Read nande Emĩsyo 21 Bible Online

Emĩsyo 21 - nande bible

Emĩsyo 21

¹Omutima wʼOmwami ali omo byala byʼOmwami Mukulu ngʼesyonzira syʼamagetsi, Akabindulirago eyo anzĩre.

²Obuli nzira yʼomundu yitunganene omo meso wuwe; Nĩkwa Omwami Mukulu akalenga emitima.

³Erikola eritunganene nʼekwenene. Bĩkalĩgawa nʼOmwami Mukulu kwilaba ehongo.

⁴Ameso mali-mali nʼomutima wʼeriyiheka, Etala yʼababi, ni kibi.

⁵Amalengekanĩa wʼabʼomũhwa akaleta bingi; Nĩkwa obuli mundu wʼepaku-paku ni ʼbula lisa.

⁶Eribana ebindu omo lulimi lwʼamabehĩ Ni kihohe ekĩkakũnawa eyĩ nʼeyĩ, Nʼabakasonda-sondabyo bakakwama oluholo.

⁷Omwaga wʼababi asyabĩrĩryabo hali, Kusangwa bakagana erikola ebitunganene.

⁸Enzira yʼoyukaheka omusango ĩhengemĩre kutsibu; Nĩkwa oyũhenĩrye, omũbĩrĩ wuwe atunganene.

⁹Lyowene erĩĩkala omo lutwe, Kwilaba erĩĩkala omo nyũmba nene eyĩgalĩhĩre haguma nʼomũkalĩ wʼerinegena.

¹⁰Ekĩrĩmũ kyʼomubi kikasonda ebibi; Mũlĩkyabo sialibana eriganyira omo meso wuwe.

¹¹Omugulu omũtebya akasuyirawa, omũkĩrũ akabana amenge; Nʼomugulu owʼamenge akakangĩrĩrĩbawa akangirira eriminya.

¹²Omundu utunganene akaganĩraya enyũmba yʼomubi, Ngoko ababi bakagusawa okwʼihera lyabo.

¹³Oyũkalĩba amatwĩ wuwe okwʼilaka lyʼabera, Naye nibya asyalaka, nĩkwa siendĩsyowĩbwa.

¹⁴Olũsũnzo lʼobũbĩso-bĩso lukabindula erihitana; Nʼerĩhĩtya omo kĩkũba likabindula eriagalirwa lĩkalĩre.

¹⁵Ni butseme busana nʼabatunganene erikola erĩbanza lyʼekwenene; Nĩkwa nĩ ʼherĩbwa busana nʼabakolĩ bʼebibi.

¹⁶Omundu oyukaganga-ganga akalũa omo nzira yʼamenge, Asyahumula omo ndeko yʼabaholĩ.

¹⁷Oyukanza erĩyĩtsemesya asyabya mwera; Nʼoyukanza ebĩnyũ nʼamagũta siendisyabya wʼebindu.

¹⁸Omubi akabya mbanulo yʼomutunganene; Nʼomũtebya akahĩka omo mwanya wʼabatunganene.

¹⁹Lyowene erĩĩkala omo mbwarara Kwilaba erĩĩkala nʼomũkalĩ mũnegenĩ nʼogʼomwaga.

²⁰Hali ebindu byʼobũgũlĩ nʼamagũta omo bwĩkalo bʼowʼamenge; Nĩkwa omundu mũkĩrũ akamerabyo.

²¹Oyukakwamirira eritunganene nʼeriganyira Akabana engebe nʼeritunganene nʼerĩsĩkya.

²²Omundu wʼamenge akirukira oko mũyĩ wʼembangĩ, Akateraya amaka wʼeriyiketera lyago.

²³Oyũkategaya obuno buwe nʼolulimi luwe Akategaya ekĩrĩmũ kiwe oko malĩge.

²⁴Omũsekĩ nĩ rĩna lyʼomundu wʼeriyipipa nʼeriyiheka, Akakola erĩyĩkokolomya lyʼeriyipipa.

²⁵Erisonda lyʼomugata lĩkamwĩta; Kusangwa ebyala biwe bikagana erikola.

²⁶Hali oyũkayĩtsũtsa nʼomururu omo musibo gosĩ; Nĩkwa omutunganene akahĩtaya ĩsĩalĩma.

²⁷Ehongo yʼababi ni nye; Nĩkwa kwilaba aho, omugulu akaletayo nʼobũlengekanĩa bubi.

²⁸Omũlangĩrĩ wʼamabehĩ asyahera; Nĩkwa omundu oyũkowa asyabũga ebikabyaho.

²⁹Omundu mubi akatuna obũsũ buwe; Nĩkwa oyutunganene akakokotaya esyonzira siwe.

³⁰Sihali menge kutse eriminya, Kutse ekihano ebikalwa nʼOmwami Mukulu.

³¹Esabayĩrĩ ĩkategekanĩbawa busana nʼekiro kyʼamalwa; Nĩkwa erĩkĩnda ni ryʼOmwami Mukulu.