Read nande Ĩsaya 11 Bible Online

Ĩsaya 11 - nande bible

Ĩsaya 11

¹Neryo erĩsasa lyasyahuluka omo ndĩna ya Yese, nʼomutahi owakalũa omo mĩrĩhĩ yiwe asyabuta ebĩgũma.

²Omũlĩmũ wʼOmwami Mukulu asyamwĩkalako, Omũlĩmũ wʼamenge nʼeriminya, Omũlĩmũ wʼerihana nʼowʼamaka, Omũlĩmũ wʼeriminya nʼowʼeriubaha lyʼOmwami Mukulu.

³Naye asyatsema omo buba bwʼomwami Mukulu, kandi siendisyatswera busana nʼebyo akalolako omo meso wuwe kutse sialisoha busana nʼebyo akowa omo matwĩ wuwe;

⁴nĩkwa omo litunganene asyatswera abera, nʼerisoha ekwenene busana nʼabandu abakagalawa bʼekihugo. Kandi asyĩta ekihugo omo kĩnywa kiwe ngʼengonĩ. Kandi asyĩta ababi omo muka wʼemĩnywa yiwe.

⁵Eritunganene lyasyabya mukoba wʼembindi yiwe, nʼobutalegula bwasyabya mukoba wʼenda yiwe.

⁶Embwa yʼomolĩ yasyĩkala haguma nʼekyana kyʼembũlĩ, nʼekisoro kyasyabundama haguma nʼekyana kyʼembene; nʼekyana kyʼende nʼekyana kyʼendale nʼekĩnenehĩre byasyabya haguma; nʼomwana mulere asyasondolasyo.

⁷Nʼende nʼedubu syasyalya ebiti byo haguma; nʼebyana byasyo byasyabundama haguma, Endale yasyalya ebiti ngʼende.

⁸Omwana oyukonga asyasatira oko busamba bwʼenzwira, nʼomwana oyukatsira amabere asyahĩra ebyala biwe omo kyũna kyʼenzoka.

⁹Sibyendĩsyagalya kutse erĩherya omo kitwa kyage kĩbũyĩrĩre kyosĩ, kusangwa ekihugo kyasyũsũla nʼeriminya lyʼOmwami Mukulu, ngoko amagetsi akabwaga omo ngetsi.

¹⁰Kandi oko kiro ekyo, ebihanda byasyaya oko mwana wa Yese naye asyimana eribya bendera yʼebihanda. Ahʼeriluhukira huwe hasyabya olukengerwa.

¹¹Neryo oko kiro ekyo, Omukama omo byala biwe engendo yʼakabiri, asyaswahamba abasĩgalira bʼabandu buwe, abasyasaka erĩlũa eAsũrĩa, nʼerĩlũa eMĩsĩrĩ, nʼerĩlũa ePatĩ-rosĩ, nʼerĩlũa eKũsĩ, nʼerĩlũa eElamũ, nʼerĩlũa eSĩnarĩ, nʼerĩlũa eHamatĩ, nʼerĩlũa oko bitsira byʼengetsi.

¹²Kandi asyasumbira ebihanda ebendera, asyahĩndanĩa abagusawa ba Ĩsraelĩ, nʼerĩhĩndanĩa haguma abapanza-panzawa ba Yũda erĩlũa oko nũnga ĩnĩ syʼekihugo.

¹³Neryo obũha bwa Efũraĩmũ bwasyalũaho, nʼababendereraya Yũda basyatindwa. Na Efũraĩmũ sĩendĩsyakwa Yũda yʼobũha, na Yũda sĩendĩsyendererya Efũraĩmũ.

¹⁴Kandi basyagulukira obwandagala bwʼAbafĩlĩstĩnĩ oko luhande lwʼeyĩkwa. Basyahũnga haguma abandu bʼoluhande lwʼendata. Basyasĩgalya Edomũ na Moabũ, nʼabana ba Amona basyakengabo.

¹⁵NʼOmwami Mukulu asyaherya ekihande kyʼengetsi yʼeMĩsĩrĩ, nʼomwʼihunga liwe erĩkahĩsaya, asyahũnga-hũngya ebyala biwe oko Lũsĩ Efũratĩ, kandi asyaswĩryalo iniagabalo mo nyũsĩ sirinda, nʼerireka abandu ibasoka ahũmĩre.

¹⁶Enzira nene eyĩkalũa eAsũrĩa yasyabyaho busana nʼabandu buwe abasĩgalira, abasyasaka ngoko habya omo Ĩsraelĩ oko kiro ekyo balũa omo kihugo kyʼeMĩsĩrĩ.