Read nande Olwimbo lwʼEsyonyimbo 6 Bible Online

Olwimbo lwʼEsyonyimbo 6 - nande bible

Olwimbo lwʼEsyonyimbo 6

¹Omwanze wawe ayĩre hahi kwehĩ? Uwe mubuya kutsibu omo katĩkatĩ kʼabakatĩ? Omwanze wawe alolera hahi kwehĩ? Itwatoka erĩmũsonda-sondya haguma nawe.

²Omwanze wage abiriandagalira omwʼirima liwe, Omo mahya wʼamanũkato, Erĩrĩsya ekihangulo kiwe omo malima, Nʼerioha omusanga wʼobutsibira.

³Ĩngye indi wʼomwanze wage, nʼomwanze wage ni wage. Oyũkalĩsaya ekihangulo kiwe omo katĩkatĩ kʼamaranga.

⁴Uwe mwanze wage, uli mubuya ngʼeTĩrza, Omubuya ngʼeYerũsalema, Uli wʼeriswekera ngʼomulondo owali mwʼesyobendera.

⁵Ũlũsaye ameso wawe ũkwʼĩngye, Kusangwa akangunungula, Esyonzwiri syawe siri ngʼekihangulo kyʼesyombene-hene, Esĩkalũa oko luhande lwʼeGĩleadĩ.

⁶Ameno wawe ali ngʼekihangulo kyʼesyotsugutsi, Esĩkalũa oko kinabiro; Esyosĩ sikabuta ĩbĩrĩ-bĩrĩ, Isihali eyabĩrĩkũsya.

⁷Amaraka wawe ali ngʼoluhande lwʼamakomamanga Enyũma yʼekiswiko kyawe kyʼobũsũ.

⁸Hali abagole makũmĩ ndatu, nʼabasombe makũmĩ munani, Nʼabambesa obutaganzika.

⁹Nĩkwa akalĩkũkũ kage, oyũhĩkene wage, ni muguma musa, Naye abũtĩrwe ĩyowene na koyo wuwe. Iye ni kitaga kyʼoyo wamubuta. Abambesa mobamulolako, mobamwahula mo gʼomũyĩsa. Abagole nʼabasombe, mobamupipa.

¹⁰Nindi oyũkangĩre ngʼomusakala, Omubuya ngʼomukera, Oyũhenĩrye ngʼeryuba, Owʼeriswekera ngʼomulondo wʼabasĩrĩkanĩ owaliko esyobendera kwehĩ?

¹¹Monandagala omwʼirima lyʼamakalanga, Erĩrebya omusanga wʼomusya, Erĩrebya ebĩnyũ, nga byamaleta omusanga, Ngʼemikomamanga iri kʼomusanga.

¹²Isinditaminya aho ekĩrĩmũ kyage kyamanyĩhĩra Omo katĩkatĩ kʼesyogalĩ syʼabandu bakulu bage.

¹³Uwe Mũsũlamĩ, usubule, usubule, usubule, usubule, tukulangire ndeke! Busana nakĩ mwanzĩre erisamalira Omũsũlamĩ kwehĩ? Ngʼerisata lyʼemilondo ĩbĩrĩ kwehĩ?