Read nande Emĩsyo 18 Bible Online

Emĩsyo 18 - nande bible

Emĩsyo 18

¹Oyukayisolola ĩnĩakasonda-sondaya ebyo anzĩre ĩyowene-wene, Iniakahayira amenge gosĩ owene.

²Omũkĩrũ siawite obutseme omo menge, Lye nʼerĩbĩsũla omutima wuwe ĩgowene.

³Omugulu omubi akahĩka, epono nayo ĩkahĩkaho nibya; Kandi eritsuma likasa haguma nʼesĩsonĩ.

⁴Ebĩnywa byʼobuno bwʼomundu biri ngʼemitobero yʼamagetsi; Engũnũnũko yʼamenge nĩ kũsĩ kakasenda.

⁵Oko mundu mubi susombole ndi na ndi; Kutse sĩwĩme omutunganene yʼerĩbanza.

⁶Emĩnywa yʼomũkĩrũ ikingira omo Ĩnahĩka, Nʼobuno buwe bukabirikira erĩswĩrĩbwa.

⁷Obuno bwʼomũkĩrũ ni ʼhera liwe; Nʼemĩnywa yiwe ni kitego kyʼekĩrĩmũ kiwe.

⁸Ebĩnywa byʼomũbwebwererĩ biri ngʼotutole towene; Bikandagalira omwisi wʼenda.

⁹Omugata omo mũbĩrĩ wuwe Ni mugala wabo mũhererya.

¹⁰Erĩna lyʼOmwami Mukulu nĩ nyũmba yĩsũngũlĩkĩre ikongotere; Omutunganene akatibita muyo iniabana Obuholo.

¹¹Obuteke bwʼomuteke nĩ mũyĩ wuwe wʼamaka; Buli ngʼolũhĩmbo luli omo bũlengekanĩa buwe.

¹²Embere wʼerĩherĩbwa, omutima wʼomundu akayipipa; Erĩyĩkehya lĩkatsũka embere wʼerĩsĩkĩbwa.

¹³Oyũkasũbĩraya atalĩowa, Nĩ bũkĩrũ nʼesĩsonĩ busana naye.

¹⁴Ekĩrĩmũ kyʼomundu kikaheka obolo buwe; Nĩkwa ekĩrĩmũ kĩbũnĩkĩre nindi wangahanganĩakyo?

¹⁵Omutima wʼomũgerekanĩa akabana eriminya; Nʼokũtũ kwʼowʼamenge kũkasondasondaya eriminya.

¹⁶Olũsũnzo lwʼomundu lukamubanira omwanya, Lukamuleta embere syʼabandu bakulu.

¹⁷Oyũkatsũka eritonda akabya ngʼatunganene; Nĩkwa omũlĩkyabo akasa nʼerimusonda-sonda.

¹⁸Obukanga bukabũga amahaka; Nʼerĩrekya esyombangĩ.

¹⁹Erĩwatĩkya mugala wabo oyo wabĩrĩhalĩbwa lĩkalĩre kwilaba omũyĩ wʼamaka; Nʼamahaka ngʼaya ali ngʼemihomo yʼenyũmba yʼOmwami.

²⁰Enda yʼomundu yasyũsũlĩbwa nʼebĩgũma byʼobuno buwe; Nʼomwʼikanyirira lyʼemĩnywa yiwe asyũgũta.

²¹Oluholo nʼengebe biri omo maka wʼolulimi; Nʼabanzĩrelo basyalya ebĩgũma byalo.

²²Oyukabana omũkalĩ akabana kindu kyowene, Kandi akabana eriganyira lyʼOmwami Mukulu.

²³Omwera akayilakira; Nĩkwa omuteke akasũbĩraya ebĩkalĩre.

²⁴Omundu oyukayira abĩra bangi akayĩkolaya okwʼihera liwe; Nĩkwa hali omwĩra oyukamatana nʼomundu kwilaba mugala wabo.