Read nande Emĩsyo 8 Bible Online

Emĩsyo 8 - nande bible

Emĩsyo 8

¹Kwʼamenge sialibirikira, Nʼamenge sialisumba omulenge wago kwehĩ?

²Ahangene omo syosingi hakũhĩ nʼenzira, Ahangene omo mahwa wʼesyonzira;

³Oko mĩsĩke yʼebikiraga, omwʼingiro lyʼomũyĩ, Omwʼingiro lyʼesyonyũyĩ akalaka kutsibu;

⁴Ũkwʼĩnywe, ĩnywe balume, ngabirikira; Nʼomulenge wage ali oko bagala bʼabandu.

⁵Ĩnywe bayimbula, mowe amenge; Kandi, nenyũ bakĩrũ, mubye nʼomutima wʼobowĩka.

⁶Hulikirira, kusangwa ngandĩbũga emyatsi mibuya; Nʼerĩkũmbũla lyʼemĩnywa yage lyasyabya emyatsi yitunganene.

⁷Kusangwa obuno bwage bwasyabũga kwenene; Nʼobubi ni nye oko mĩnywa yawe.

⁸Ebĩnywa byosĩ byʼobuno bwage biri omo litunganene; Sihali ekĩhengemĩre kutse erĩsĩngĩsĩrya mubyo.

⁹Ebyosĩ bĩlangĩre oko yukaminya, Bitunganene ukwʼabo bakabana eriminya.

¹⁰Mwangirire erĩkangĩrĩrya lyage butsira ebĩtsĩpa; Nʼeriminya kwilaba esyamagetsi esĩyĩsogĩrwe.

¹¹Kusangwa amenge owene kwilaba amarĩzanĩ; Nago siangalĩngĩrĩranĩbwa nʼebindu byosĩ ebyanganzwa.

¹²Ĩngye menge nabiriyira obũgeretanĩa mo bwĩkalo bwage, Ngasondaya eriminya nʼeriyisunako.

¹³Eriubaha lyʼOmwami Mukulu nĩʼkwa ebibi byʼobusu. Ngakwa eriyipipa lyʼobusu, nʼemiyihalambo, nʼenzira nyibi, Nʼobuno bwʼerĩsĩngĩsĩrya.

¹⁴Erihana ni ryage, nʼeriminya lĩhĩkene. Ĩngye indi menge; ngwite Obũtokĩ.

¹⁵Busana nage abami bakatabala, Nʼabanya-mwami bakategeka erĩbanza.

¹⁶Busana nage abanya-mwami bakatabala, Nʼabakama, nʼabatswerĩ bosĩ bʼekihugo.

¹⁷Nyanzĩre abakanyanza; Nʼabakanyĩsondaya nʼomũhwa basyanyibana.

¹⁸Ebindu nʼerĩsĩkya biri haguma nage; Ega, ebindu ebitehwa nʼeritunganene.

¹⁹Ebĩgũma byage byowene kwilaba esyamagetsi, ega, esyamagetsi nyibuya; Nʼendũndĩ yage ĩlabĩre ebĩtsĩpa bisombwere.

²⁰Ngalendera omo nzira yʼeritunganene, Omo katĩkatĩ kʼesyombalu syʼekwenene;

²¹Inatoka erĩrĩsya omwandu wʼobũsokĩ bwʼabanyanzĩre, Inatoka erĩũsũlya ebigona byabo.

²²Omwami Mukulu anyihangika omo nzũko yʼenzira yiwe, Embere wʼemĩbĩrĩ yiwe ya kera-kera.

²³Nahĩrawa erĩtsũka kera erĩlũa oko nzũko, Ekihugo kite kyabya.

²⁴Omugulu hatabya mirindi, nabutawa, Omugulu hatabya esyongũnũnũko esyoswĩre mwʼamagetsi.

²⁵Ebitwa bite byasĩkĩbwa, Nabutawa embere wʼehitwa,

²⁶Omugulu abya ate abumba ekihugo, kutse ebisuki, Kutse enzũko yʼolũtũtũ lwʼekihugo.

²⁷Omugulu asingika amatũkũ, nabyaho. Omugulu asingika ekĩrĩngo oko bũsũ bwʼemirindi,

²⁸Omugulu asĩkaya ekyanya endata, Omugulu esyongũnũnũko syʼemirindi syakalĩbawa,

²⁹Omugulu aha engetsi yʼomutano wayo, Amagetsi akasyahalya eritegeka liwe, Omugulu atondeka ebibanza byʼekihugo;

³⁰Oko mugulu oyo nabya hakũhĩ naye, ngʼomũkolĩ mukulu; Nabya nʼobutseme buwe obuli kiro, Nʼeritsemea emigulu yosĩ embere siwe,

³¹Nʼeritsemera ekihugo kiwe; Nʼobutseme bwage bwabya haguma nʼabagala bʼabandu.

³²Neryo lino, bagala bage, mũnyowe; Kusangwa omũyĩsa ali oko bakategaya esyonzira syage.

³³Muhulikirire erĩkangĩrĩrya, mubye nʼamenge, Simuganego.

³⁴Omũyĩsa ali oko mundu oyũkanyowa, Oyũkategaya obuli kiro oko syongyo syage, Nʼeririndirira oko syonzeguliro syʼesyonyũyĩ syage.

³⁵Kusangwa oyũkanyĩsonda-sondaya akabana engebe, Kandi asyabana erĩsĩmwa nʼOmwami Mukulu.

³⁶Nĩkwa oyũkanyĩhalayako akahalaya omutima wuwe ĩyowene-wene. Abosĩ abakanyĩkwa obusu banzĩre oluholo.