Read nande Ĩsaya 10 Bible Online

Ĩsaya 10 - nande bible

Ĩsaya 10

¹Obũlĩge oko bandu abakahamula emigambo mibi, nʼabandu abakasaka eritswera eritatunganene,

²abakakaga abʼobwaga erĩbanza litunganene, nʼerinyega abera bʼabandu bage erĩsĩngana lyabo, bati abakwakalĩ babye banyegwa babo, ibatoka erĩhũnga esyongũbĩ!

³Neryo mwasyakolakĩ omo kiro kyʼerisuyira, nʼomwʼĩkĩndwa erĩkandĩsyalũa ehali kwehĩ? Mwasyasagira ukundi eribana erĩwatĩkya kwehĩ? Kandi mwasyasĩganĩa obuteke bwenyũ bo hahi kwehĩ?

⁴Basyũnama omo katĩkatĩ kʼabandu bʼomũlĩkĩ basa, kutse eriwa omo katĩkatĩ kʼabandu babĩrĩkwa. Busana nʼebĩ byosĩ erihitana liwe sĩryetalũaho, nʼebyala biwe bĩkĩnayĩsũmbĩre.

⁵Obũlĩge oko Asũrĩa, omũtso wʼerihitana lyage, engonĩ eyiri omo byala biwe ni ʼhitana lyage!

⁶Ngatumalyo oko kihanda kitawite Nyamuhanga, ngatumalyo oko bandu bʼerihitana lyage erĩhũnga eminyego, kandi erihamba obuhiyi, nʼeriryatangirirabo ahisi ngʼolondo lʼomo syonzira.

⁷Nĩkwa sialisonda atya, kutse omutima wuwe sĩalĩganĩraya atya. Nĩkwa kiri omwʼĩyĩsũnza liwe erĩherya, nʼerĩkĩnda ebihanda bingi.

⁸Kusangwa akabũga ati, Abanya-mwami bage bosĩ si bami kwehĩ?

⁹EKalno siri ngʼeKarkemĩsĩ kwehĩ? EHamatĩ siri ngʼeArpadĩ kwehĩ? ESamarĩa siri ngʼeDamaseke kwehĩ?

¹⁰Ngoko ebyala byage byahĩka oko mami wʼesyosanamu, nʼebĩsosekanĩo byabo ebĩbatsĩrwe byabya bibuya kwilaba ebyʼeYerũsalema nʼebyʼeSamarĩa.

¹¹Ngoko nakolera eSamarĩa nʼebĩsosekanĩo byayo, sindiendisyakola nyitya nʼeYerũsalema nʼesyosanamu syayo kwehĩ?

¹²Litya kyasyabya, omugulu Omukama amabĩberererya omũbĩrĩ wuwe gosĩ oko kitwa kyʼeSĩonĩ nʼoko Yerũsalema, nasyasuyira ebĩgũma byʼomutima akalĩre wʼOmwami wʼeAsũrĩa, nʼobubuya bwʼeriyiheka liwe.

¹³Kusangwa abĩrĩbũga ati, Omo maka wʼebyala byage nabirikola ebyo, nʼomo menge wage. Kusangwa nangwite amenge, kandi nabĩrĩlũsya emitano yʼebihanda, kandi nabĩrĩhũnga ebindu byabo, kandi ngʼembangĩ nabĩrĩterya esyondũlanĩ syabo.

¹⁴Ebyala byage mobyasimbirira ebindu byʼebihanda ngʼolutu; kandi ngʼoyukakuma-kuma amayi awabĩrĩsĩganĩbwa, ko nakuma-kuma ekihugo kyosĩ kyo nyitya. Isihali oyo wangasũkya ekĩpũpa, kutse oyukamamula obuno buwe, kutse erilaka.

¹⁵Embasa yasyayipipa ukwʼoyukakonda muyo kwehĩ? Ekisego kyasyayipipa ukwʼoyukakola mukyo kwehĩ? Ekyo kyangabya ngʼengonĩ ĩkasũkaya oyukasumbayo, kutse omũtso owakasumba oyute muti!

¹⁶Busana nʼekyo Omukama, Omwami Mukulu wʼemilondo, asyatuma akabonde omo katĩkatĩ kʼesyombangĩ siwe; nʼomo mwanya wʼolukengerwa luwe omuliro asyaka ngʼeriaka lyʼekirimi kyʼomuliro.

