Read nande Olwimbo lwʼEsyonyimbo 7 Bible Online

Olwimbo lwʼEsyonyimbo 7 - nande bible

Olwimbo lwʼEsyonyimbo 7

¹Uwe mwali wʼomunya-mwami, Ebisando byawe omo syongendero ni bibuya! Erikondoma lyʼesyondungu syawe siri ngʼamabwe wʼobũgũlĩ bunene, Omũbĩrĩ wʼebyala byʼomũgeretanĩa.

²Omukundi wawe ali ngʼolũtehĩ lũyĩgũlũmbĩre, Omutebula ebĩnyũ ebĩtũlũngene. Enda yawe iri ngʼekĩgahya kyʼengano Eyĩtĩmbĩrweko nʼomusanga wʼerĩranga.

³Amabere wawe abiri ali ngʼebyana bibiri byʼengabi Ĩbĩbũtĩrwe haguma.

⁴Ebĩkya byawe bĩsũngũlĩkĩre ngʼendũyĩ yʼerĩno lyʼenzogũ. Ameso wawe ali ngʼebitsinga eHesbonĩ, Hakũhĩ nʼolũkyo lwʼeBatĩ-rabĩmũ. Enĩndo yawe ĩsũngũlĩkĩre ngʼomusunguliko wʼe Lebanonĩ Eyikasamalira ebwanga bwʼeDamasekĩ.

⁵Omutwe wawe ali kuwe ngʼeKaramelĩ, Nʼesyonzwiri syʼoko mutwe wawe siri ngʼomulingande. Omwami ahambĩrwe omo bubuya bwʼesyonzwiri syawe.

⁶Uli mubuya ũkatsemesaya ndeke uti, Uwe mwanze wage, busana nʼebĩkatsemesaya byawe!

⁷Obuli bwawe obũ buli ngʼomuti wʼobubondo, Nʼamabere wawe ngʼebĩgũma byago.

⁸Monabũga nyiti, Ngandisambira omomuti wʼobubondo, Ngandĩsyawatĩrĩrya omo mitahi yago yʼebĩgũma. Amabere wawe abye ngʼebĩgũma byʼebĩnyũ, Nʼerikumba ndeke lyʼomuka wawe abya nga tofala,

⁹Nʼobuno bwawe bubye ngʼebĩnyũ byowenenga, Ebikasenda ndeke omo nda busana nʼomwanze wage, Ebikasenda ndeke oko mĩnywa yʼabandu abakayato.

¹⁰Ĩngye indi wʼomwanze wage, Nʼerisonda liwe liri kwĩngye.

¹¹Omwanze wage, wase, tugende omolĩ; Tugotsere omo mĩyĩ.

¹²Tutsinduke eriya omo malima wʼebĩnyũ. Tulangire omũlĩkĩ wʼebĩnyũ ngʼakaleta omusanga, Nʼomusanga wabyo ngʼamaleta ebĩgũma, Nʼesyokomamanga nga sinemuleta omusanga. Nʼeyo nasyakuha olwanzo lwage.

¹³Emitunguya ĩkahũlũkaya ekikumbo kibuya, Eyʼoko syongyo syetu siri kwʼebĩgũma byowene byʼemĩsĩndo yosĩ, Ebihya-bihya nʼebya kera, Ebyo nabirikubikira, uwe mwanze wage.