Read nande Emĩsyo 3 Bible Online

Emĩsyo 3 - nande bible

Emĩsyo 3

¹Mugala wage, Siwibirirawe erihana lyage; Nĩkwa omutima wawe ategaye amategeko wage.

²Kusangwa ebiro bingi, nʼemĩtũta yʼobuyingo, Nʼobuholo byasyakutomekerwako.

³Obubuya nʼekwenene Suleke bĩkakũsĩganĩa. Usengerebyo oko bĩkya byawe; Usakebyo oko mutima wawe.

⁴Litya Wasyabana erĩsĩmwa nʼeriminya ndeke Embere syʼameso wa Nyamuhanga nʼawʼabandu.

⁵Wĩkĩrĩraye Omwami Mukulu nʼomutima wawe gosĩ, Sũyegemeraye obuminya bwawe.

⁶Omo syonzira syawe syosĩ umwahule, Naye asyatũngananĩa esyonzira syawe.

⁷Subye wʼamenge omo meso wawe; Gubahe Omwami Mukulu, Ũlũe oko bibi.

⁸Lyasyabya eritendera oko mubiri wawe, Nʼemingoso omo makũha wawe.

⁹Ũsĩkaye Omwami Mukulu omo bũsokĩ bwawe, Nʼomo buyilula bwʼerikanyirira lyawe lyosĩ.

¹⁰Litya ebigona byawe byasyũsũla mwʼebingi, Nʼebikamiro byawe byasyatswaga mwʼebĩnyũ bihya-bihya.

¹¹Mugala wage, supone erisuyira lyʼOmwami Mukulu; Kutse suluhe busana nʼerikunga liwe.

¹²Kusangwa oyo Mwami Mukulu anzĩre akamukunga, Ngoko ĩse akakunga mugala oyo akatsemera.

¹³Obutseme buli oko mundu oyukabana amenge, Nʼomundu Oyukabana eriminya.

¹⁴Kusangwa eritunda lyabyo lyowene kwilaba eritunda lyʼekĩtsĩpa, Nʼendũndĩ yabyo yĩlabĩre esyamagetsi esĩtũkwĩre.

¹⁵Igo ali nʼobũgũlĩ kwilaba erĩbwe lyʼamarĩjanĩ. Kandi sihali ekindu ekyo wanganza ekyangalĩngĩrĩranĩbwa nago.

¹⁶Ebiro bingi biri omo byala byago byʼamali; Nʼomo byala byʼamalembe muli ebindu nʼerĩsĩkya.

¹⁷Esyonzira syago ni nzira syʼerĩtsemesya, Nʼesyombalu syago syosĩ ni buholo.

¹⁸Igo ni muti wʼengebe oko bakahambago kutsibu. Nʼobutseme buli oko buli mundu oyukakakamirirago.

¹⁹Omwami Mukulu mwahĩra ekibanza kyʼekihugo omo menge; Mwasĩkya ekyanya omo bowĩka.

²⁰Omwʼiminya liwe emirindi moyagabana, Nʼebĩtũ bĩkatogongaya ekimi.

²¹Omugala wage, suleke bĩkalũa omo meso wawe; Ubike amenge awahĩkene nʼeriyisunako.

²²Litya byasyabya engebe oko kĩrĩmũ kyawe, Nʼerigenyera omo bĩkya byawe.

²³Oko mugulu oyo wasyagenda omo nzira yawe mo buholo, Nʼekisando kyawe sikyendĩsyatwĩkala.

²⁴Omugulu ukagotsera, siwendisyubaha; Ega, wasyagotsera, nʼotũgotserĩ twawe twasyasiha.

²⁵Sigubahe obuba bwʼerĩsĩsĩrya, Kutse erihera lyʼababi omugulu lĩkahĩka.

²⁶Kusangwa Omwami Mukulu asyabya eriyiketera lyawe, Asyateya ekisando kyawe sikihambawe.

²⁷Sĩwĩme obubuya ukwʼabo batolerebo, Omugulu uwite amaka omo byala byawe erikolakyo.

²⁸Subwire mũlĩkyenyũ uti, Genda, wasyaswasa, Nasyakuha omo ngyakya; Omugulu unawitekyo hakũhĩ nawe.

²⁹Sũganĩraye oko mũlĩkyenyũ kwʼekibi, Kusangwa ĩkere hakũhĩ nawe nʼobuholo.

³⁰Suhambalikane na mũlĩkyenyũ hate ekikaleka, Amabya sialitakukola nabi.

³¹Sutsure omundu wʼomwaga, Suyisoge enzira yiwe nʼenguma.

³²Kusangwa abahengemĩre ni nye oko Mwami Mukulu; Nĩkwa obwĩra buwe buli haguma nʼabatunganene.

³³Eritakira lyʼOmwami Mukulu liri omo nyũmba yʼababi; Nĩkwa akatsumula obwĩkalo bwʼabatunganene.

³⁴Kwenene akasekereraya abasekanĩ. Nĩkwa akakangaya olukogo oko bʼobũlĩge.

³⁵Abʼamenge basyalya ebyalagawa byʼolukengerwa; Nĩkwa esĩsonĩ syasyabya byambalo byʼabakĩrũ.