Read nande Emĩsyo 24 Bible Online

Emĩsyo 24 - nande bible

Emĩsyo 24

¹Sutsure abandu babi; Kutse Susonde eribya haguma nabo.

²Kusangwa emitima yabo ĩkaganĩraya erĩnũbya, Nʼemĩnywa yabo ĩkabũga ebyʼepono.

³Enyũmba ĩkahĩmbawa omo menge; Na busana nʼeriminya ikasingikawa;

⁴Na busana nʼeriminya ebyumba bĩkũsũlĩbawa Omo bindu byʼobũgũlĩ nʼebĩkatsemesaya.

⁵Omundu wʼamenge ni wʼamaka; Ega, omundu wʼeriminya akatomekera amaka.

⁶Kusangwa busana nʼerihana lyʼamenge wasyayalwa; Nʼomo ndeko yʼabahanĩ hali Obuholo.

⁷Amenge alabĩre olulengo lwʼomũkĩrũ; Syalĩkũmbũla obuno buwe bwʼoko lũkyo.

⁸Oyukahimbika erikola ebibi, Abandu basyamwahula mo mũtsũkĩ wʼebibi.

⁹Obũlengekanĩa bʼomũkĩrũ ni bibi; Nʼomũsekĩ ni nye oko bandu.

¹⁰Wamalembera oko mugulu wʼamenĩ, Amaka wawe ni make.

¹¹Ũlamaye abakatwalawa okwʼĩĩtwa. Ũkakĩraye abakĩsĩya ibakerwa.

¹²Wamabũga uti, Lebaya, motutaminya ekĩ; Oyukalenga emitima sialilangirakyo kwehĩ? Nʼoyũkategaya ekĩrĩmũ kyawe sĩasĩkyo kwehĩ? Naye siendisyahemba obuli mundu ngʼemĩbĩrĩ yiwe kwehĩ?

¹³Mugala wage, ulye obuki, kusangwa bowene; Nʼomusonge gʼomo kisese owasĩhĩre okwʼĩgerya lyawe.

¹⁴Litya, wasyaminya amenge eribya oko kĩrĩmũ kyawe; Wamabya wabiribanago, neryo hasyabya oluhembo, Nʼamaha wawe siendĩsyatũbwa.

¹⁵Uwe mundu mubi sulambe obwĩkalo bʼomutunganene; Sũheraye ahʼeriluhukira liwe.

¹⁶Kusangwa omundu utunganene asyawa ngendo sirinda, iniaswahangana, Nĩkwa ababi bakaherĩbawa omo mũsĩngo.

¹⁷Sutseme omugulu enzĩgũ yawe ikawa, Kandi Suleke omutima wawe akatsema omugulu akaherĩbawa.

¹⁸Omwami Mukulu akasyalangirakyo ĩnĩatatsemesĩbwa; Akamũlũsaya okwʼihitana liwe.

¹⁹Sũyĩlũhaye busana nʼabakola-nabi; Kutse sutsure ababi.

²⁰Kusangwa sihendisyabya oluhembo busana nʼomundu mubi; Etala yʼomubi yasyalĩmĩbwa.

²¹Mugala wage, gubahe Omwami Mukulu nʼomwami; Sutambe haguma nʼabakabindukabinduka.

²²Kusangwa erĩkwa lyabo lyasyahuluka neryo-neryo; Kandi nindi wasĩ erihera lĩkalũa kubo abosĩ babiri kwehĩ?

²³Ebĩ nĩ bĩnywa byʼabʼamenge. Erisombola ebitaga omwʼitswera Sĩryowene.

²⁴Oyukabwira omubi ati, Utunganene, Abandu basyamutakira, ebihanda byasyamũkwa esyonye.

²⁵Nĩkwa obutseme bwasyabya oko bakamuhayira, Nʼomũyĩsa owene asyahĩka kubo.

²⁶Akalyatsirira emĩnywa Oyũkasũbĩraya eritunganene.

²⁷Ũkokotaye emĩbĩrĩ yawe yʼeyĩhya, Ũyĩkokoterayeyo omolĩ; Nʼenyũma ũhĩmbe enyũmba yawe.

²⁸Suhandikirire mũlĩkyenyũ butsira mwatsi; Kandi sũtebaye omo mĩnywa yawe.

²⁹Sũbũge uti, Ngandimukola ngoko anyikola, Nasyahemba omundu ngʼomũbĩrĩ wuwe.

³⁰Monalaba hakũhĩ nʼeririma lyʼomugata, Nʼahakũhĩ nʼeririma lyʼebĩnyũ lyʼomundu utawite obowĩka;

³¹Neryo, lebaya, lyamabimerwa nʼemisakisaki, Nʼobugali bwalyo ibwamabiswikwa nʼebyatsinge, Nʼolũhĩmbo lwʼamabwe ĩlwamabĩterĩbwa.

³²Neryo monalebya, monaganĩrya ndeke; Monalangira, monabana erĩkangĩrĩrĩbwa.

³³Erigotsera hake nʼotũgotserĩ tuke, Nʼerĩrĩnga ebyala byo hake omo tũgotserĩ;

³⁴Obwera bwawe bwasyahĩka butya ngʼomũhũngĩ, Nʼobwaga bwawe ngʼomundu oyũhekĩre ebindu byʼamalwa.