Read nande Emĩsyo 4 Bible Online

Emĩsyo 4 - nande bible

Emĩsyo 4

¹Muhulikirire, abagala bage, amahano wa tata, Mutege amatwĩ mutoke eriminya amenge.

²Kusangwa ngabaha amahano mabuya; Sĩmũsĩganaye erihana lyage.

³Kusangwa nage nabya mugala wa tata, Inyine molo nʼomwanze omo meso wa koyo.

⁴Naye mwanyĩkangĩrĩrya, akambwira ati, Omutima wawe abike ebĩnywa byage; Ũtegaye amategeko wage, ubyeho.

⁵Uyibanire amenge, uyibanire eriminya. Siwibirirawe, kutse sugane ebĩnywa byʼomo buno bwage;

⁶Sũsĩgego, nago asyakũteya; Wanzego, nago asyakubika.

⁷Amenge ni mwatsi wʼembere; neryo uyibanire eriminya. Ega, haguma omwʼiyibanirago lyawe lyosĩ uyibanire eriminya.

⁸Ũhamayego, nago asyakutandalika; Asyakubanira erĩsĩkĩbwa, omugulu wasyakũmbatirago.

⁹Asyaha omutwe wawe akakĩra kʼerigenyera; Asyakuletera embĩta yʼolukengerwa.

¹⁰Gowe, uwe mugala wage, wangirire emĩbũge yage; Nʼemĩtũta yʼengebe yawe yasyabya mingi.

¹¹Nabĩrĩkũkangĩrĩrya enzira yʼamenge; Nabirikusondola omo syombalu syʼeritunganene.

¹²Omugulu ukagenda, ebika byawe sibyendĩsyatwĩkalĩbwa; Nomo wangatibita, siwendĩsyatwĩkala.

¹³Uhambe ndeke erĩkangĩrĩrya; sũlwĩkeryo. Uhambane nalyo, kusangwa lyo ngebe yawe.

¹⁴Siwingire omo nzira yʼababi, Sulendere omo nzira yʼabandu babi.

¹⁵Usageyo, sulabe hakũhĩ nayo; Uyihigule kuyo, Ulabe embere.

¹⁶Kusangwa sibeyato bate babikola ebibi; Nʼotũgotserĩ twabo tũkalũaho bate bawĩsya bandi.

¹⁷Kusangwa bakalya ebyalya byʼobubi, Bakapũlaya ebĩnyũ byʼomwaga.

¹⁸Nĩkwa enzira yʼabatunganene iri ngʼekyakakala kyʼomwĩtsange, Ekĩkakoleraya nʼerikanya erĩhĩka oko kiro kĩyĩma-yĩma.

¹⁹Enzira yʼababi iri ngʼomwĩrĩmya. Sĩbasĩ ekĩkatwĩkalayabo.

²⁰Mugala wage, gowe ebĩnywa byage; Ũtegaye okũtũ busana nʼerĩbũga lyage.

²¹Suleke bĩkalũa omo meso wawe; Ubikebyo omo mutima wawe.

²²Kusangwa ni ngebe oko bakabanabyo, Nʼobutendere oko mubiri wabo gosĩ.

²³Tegaya omutima wawe nʼomũhwa gosĩ; Kusangwa mugo mũkalũa esyongũnũnũko syʼengebe.

²⁴Uhigire hali kuwe obuno bũhengemĩre, Nʼemĩnywa yʼobuhengeme ũhĩreyo hali kuwe.

²⁵Ameso wawe asamalire embere, Nʼesyongohe syawe sisamalire embere syawe ndeke.

²⁶Ulĩngĩrĩranaye enzira yʼebisando byawe, Nʼesyonzira syawe sĩtegekanĩbawe.

²⁷Sukitire oko byala byʼamali kutse ebyʼamalembe. Ũlũsaye ekisando kyawe kyʼoko kibi.