Read nande Emĩsyo 28 Bible Online

Emĩsyo 28 - nande bible

Emĩsyo 28

¹Ababi bakatibita omugulu hate mundu ũkwamĩrebo; Nĩkwa abatunganene bawite obũbangĩ ngʼendale.

²Busana nʼerĩhalya lyʼekihugo, abanya-mwami bakyo ni bangi; Nĩkwa busana nʼabandu bʼamenge nʼeriminya, kikabyaho

³Omundu wʼobwaga oyũkanũbaya omwera Ali ngʼembũla yʼekihunga eyĩtesĩganaya akalyo.

⁴Abakasĩganaya ebihano bakapipa ababi; Nĩkwa abakategaya ebihano bakalwa nabo.

⁵Abandu babi sibeminya erĩbanza litunganene; Nĩkwa abakasonda-sonda Omwami Mukulu bakaminya emyatsi yosĩ.

⁶Omwera oyukalendera omo bugenge buwe owene Kwilaba oyũhengemĩre omo nzira siwe, nomo angabya wʼebindu.

⁷Oyũkategaya ebihano ni mugala oyuwite amenge; Nĩkwa oyuli mwĩra wʼabʼomururu akahemula ĩse wuwe.

⁸Oyukatomeka oko bũsokĩ buwe busana nʼendũndĩ nʼerikanyirira Akahĩndanayabyo busana nʼoyukaganyira abera.

⁹Oyukakunguta okũtũ kuwe okwʼowa ebihano, Erisaba liwe ni nye.

¹⁰Oyukaleka omutunganene akatala omo nzira nyibi, Asyawa omo buhya buwe ĩyowene; Nĩkwa abahĩkene basyalya obubuya mo mwandu.

¹¹Omundu wʼebindu ni wʼamenge omo meso wuwe masa; Nĩkwa omwera oyuwite eriminya akamũsondekanaya.

¹²Omugulu omutunganene akasĩngana, hakabya olukengerwa lungi; Nĩkwa omugulu ababi bakahangana, abandu bakayĩbĩsa.

¹³Oyũkakũnĩngĩra ebibi biwe siendĩsyowana; Nĩkwa oyũkakangayabyo nʼerirekabyo asyabana eriganyirwa.

¹⁴Obutseme buli nʼomundu oyukubaha emigulu yosĩ; Nĩkwa oyũkakalaya omutima wuwe asyawa omwʼihera.

¹⁵Ngʼendale eyikaruruma, kandi ngʼedubu eyikagenda-genda, Omũtabalĩ mubi Oyukatabala oko bera kwʼali atya.

¹⁶Omũsondolĩ oyukabula amenge nĩ mũnũbya munene nibya; Nĩkwa Oyũkakwa eritsuro lyʼobusu asyakanyĩrĩrya ebiro biwe.

¹⁷Oyũkalĩtoherawa nʼomusasi wʼomundundi Asyasagira omo buhya; Sihabye omundu oyũkamũkakĩraya.

¹⁸Oyukalendera omo litunganene asyalamĩbwa; Nĩkwa oyũhengemĩre omo nzira siwe asyawa lũba.

¹⁹Oyukalima eririma liwe asyabya nʼebyalya bingi; Nĩkwa oyukakwama abandu batya-batya asyabya nʼobwera obũmũhĩkĩre.

²⁰Omundu oyuteregula asyabya nʼomũyĩsa mungi; Nĩkwa oyukanguha eribya muteke siendisyabula erisuyirwa.

²¹Erisombola ebitaga Sĩryowene; Kutse omundu ĩsĩahalaya busana nʼekitole kyʼobundu.

²²Oyuwite erĩso libi akanguha eribana ebindu, Ĩsĩasĩ ngoko bwaga bwasyamũhĩkako.

²³Oyukakunga omundu asyasĩmwa enyũma Kwilaba oyũkasehaya omo lulimi.

²⁴Oyũkĩba ũkwʼĩse kutse uku nyĩnya, akayigamba ati, Sĩ ʼlolo, Naye nĩ mwĩra wʼomũherya.

²⁵Owʼekĩrĩmũ kyʼomururu akakola-kolaya amalwa; Nĩkwa oyukayiketera Omwami Mukulu asyanenehĩbwa.

²⁶Oyukayiketera omutima wuwe nĩ mũkĩrũ; Nĩkwa oyukalendera nʼamenge asyalamĩbwa.

²⁷Oyukaha abera siendisyabula kindu; Nĩkwa Oyũkabĩsa ameso wuwe asyabya nʼeritakirwa lingi.

²⁸Omugulu ababi bakahangana, abandu bakayĩbĩsa; Nĩkwa omugulu basyahera, abatunganene basyakanya.