Read nande Emĩsyo 30 Bible Online

Emĩsyo 30 - nande bible

Emĩsyo 30

¹Omundu akabũga na Ĩtĩelĩ, uku Ĩtĩelĩ na Ũkalĩ ati,

²Kwenene nabiribya ngʼenyama kwilaba ogundi, Singwite amenge gʼomundu;

³Kutse sinditiga amenge, Kutse singwite eriminya lyʼOyũbũyĩrĩre.

⁴Nindi abirihetukira elubula nʼeriandagala kwehĩ? Nindi abirikumira erihunga omo biganza biwe kwehĩ? Nindi abirisengera amagetsi omo lukimba luwe kwehĩ? Nindi abĩrĩhanganĩa esyondũlĩ syosĩ syʼekihugo kwehĩ? Wamabya ũnasĩ, erĩna liwe yondi, Nʼerĩna lyʼomugala wuwe yondi kwehĩ?

⁵Obuli kĩnywa kya Nyamuhanga kyabiriera; Iye ni ngabo yʼabakamusagirako.

⁶Sutomekere oko bĩnywa biwe, Akasyakukunga, iwabanika mo mũbehĩ.

⁷Nabirikusaba emyatsi ĩbĩrĩ; Ĩsĩwanyĩmayo nde nahola.

⁸Ũsegeraye hali kwĩngye eriteba nʼamabehĩ; Sigumbe Obwera, kutse ebindu; Ũnyĩrĩsaye ebyalya ebĩmbĩkĩre.

⁹Ngasyũgũta nʼerikugana, nʼerĩbũga nyiti, Omwami Mukulu nindi kwehĩ? Kutse ngasyabya mwera, nʼerĩĩba, Nʼeriahula erĩna lya Nyamuhanga wage mo kĩtsũmĩ.

¹⁰Suhandikirire omugombe oko Mwami Mukulu wuwe, Akasyakutsuma, nawe iwabanika kʼomusango.

¹¹Hali olulengo olukatsuma abĩse wabo. Nʼabatetsumula abonyĩnya wabo.

¹²Hali olulengo oluli lubuya omo meso walo, Nĩkwa sĩberĩre omo bĩtĩsĩrĩre byabo.

¹³Hali olulengo, ameso wabo ahawĩre ngakĩ! Nʼebĩkoheryo byabo bĩhawĩre.

¹⁴Hali olulengo ameno wabo ali nga mĩyalĩ, Nʼebiyigo byabo ngʼemihamba, Erirya abera balũe omo kihugo, Nʼabʼobwaga balũe omo bandu.

¹⁵Omunyururu awite bali babiri Abakabirikira bati, Umba, Umba. Hali bindu bisatu ebĩtyũgũta nʼahake, Ega, ni bini ebĩtebũga biti, Bingaho:

¹⁶EKũlĩmũ; nʼenda yʼobugumba; Ekihugo ekĩtyũgũta amagetsi; Nʼomuliro owatebũga ati, Bingaho.

¹⁷Erĩso erikaseka ĩse, Nʼeripona erĩowa nyĩnya, Ebikororo byʼomusya byasyakulalyo, Nʼebyana byʼamasamba byasyalyalyo.

¹⁸Hali emyatsi ĩsatu yĩkanyĩswekaya kwilaba, Ega, ĩnĩ eyo ndasĩ:

¹⁹Olugendo lwʼerĩsamba omo kyanya; Olugendo lwʼenzoka okwʼĩbwe; Olugendo lwʼobwato oko ngetsi; Nʼemibere yʼomundu haguma nʼomwana-muto.

²⁰Olugendo lʼomũmalaya ko luli lutya; Akalya, nʼerisangula obuno buwe, Ati, Sinditakola nabi.

²¹Busana nʼemyatsi ĩsatu ekihugo kikatitimana, Kandi busana nʼeyĩnĩ sikiritoka eribegera kuyo.

²²Busana nʼomugombe omugulu akabya mwami; Nʼomũkĩrũ omugulu akũgũta kalyo;

²³Busana nʼomũkalĩ mubi omugulu akahĩkĩbawa; Omutsana yukalya omwandu wʼomugole wamo.

²⁴Hali bindu bini ebike-bike omo kihugo, Nĩkwa biwite amenge kwilaba:

²⁵Omuswa ni kihanda ekitawite maka, Nĩkwa akabana kalyo kago omo mugulu wʼomwisi;

²⁶Wĩbarĩ ni kihanda kyolo, Nĩkwa sikayira amanyũmba wasyo omo mabwe;

²⁷Esyongĩke sisiwite mwami. Nĩkwa sikahuluka omo milondo.

²⁸Omundu akahamba omusiribaba omo byala biwe, Nĩkwa omusiribaba akabanika omo manyũmba wʼabami.

²⁹Hali bindu bisatu ebikagenda ndeke, Ega, ni bini ebiwite olugendo lubuya.

³⁰Endale, eyĩrengĩre esyonyama syosĩ syʼamaka, Sirisegerera eyindi nyama;

³¹Embaya nibya, nʼengoko-lume eyikayiheka Nʼomwami oyũtesĩngawa.

³²Wamabya wabirikola obũkĩrũ ũkayĩhamya, Kutse wamabya Wabĩrĩganĩrya ebibi, Ũhĩre ebyala byawe oko buno bwawe.

³³Kusangwa eritsunda amasabũ likaleta amagũta, Nʼerĩtũtya enĩndo likaleta omusasi; Litya erĩsegemetererya erihitana likaleta amalwa.