Read nande Omũgambũlĩ 4 Bible Online

Omũgambũlĩ 4 - nande bible

Omũgambũlĩ 4

¹Neryo monaswalangira emĩbĩrĩ yʼerĩnũbya lyosĩ eyikakolawa eyĩkwa muna-kihugo. Neryo lebaya, monalangira emĩsonĩa yʼabandu banũbĩbawa, isibawite omũsĩbĩkya. Nʼobũtokĩ bwabya oko luhande lwʼabandu abanũbayabo, nĩkwa sibabya nʼomundu oyũkasĩbĩkayabo.

²Kyaleka inapipa abaholĩ ababirihola kera kwilaba abaholĩ ibakineho.

³Nĩkwa omubuya kwilaba abosĩ babiri, yo yute wabyaho, oyũterebaya na kera emĩbĩrĩ mibi eyikakoleka eyĩkwa muna-kihugo.

⁴Neryo monalangira emĩbĩrĩ yosĩ, nʼobuli mũbĩrĩ wʼobunyima, eyikakolawa, ni busana nʼomwatsi wʼomundu oyukatsurawa na mũlĩkyabo. Ekĩ nakyo ni busa ngʼerikwamirira erihunga.

⁵Omũkĩrũ akayĩkũngũmanaya, nʼerĩyĩta nʼenzala.

⁶Ekiganza kiguma kyoswĩre haguma nʼerĩtũlera kyowene kwilaba ebiganza bibiri ebyoswĩre nʼomũbĩrĩ nʼerikwamirira erihunga.

⁷Neryo monaswalangira ekyʼobusa eyĩkwa muna-kihugo.

⁸Hali mundu muguma naye ali ĩyowene; siawite mugala kutse mugala wabo. Nĩkwa sihali endũlĩ yʼomũbĩrĩ wuwe gosĩ, ameso wuwe sĩalĩũgũta omo bindu. Ati, Ngayĩlũhĩraya busana nandi, nʼerĩĩma omutima wage wʼebibuya kwehĩ? Ekĩ nakyo ni busa, kandi nĩ mũbĩrĩ gʼobũlĩge.

⁹Ababiri bowene kwilaba omuguma, kusangwa bawite oluhembo lowene busana nʼemĩbĩrĩ yabo.

¹⁰Kusangwa omuguma amayĩhĩnda, omuguma asyahanganĩa mũlĩkyabo, nĩkwa obũlĩge oko yuli ĩyowene omugulu akayĩhĩnda hate gundi wʼerimusumba.

¹¹Kandi, ababiri bamagotsera haguma, bakahũha; nĩkwa omuguma angatoka erĩhũha ĩyowene ati kwehĩ?

¹²Neryo omundu muguma amatoka erĩkĩnda oyuliho ĩyowene, abandu babiri basyamutoka. Olukoba lwʼemihungyi ĩsatu sĩlũlĩtwĩka lũba.

¹³Omũlwana mwera nʼowʼamenge owene kwilaba omwami mũsyakulu nʼomũkĩrũ, oyũtasĩ eriangirira erĩkangĩrĩrya.

¹⁴Kusangwa mwahuluka omo mũlĩkĩ eribya mwami, nomo anabya abũtĩrwe mwera omo bwami buwe.

¹⁵Monalebya abandu bosĩ abaliho muna-kihugo ibakakwama mũlwana muguma Oyukaya oko ngoma yʼOmwami.

¹⁶Sihabya ndũlĩ yʼabandu bosĩ abo mwami atabalako. Nĩkwa amabigenda, sihali oyũkasĩma ebyo akola. Kwenene ekĩ nakyo ni busa nʼerikwamirira erihunga.