Read nande Omũgambũlĩ 9 Bible Online

Omũgambũlĩ 9 - nande bible

Omũgambũlĩ 9

¹Busana nʼebĩ byosĩ monahĩra oko mutima wage erĩsonda-sondyabyo: nyiti, abandu abatunganene, nʼabandu bʼamenge, nʼemĩbĩrĩ yabo, iri omo byala bya Nyamuhanga. Omundu sĩasĩ lwamabya luli lwanzo, kutse obusu, ebyosĩ bikamulinda.

²Emyatsi yosĩ ĩkahĩka oko bosĩ lulinga luguma, hali mwatsi muguma oko batunganene nʼababi, oko babuya, nʼoko berĩre nʼoko baterĩre, oko mundu oyukahonga, nʼoyutehonga. Ngoko mubuya ali, omukola-nabi kwʼali atya. Nʼoyũkalahĩraya nʼoyukubaha erĩlahĩrya.

³Ekĩ ni kibi omo byosĩ ebikakoleka eyĩkwa munakihugo hati hali mwatsi muguma busana nʼabosĩ. Kandi, emitima yʼabagala bʼabandu yoswĩre nʼobubi, nʼerĩsĩre liri omo mitima yabo, omugulu bakiriho. Nʼenyũma wʼaho bakaya oko baholĩ.

⁴Kusangwa hali amaha oko yũkayamatanaya nʼabosĩ abaliho, kusangwa embwa eyiriho ĩlabĩre endale eyĩholĩre.

⁵Kusangwa abaliho banasĩ ko bakandisyahola. Nĩkwa abaholĩ sĩbasĩkĩ, kutse sibawite oluhembo; kusangwa eriibukabo lyabiribiriranwa.

⁶Olwanzo lwabo, nʼobusu bwabo nʼomũhwa wabo, byabirihera kera, kandi kutse sibendisyaswabya nʼĩgabo kandi na kera omo byosĩ bikakoleka eyĩkwa muna-kihugo.

⁷Neryo ugende, ulye akalyo kawe nʼobutseme, nʼerĩpũlya ebĩnyũ byawe nʼomutima wʼeritsanga, kusangwa Nyamuhanga abĩrĩsĩma emĩbĩrĩ yawe.

⁸Esyongimba syawe sĩhenaye ebiro byosĩ. Nʼomutwe wawe siabule magũta.

⁹Utseme nʼomũkalĩ wawe oyo wanzĩre ebiro byosĩ byʼengebe yawe yʼakatambĩ, eyo abirikuha eyĩkwa muna-kihugo, kusangwa ebyo ni luhembo lwawe omo ngebe, nʼomo mũbĩrĩ ogo ukakola eyĩkwa muna-kihugo.

¹⁰Ekĩndũkĩ ekyo ebyala byawe bikabana erikola, ukikole nʼamaka wawe gosĩ, kusangwa sihali mũbĩrĩ, kutse erĩtegekanĩa, kutse amenge eKũlĩmũ, eyo ukaya.

¹¹Kandi, monalebya eyĩkwa muna-kihugo, nyiti obutibito si busana nʼabangũhĩ, kutse amalwa si busana nʼesyombangĩ, kutse obundu si busana nʼabʼamenge, kutse obuteke si busana nʼabandu bʼobowĩka, kutse olukogo si busana nʼabanyima. Nĩkwa omugulu nʼembanga bĩkahĩka oko bosĩ.

¹²Kandi omundu sĩasĩ omugulu wuwe. Ngʼamahere awakahambawa omo butaha-taha bubi, kandi ngʼesyonyonyũ sikahambawa omo muguli, kwʼabagala bʼabandu bakategawa batya omo mugulu mubi, omugulu ekitego kikatogerabo lũba-lũba.

¹³Neryo monaminya erilangira ekĩ ngʼamenge eyĩkwa muna-kihugo, nago mwanyĩtsemesya.

¹⁴Mohabya akayĩ kake, nʼabandu bake muko. Neryo omwami munene mwasa kuko, mwagoterako, kandi mwahĩmba ahakongotere hanene eribambirako.

¹⁵Nĩkwa mohabanika muko omundu mwera wʼamenge, naye omo menge wuwe mwalamya omũyĩ oyo. Nĩkwa sihali mundu oyo wibuka omundu mwera oyo.

¹⁶Neryo monabũga nyiti, Amenge ni mabuya kwilaba akagala. Nĩkwa amenge wʼomundu mwera akaponawa, nʼebĩnywa biwe sĩbyowĩbawa.

¹⁷Ebĩnywa byʼabanyima ebĩkowĩbawa omo bũtũlere byowene kwilaba omulenge munene wʼomũtabalĩ omo katĩkatĩ kʼabakĩrũ.

¹⁸Amenge ni mabuya kwilaba ebindu byʼamalwa, nĩkwa omukola-nabi muguma akatsandaya ebibuya bingi.