¹⁷Ekyakakala kyʼeĨsraelĩ kyasyabya muliro, nʼoyũbũyĩrĩre wuwe asyabya kirimi kyʼomuliro. Kandi kyasyahwerekererya nʼerisegesula emisakisaki yiwe nʼamahwa wuwe omo kiro kiguma.

¹⁸Kandi asyaherya olukengerwa lʼomũsĩtũ wuwe, nʼolwʼeririma liwe erĩkeraya ebingi, ebibiri byosĩ, omutima nʼomubiri, neryo kyasyabya ngʼomugulu Omũkonĩ akahwerekerera.

¹⁹Emĩsĩgalira yʼemiti yʼomo mũsĩtũ wuwe yasyabya mike omwʼiganzayo, omwana iniatoka erisakayo.

²⁰Neryo oko kiro ekyo, abasĩgalira ba Ĩsraelĩ nʼababala bʼekĩtũnga kya Yakobo, sibendisyaswegemera ukwʼoyo wĩtabo, nĩkwa basyegemera kwenene oko Mwami Mukulu, Oyũbũyĩrĩre wʼeĨsraelĩ.

²¹Abasĩgalira basyasubula, bo basĩgalira ewa Yakobo, uku Nyamuhanga wʼobũtokĩ.

²²Kusangwa nomo abandu bawe iwe Ĩsraelĩ, nomo bali ngʼemisege yʼomo ngetsi, abasĩgalira ba kubo basyasubula. Erihera lyabirisohwa, erĩbwagĩre mwʼeritunganene.

²³Kusangwa Omukama, Omwami Mukulu wʼemilondo, abirisoha erihera kũndũ, asyaberereryalyo, omo katĩkatĩ kʼekihugo kyosĩ.

²⁴Neryo Omukama Omwami Mukulu wʼemilondo, akabũga ati, ĩnywe bandu bage abĩkere eSĩonĩ, simubahe Omũasũrĩa, nomo angakũswĩrya omo ngonĩ, nʼerisumba omũtso wuwe erilwa nawe, ngoko eMĩsĩrĩ yakola.

²⁵Kusangwa hakĩsĩya hake, erihitana lyage ukʼuwe iryahwa, nʼerihitana lyage ĩryaheryabo.

²⁶NʼOmwami Mukulu wʼemilondo asyamũhanganĩrya endwala yʼakabugu, eyiri ngʼerĩkwa lyʼeMĩdĩanĩ oko lĩbwe lyʼeOrebũ, nʼomũtso wuwe asyabya oko ngetsi, kandi asyasumbago ngoko akola eMĩsĩrĩ.

²⁷Kandi oko kiro ekyo, omuheke wuwe asyalũa oko kitigo kyawe, nʼengomo yiwe yasyalũa omo bĩkya byawe, nʼengomo yasyaherĩbwa busana nʼerineneha.

²⁸Abĩrĩhĩka erilwa nʼeAyatĩ, abiritwangana omo Mĩgronĩ. Akabika emiheke yiwe eMĩkĩmashĩ.

²⁹Abiritwangana omo lũbĩka. Babirilalirira eGeba. ERama ikubaha nʼeGĩbea ya Saũlo yasagĩre.

³⁰Uwe mwali wa Galĩmũ, ulake nʼomulenge munene! Muhulikirire, uwe Laĩsĩ nawe muhanya Anatotĩ!

³¹Madĩmena nĩ mũsayĩ. Esyondũlanĩ syʼeGebĩmũ sikatibita ahʼeribalira.

³²Mũnabwĩre akandihangana eNobĩ. Akatsĩnga-tsĩngya ebyala oko kitwa kyʼomwali wa Sĩonĩ, ekitwa kyʼeYerũsalema.

³³Lebaya, Omukama Mwami Mukulu wʼemilondo, asyatwa emitahi nʼerĩkwa lyʼolukanda. Nʼemiri-miri yasyakonderwa ahisi, nʼeyikayiheka yasyakehĩbwa.

³⁴Naye asyatema ebisaka byʼomũsĩtũ omo mbasa yʼekyuma, nʼeLebanonĩ yasyawa busana nʼEmbangĩ.