Read nande Omũgambũlĩ 12 Bible Online

Omũgambũlĩ 12 - nande bible

Omũgambũlĩ 12

¹Wibuke nibya Omũhangĩkĩ wawe omo biro byʼobũlwana bwawe, ebiro bibi bite byahĩka, kutse emyaka ite yasegera hakũhĩ, omugulu wasyabũga uti, Sinditsemera mubyo.

²Eryuba, nʼekyakakala, nʼomukera, nʼesyongũnũnũ, bite byahĩrwa mʼomwĩrĩmya, nʼebĩtũ bikasubula enyũma wʼembũla,

³oko kiro ekyo abateya bʼenyũmba basyatitimana, nʼesyombangĩ sĩkũnama, nʼabakaswa bakahangana buyira kusangwa ni bake, nʼabandu abakasamalira eyĩhya omo lĩdĩrĩsa basyahĩrwa kwʼomwĩrĩmya,

⁴nʼesyonyũyĩ sikakingwa omo nzira, omugulu omulenge wʼeriswa ni muke, nʼomundu asyabuka oko mulenge wʼenyonyũ, nʼabali bosĩ abʼeriimba basyakehya emirenge yabo.

⁵Kandi abandu bakubaha ahali endata, nʼerĩũbahya lyʼomo nzira. Omuti wʼomũlosĩ asyabya musanga, nʼekituta kikayikura ahisi, nʼerĩyĩtsũtsa likandisyabula. Kusangwa omundu akaya omuwe erikota, nʼabalĩrĩ bakatĩmbatĩmba omo syonzira.

⁶Umwibuke omugulu omũlĩkĩ wʼekĩtsĩpa sialyatwĩka, kutse ekibindi kyʼesyamagetsi kite kyahĩnokala, kutse olũtehĩ lukatulikira oko kitehero, kutse ekĩrĩngo kikatulika okwʼĩrĩba.

⁷Neryo olũtũtũ lukasuba oko kitaka ngoko lwabya, nʼekĩrĩmũ kikasuba uku Nyamuhanga oyo wahakyo.

⁸Omũgambũlĩ akabũga ati, Ebyosĩ ni busa.

⁹Kandi, kusangwa Omũgambũlĩ abya wʼamenge, kandi mwakangĩrĩrya abandu eriminya nibya, kandi mwaganĩrya, mwayĩtegererya, mwatondekanĩa emĩsyo mingi.

¹⁰Omũgambũlĩ mwasonda eribana ebĩnywa byʼerĩtsemesya, nʼerisaka ndeke ebĩnywa byʼekwenene.

¹¹Ebĩnywa byʼabandu bʼamenge biri ngʼesĩndanĩ yʼerĩkũna enyama, kandi ngʼemĩsũmalĩ yʼemilondo eyĩkahĩrawa ndeke nĩ bĩnywa byʼOmũlĩsya muguma.

¹²Nʼakandi, mugala wage, wĩgĩsĩbawe, ehee! Okwʼisaka ebitabu bingi sihali endũlĩ. Nʼeriiga lingi lĩkalũhaya omũbĩrĩ.

¹³Endũlĩ yʼomwatsi oyũ yeyĩ; ebyosĩ byabĩryowĩbwa. Gubahe Nyamuhanga, ũtegaye ebihano biwe, kusangwa ebĩ byo bitolere ndeke busana nʼobuli mundu.

¹⁴Kusangwa Nyamuhanga asyaleta obuli mũbĩrĩ okwʼitswerwa, haguma nʼobuli kindu kĩbĩsamĩre, kutse kyamabya kyowene, kutse kyamabya kiri kibi.