; Nĩkwa omundu wʼamenge akabya bũkũtũ.

¹³Oyukalaba-laba nga mũtũlaganĩa, akabĩsũla ebĩbĩsĩre; Nĩkwa owʼekĩrĩmũ kyʼobutalegula akabĩsa omwatsi.

¹⁴Ahate erisondola lyʼamenge abandu bakawa; Nĩkwa omo bungi bwʼabahanĩ hali buholo.

¹⁵Amabya muwato busana nʼowʼehandi asyabũnangwa kutsibu; Nĩkwa Oyukapona esyongangatiro ali buholo.

¹⁶Omũkalĩ mugenge akabana erĩsĩkĩbwa; Nʼabandu batsatsũhĩ bakabana ebindu.

¹⁷Omundu wʼeriganyira akakolera ekĩrĩmũ kiwe kyo bibuya; Nĩkwa omusindwa akayagalaya.

¹⁸Ababi bakabana ebihembo byʼamatebo; Nĩkwa oyukabiba eritunganene awite oluhembo lũsĩkĩre.

¹⁹Oyũsĩkĩre omo litunganene asyabana engebe; Nʼoyukakwamirira ebibi akakolabyo busana nʼoluholo luwe.

²⁰Abahengemĩre omo mutima ni nye oko Mwami Mukulu; Nĩkwa abahĩkene omo nzira syabo bakamũtsemesaya.

²¹Nomo byala byangahamba ebyala, Omubi siendisyabula erisuyirwa, Nĩkwa olubuto lwʼabatunganene lwasyalamĩbwa.

²²Ngʼembũka yʼesyamagetsi omo nĩndo yʼengulube; Omũkalĩ mubuya kwʼali atya oyute nʼeriyisunako.

²³Erisonda lyʼabatunganene ni kibuya kisa; Nĩkwa amaha wʼababi ni pono.

²⁴Hali ekikapanza-panza, ekĩkakanyĩsaya; Kandi hali ekĩkakakĩraya kwilaba ekitolere, nĩkwa kikaleta eribulabyo.

²⁵Omutima wʼerĩsũnza asyanenehĩbwa; Nʼoyukaha omundu yʼamagetsi, naye asyahabwago.

²⁶Oyũkĩma engano yʼabandu, basyamutakira; Nĩkwa omũyĩsa asyabya oko mutwe wʼoyũkagũlayayo.

²⁷Oyukasonda-sonda ekibuya nʼomũhwa akasonda erianzwa; Nĩkwa oyukasonda-sonda ebibi, byasyamũhĩkako.

²⁸Oyukayiketera ebindu biwe asyawa; Nĩkwa omutunganene asyaboga ngʼekikoma kibisi.

²⁹Oyũkagalaya ekĩtũnga kiwe asyalya omwandu wʼerihunga; Nʼomũkĩrũ asyabya mugombe wʼabʼamenge gʼomutima.

³⁰Ebĩgũma byʼabatunganene ni muti wʼengebe; Nʼomwenge akatunga emitima yʼabandu.

³¹Lebaya, omutunganene asyahembwa omo kihugo; Kwilaba aho lingahi omubi nʼomukola-nabi asyahembwa!