Read nande Emĩsyo 23 Bible Online

Emĩsyo 23 - nande bible

Emĩsyo 23

¹Omugulu ũkĩkala erirya haguma nʼomũtabalĩ Ũlebaye kutsibu oyuli embere syawe;

²Wamabya uli mũlĩ mutsibu, Ũhĩre omuhamba oko mumero wawe.

³Susonde ebĩsĩhĩre biwe; Kusangwa ni byalya byʼeriteba.

⁴Sũyĩlũhaye eribya owʼebindu; Ũhũmbaye amenge wawe ĩgowene.

⁵Ukahagurira ameso oko biteho kwehĩ? Kusangwa kwenene ebindu bikayikolera ebĩpũpa, Ngʼerĩsamba likaguluka erĩlolya omo kyanya.

⁶Sulye ebyalya byʼoyuwite erĩso libi, Kutse siwanze ebĩsĩhĩre biwe.

⁷Kusangwa ngoko akaganĩraya omwisi wuwe kwʼali atya; Akakubwira ati, Ulye, ũpũlaye; Nĩkwa omutima wuwe siali haguma nawe.

⁸Ekitole ekyo wabirirya wasyasalakyo, Nʼerĩtalya ebĩnywa byawe bĩsĩhĩre.

⁹Sũbũge omo matwĩ wʼomũkĩrũ; Kusangwa asyapona amenge wʼebĩnywa byawe.

¹⁰Sũhũmaye ekiminyikalo kya kera kyʼemitano; Kandi siwingire omo malima wʼesyongũbĩ.

¹¹Kusangwa Omũtongolya wabo ni wʼamaka; Asyimirabo akalwa nawe.

¹²Ũhĩre omutima wawe okwʼĩkangĩrĩrĩbwa, Nʼamatwĩ wawe oko bĩnywa byʼeriminya.

¹³Subye butakunga omwana yo ndeke; Kusangwa wamamũnyambya omo lũfĩmbo siendihola.

¹⁴Wasyamũswĩrya omo lũfĩmbo, Wasyalamya ekĩrĩmũ kiwe oko Kũlĩmũ.

¹⁵Mugala wage, omutima wawe amabya wʼamenge, Omutima wage asyatsema,

¹⁶Ega, omutima wage asyatsema, Omugulu emĩnywa yawe yasyabũga emyatsi itunganene.

¹⁷Suleke omutima wawe akatsura abakola-nabi; Nĩkwa ubye nʼeriubaha Omwami Mukulu ebiro byosĩ.

¹⁸Kusangwa kwenene hali oluhembo; Nʼamaha wawe siendisyahwaho.

¹⁹Mugala wage, uhulikirire, ubye nʼamenge, Usondole omutima wawe omo nzira.

²⁰Subye omo katĩkatĩ kʼabakalũmba obwabũ, Kutse omo katĩkatĩ kʼabakalya esĩswĩ omo mururu.

²¹Kusangwa omũkũndĩrya nʼowʼomururu basyahĩka oko bwera; Nʼotũgotserĩ twasyambalya omundu yʼemisangi.

²²Uhulikirire tata wawe oyo wakubuta, Kandi supone koyo wawe omugulu ali mukekulu.

²³Ugule ekwenene, sũsyegũlayayo; Ubane amenge, nʼerĩkangĩrĩrĩbwa, nʼeriminya.

²⁴Tata wʼomutunganene asyatsema kutsibu; Nʼoyukabuta omwana wʼamenge asyatsemesĩbwa umwʼiye.

²⁵Tata wawe na koyo wawe batseme, Nʼoyo wakubuta ayĩsyandire.

²⁶Mugala wage, Umba omutima wawe; Nʼameso wawe atsemere esyonzira syage.

²⁷Kusangwa Omũmalaya ni mugende muli; Nʼomũkalĩ wʼehandi nĩ kyũna kihatatene.

²⁸Ega, akalamba ngʼomũrahĩ, Nʼerĩkanyĩrĩrya esyombandanganĩa omo katĩkatĩ kʼabandu.

²⁹Nindi ali nʼobũlĩge kwehĩ? Nindi ali nʼeriagalwa kwehĩ? Nindi awite amahaka kwehĩ? Nindi awite eriyitonga kwehĩ? Nindi awite ebironda ebitawite ekikaleka kwehĩ? Nindi awite ameso agatsũkĩre kwehĩ?

³⁰Abakasiba endambĩ nyiri omo bwabũ; Abakayasonda-sondaya obwabũ obũtũlũngene.

³¹Susamalire obwabũ omugulu bũgatsũkĩre, Omugulu bukabimba omo lũtehĩ, Omugulu bukandagala bukamereka.

³²Oko ndũlĩ bukaluma ngʼenzoka, Nʼeribanda ngʼenzwira.

³³Ameso wawe asyalangira emyatsi yʼehandi, Nʼomutima wawe asyahũlũkya emyatsi ĩhengemĩre.

³⁴Ega, Wasyabya ngʼoyukahunga-hunga omo ngetsi, Kutse ngʼoyukamakirira oko mũlĩngotĩ.

³⁵Wasyabũga uti, Bamanyĩta, nĩkwa sinditahutala; Babĩrĩnyĩswĩrya, nage sĩndĩtowakyo. Nasyabuka mugulu wahi kwehĩ? Ngayasondyabo kandi.