Read nande Omũgambũlĩ 5 Bible Online

Omũgambũlĩ 5 - nande bible

Omũgambũlĩ 5

¹Ũtegaye ekisando kyawe omugulu ukaya omo nyũmba ya Nyamuhanga. Kusangwa erĩyĩtũnda erihulikirira lyowene kwilaba erihonga lyʼabakĩrũ kusangwa sĩbasĩ ko bakakola nabi.

²Sũbũge lũba-lũba omo buno bwawe, kandi Suleke omutima wawe akanguha erĩbũga kindu embere sya Nyamuhanga. Kusangwa Nyamuhanga ali elubula, nawe uli omo kihugo. Busana nʼekyo ebĩnywa byawe bibye bike.

³Kusangwa erilota lĩkahĩka busana nʼomũbĩrĩ mungi, nʼomulenge wʼomũkĩrũ akabya omo bĩnywa bingi.

⁴Omugulu ukalaga Nyamuhanga, sulindirire erĩtũhalyo, kusangwa sialitsemera ebĩkĩrũ. Ũtũhe ekyo walaga!

⁵Kumbe lyowene isiwalagakĩ, kwilaba erilaga nʼeritindatũhalyo.

⁶Suleke obuno bwawe bukaleka ĩwahalya. Kutse sũbũge embere syʼomũlaĩka uti wahabaya. Busana nakĩ ukaleka Nyamuhanga iniahitana busana nawe, nʼerĩherya omũbĩrĩ wʼebyala byawe kwehĩ?

⁷Kusangwa omwʼilota lingi, nʼomo bĩnywa bingi hali busa Nĩkwa gubahe Nyamuhanga.

⁸Wamalangira erinuba lyʼabera, nʼerigana erĩbanza nʼeritunganene omo kihugo, suswekere omwatsi oyo; kusangwa omukulu muguma akategaya ogundi mukulu; kandi hali bandu bakulu kwilababo

⁹Kandi ekihugo kiri nʼobwaga bʼomwami Oyukalima.

¹⁰Oyukanza ebĩtsĩpa sĩendĩsyũgũtĩbwa nʼebĩtsĩpa; kutse oyo wanzĩre bingi sĩendĩsyũgũtĩbwa omwʼikanya lyabyo. Ekĩ nakyo ni busa.

¹¹Omugulu ebindu bikakanyirira, abakasyalyabyo bakakanyirira. Kandi nĩ ndũndĩ yahi oko mwenyebyo erilangirabyo omo meso wuwekwehĩ?

¹²Otũgotserĩ twʼomũkolĩ wʼomũbĩrĩ tũsĩhĩre, amalya bike kutse bingi; nĩkwa erĩũgũta lyʼomundu wʼebindu siryemuleka akayato.

¹³Hali ebibi bĩkalĩre ebyo nabirilangira eyĩkwa muna-kihugo, ebindu ebyo mwenyebyo akayibikira bĩkamwagalaya.

¹⁴Omugulu ebindu ebyo bikahera omwʼitunda libi. Naye amabya abiributa mugala, omo byala biwe Simuli kindu kyʼerimulembera.

¹⁵Ngoko alũa omo nda ya nyĩnya wuwe akandisyagenda ndũmbũ ngoko anasa. Isiendisyaheka kindu busana nʼomũbĩrĩ wuwe, ekyo angahekĩre omo byala biwe.

¹⁶Nʼekĩ nakyo ni kibi kĩkalĩre, ngoko anasa, kwʼanemwendisyagenda atya. Kandi amabana endũndĩ yahi busana nʼomũbĩrĩ akola busana nʼerĩhũnga kwehĩ?

¹⁷Nibya omo biro byosĩ biwe akalya omo mwĩrĩmya, naye akagalawa kutsibu, inialwere nʼerihitana.

¹⁸Lebaya, ekyo nabĩrĩrebya ko kiri kibuya nʼekyowene, yo mundu erirya nʼerĩpũlya, nʼeritsemera ebibuya omo mĩbĩrĩ yiwe yosĩ, eyo akakola eyĩkwa muna-kihugo, omo biro byosĩ byʼobuyingo buwe, ebyo Nyamuhanga abirimuha, kusangwa olũ ni luhembo luwe.

¹⁹Obuli mundu oyo Nyamuhanga abiriha ebindu, nʼobuteke, kandi abirimuha nibya Obũtokĩ bwʼerirya kubyo, nʼerĩĩmya oluhembo luwe, nʼeritsemera omũbĩrĩ wuwe, olũ nĩ lũsũnzo lwa Nyamuhanga.

²⁰Kusangwa siendisyibuka kutsibu ebiro byʼobuyingo buwe, kusangwa Nyamuhanga akaleka iniasiba omo butseme bʼomutima wuwe.