Read nande Emĩsyo 14 Bible Online

Emĩsyo 14 - nande bible

Emĩsyo 14

¹Obuli mũkalĩ wʼamenge akahĩmba enyũmba; Nĩkwa omũkĩrũ akahĩmbũlayo omo byala biwe ĩbyobyene.

²Oyukalendera omo butunganene buwe akubaha Omwami Mukulu; Nĩkwa oyukahengema omo nzira siwe akamupona.

³Omo buno bwʼabakĩrũ muli mwĩgo busana nʼeriyipipa liwe; Nĩkwa emĩnywa yʼabʼamenge yasyateyabo.

⁴Ahate esyonde ekibungo kiri busa; Nĩkwa Omukene akabya busana nʼamaka wʼende.

⁵Omũlangĩrĩ oyũtesĩganĩraya siendisyabiha; Nĩkwa omũlangĩrĩ wʼamabehĩ akatũla amabehĩ.

⁶Omũsekĩ akasonda-sondaya amenge, sialibanago; Nĩkwa eriminya nĩ lũba busana nʼoyuwite amenge.

⁷Ũlũe embere syʼomundu mũkĩrũ, Ĩsĩwendĩsyalebya emĩnywa yʼeriminya omwisi wuwe.

⁸Amenge wʼomũgerekanĩa ni ʼminya enzira yiwe; Nĩkwa obũkĩrũ bwʼabakĩrũ ni ʼteba.

⁹Abakĩrũ bakaseka ebibi; Nĩkwa omo katĩkatĩ kʼabatunganene hali mutima owene.

¹⁰Omutima anasĩ obukalihe bwago; Nʼowʼehandi sialisangira obutseme bwago.

¹¹Enyũmba yʼababi yasyaherĩbwa; Nĩkwa ehema yʼabatunganene yasyahangana.

¹²Hali enzira eyikabya nga ni mbuya omo meso wʼomundu; Nĩkwa endũlĩ yayo ni nzira yʼoluholo.

¹³Kutse omo mugulu wʼeriseka omutima iniane nʼobũlĩge; Nʼendũlĩ yʼebitsange nĩ bũlĩtohe.

¹⁴Oyukasuba enyũma omo mutima asyũsũlĩbwa omo syonzira siwe ĩyowene; Nʼomundu mubuya asyayũgũtya omo biwe.

¹⁵Omũkĩrũ akĩkĩrĩraya obuli kĩnywa; Nĩkwa omũgerekanĩa akalebaya ndeke ngoko angagenda.

¹⁶Omundu wʼamenge akubaha, nʼerĩlũa oko bibi; Nĩkwa omũkĩrũ akayiheka omo pono, isiayitsomene.

¹⁷Oyukahitana lũba asyakola omo bũkĩrũ; Nʼomundu wʼerihimbika libi akaponawa.

¹⁸Omũkĩrũ asyangirira obũkĩrũ; Nĩkwa omũgerekanĩa akambalĩbawa embĩta yʼeriminya.

¹⁹Ababi bakũnama embere syʼababuya; Nʼomukola-nabi oko syongyo syʼabatunganene.

²⁰Omwera akaponawa na mũlĩkyabo; Nĩkwa omuteke akayira abĩra bangi.

²¹Oyukapona mũlĩkyabo akahalaya; Nĩkwa oyukaganyira abera ali nʼobutseme.

²²Abakahimbika ebibi sibetala kwehĩ? Olukogo nʼekwenene byasyabya oko bakahimbika ebibuya.

²³Omwʼikola lyosĩ muli endũndĩ; Nĩkwa erĩkanĩa lyʼemĩnywa likaleta erĩtalya.

²⁴Akakĩra kʼabʼamenge ni buteke bwabo; Nĩkwa obũkĩrũ bwʼabakĩrũ nĩ bũkĩrũ busa.

²⁵Omũlangĩrĩ wʼekwenene akalamaya emitima yʼabandu; Nĩkwa oyukahamula amabehĩ akaleta eriteba.

²⁶Omʼubaha lyʼOmwami Mukulu hali eriyiketera lĩkalĩre; Nʼabana buwe basyabya nʼobusayiro.

²⁷Eriubaha lyʼOmwami Mukulu nĩ ngũnũnũko yʼengebe; Omundu iniatoka erĩlũa omo bitego byʼoluholo.

²⁸Olukengerwa lʼOmwami luli omo bungi bwʼabandu; Nĩkwa omwʼikeha lyʼabandu nĩ ʼherĩbwa lyʼengũla.

²⁹Oyũyĩbombekĩre okwʼihitana ni wʼamenge manene; Nĩkwa owʼekĩrĩmũ kyʼolũba-lũba akapipa obũkĩrũ.

³⁰Omutima owakayibombeka ni ngebe yʼomubiri; Nĩkwa obũha ni ʼhonda lyʼamakũha.

³¹Oyũkanũbaya abera akatsuma Omũhangĩkĩ; Nĩkwa oyukaganyira abʼobwaga akamũsĩkaya.

³²Omubi akakũnawa ahisi omwʼikola nabi liwe; Nĩkwa omutunganene awite obusayiro omo luholo luwe.

³³Amenge ĩkere omo mutima wʼoyuwite amenge; Nĩkwa ebiri omwisi wʼabakĩrũ bikaminyikala.

³⁴Eritunganene lĩkahamaya ekihanda; Nĩkwa erĩlolo nĩ kĩtsũmĩ kyʼabandu bosĩ.

³⁵Omwami akatsemera omugombe oyukakola ndeke; Nĩkwa erihitana liwe lyasyabya oko yukaleta esĩsonĩ.