Read nande Olwimbo lwʼEsyonyimbo 1 Bible Online

Olwimbo lwʼEsyonyimbo 1 - nande bible

Olwimbo lwʼEsyonyimbo 1

¹Olwimbo lwʼesyonyimbo, lwa Solomono.

²Anyiryatsirire nʼeriryatsirira lyʼobuno buwe, Kusangwa olwanzo lwawe ni lubuya kwilaba ebĩnyũ.

³Amagũta wawe akakumba ndeke, Erĩna lyawe liri ngʼamagũta awengĩre. Busana nʼekyo abambesa bakakwanza.

⁴Unyikure tutibite haguma! Omwami abĩrĩnyĩkolya omo bisenge biwe. Tukandikutsemera, nʼerikukangatira. Twasyahula olwanzo lwawe kwilaba ebĩnyũ. Bakakwanza okwʼitunganana.

⁵Nyĩkĩnĩre nĩkwa indi mubuya, Ĩnywe bali bʼeYerũsalema, Ngʼamahema wʼeKedarĩ, Ngʼesyongimba sikaleremba omo syongyo sya Solomono.

⁶Sunyisamalire, kusangwa nyĩkĩnĩre, Kusangwa eryuba lyabĩrĩnyĩhĩsya. Abagala ba koyo mobanyihitanako. Mobanyiyira mo mũteya wʼamalima wʼebĩnyũ. Nĩkwa eririma lyage lyʼebĩnyũ sĩndĩtalĩteya.

⁷Uwe mutima wage nyanzĩre, unyibwire Aho ũkalĩsĩraya ekĩhyo kyawe, Ni hahi ũkakĩlũhũkĩraya omwʼitungi; Kusangwa busana nakĩ nangabya ngʼoyukaswikawa oko bũsũ buwe Hakũhĩ nʼebihangulo byʼabalĩkyenyũ kwehĩ?

⁸Uwe mubuya kutsibu kwilaba abakalĩ bosĩ, Wamabya ĩsĩwasĩ, Ukwame esyongobe syʼekĩhyo, Ũlĩsĩraye ebyana byʼesyombene Hakũhĩ nʼamahema wʼabalĩsya.

⁹Nabĩrĩkũlĩngĩrĩranĩa, uwe mwanze wage, Ngʼesabayĩrĩ yage eyikakura, egalĩ omo katĩkatĩ kʼesya Farao.

¹⁰Amatema wawe ni mabuya omo butega, Ebĩkya byawe busana nʼobũkwangĩ.

¹¹Tukandisyakulukira ebikarara byʼesyamagetsi Haguma nʼesyongwangĩ syʼekĩtsĩpa.

¹²Omugulu omwami ĩkere oko mesa yiwe, Amagũta wage wʼenardo mwahũlũkya erikumba ndeke lyago.

¹³Omwanze wage ali ngʼekĩtũ kyʼobukwa busana nage, Ekikasiba omo katĩkatĩ kʼamabere wage omo kiro kyosĩ.

¹⁴Omwanze wage ali ngʼomusanga wʼekofere busana nage Omo malima wʼebĩnyũ wʼeEngedĩ.

¹⁵Lebaya, uli mubuya, uwe mwanze wage, Lebaya, uli mubuya! Ameso wawe ali ngʼehĩrĩkũkũ.

¹⁶Lebaya, uwe mwanze wage, uli mubuya! Ega, ũkatsemesaya. Kandi engyingo yetu ni nyibuya.

¹⁷Emigamba yʼenyũmba yetu nĩ yʼemĩerezĩ, Nʼemihinzi yetu nĩ kĩlagũ.