Read nande Ĩsaya 13 Bible Online

Ĩsaya 13 - nande bible

Ĩsaya 13

¹Eriminyerera busana nʼeBabelĩ, eryo Ĩsaya mugala wa Amosĩ alangira.

²Mũhĩre ebendera oko kitwa kite ko kindu, musumbe omulenge busana nabo, mũhũnga-hũngĩrayebo ebyala, bingire omo syongyo syʼabakulu.

³Nabirihana abahigulawa bage, ega, nabiribirikira esyombangĩ syage, abandu bage abakayihalamba erĩberererya erihitana lyage.

⁴Olukanda lwʼomwaga omo bitwa, ngʼolwʼabandu bangi! Omulenge wʼobogo bwʼamami wʼebihanda abahĩndene haguma! Omwami Mukulu wʼemilondo akahĩndanaya omulondo wʼamalwa.

⁵Bakalũa oko kihugo kyʼehali, oko luhande lwʼendũlĩ yʼekyanya, Omwami Mukulu nʼebindu byʼamalwa biwe byʼerihitana liwe, erĩherya ekihugo kyosĩ.

⁶Mulire, kusangwa ekiro kyʼOmwami Mukulu kiri hakũhĩ! Kyasyasa ngʼerĩtogotya kĩkalũa oko Wʼamaka gosĩ.

⁷Neryo ebyala byosĩ byasyogokala, nʼomutima wʼobuli mundu asyasendekerera.

⁸Kandi basyubaha, amagalĩ nʼamalĩge byasyahambabo, basyayinyola nʼamagalĩ ngʼomũkalĩ oyukakunda, basyasamalirana, nʼerisweka, amũsũ wabo iniabiribinduka mo mubano.

⁹Lebaya, ekiro kyʼOmwami Mukulu kĩkahĩka, kĩtsatsũhĩre, omwʼihitana nʼeriagalirwa lĩkalĩre. Eriyira ekihugo mo mulala. Asyatogotya abakola-nabi bakyo bahwe mukyo.

¹⁰Kusangwa esyongũnũnũ syʼekyanya nʼesyondeko syasyo sisyendisyaleta ekyakakala kyasyo; nʼeryuba lyasyakĩna omugulu rikahuluka, nʼomukera asyaleka erĩkolerya lyago.

¹¹Litya nasyasuyira ekihugo busana nʼebibi byakyo, nʼabakola-nabi busana nʼamalolo wabo. Ngandĩhũnerya eriyitendera lyʼabakayiheka, nasyabũndamĩrya ahisi eriyiheka lyʼabatsibu.

¹²Nasyayira omundu wʼerihola mo ndabanika kwilaba esyamagetsi esĩtũkwĩre nʼabandu bosĩ mo ndabanika kwilaba esyamagetsi esĩtũkwĩre syʼeOfĩrĩ.

¹³Neryo nasyatĩtĩmanĩa ekyanya, nʼekihugo kyasyasũkanĩbwa erĩlũa aho wakyo omwʼihitana lyʼOmwami Mukulu wʼemilondo, omo kiro kyʼerihitana liwe erĩkahĩsaya.

¹⁴Neryo kyasyabya ngʼengabi ikahigawa, kandi ngʼesyombũlĩ sitawite mundu oyukakumakumasyo, obuli mundu asyalolya eyiri ekĩtũnga kiwe, nʼobuli mundu asyatibita omo kihugo kiwe.

¹⁵Obuli mundu wasyabanika asyatsimitwa. Obuli mundu oyo wasyahambwa asyawa omo mũyalĩ.

¹⁶Esyomekeke syabo syasyaguswa mo bihande-bihande embere syʼameso wabo. Amanyũmba wabo asyaherĩbwa, nʼabakalĩ babo basyatsandĩbwa.

¹⁷Lebaya, nasyahanganĩa Abamedĩ erilwa nabo, abatendĩsyahĩra obũgũlĩ oko bĩtsĩpa kutse eritsemera esyamagetsi.

¹⁸Nʼamata wabo asyĩta abalwana, kandi sibendisyaganyira abakabutawa; nʼerĩso lyabo siryendisyaganyira abana.

¹⁹NʼeBabelĩ, obubuya bwʼamami, obubuya bwʼeriyiheka lyʼAbakaldea, yasyabya ngʼomugulu Nyamuhanga ahwerekereraya eSodomo nʼeGomora.

²⁰Siyendisyabya mo ndũlanĩ kandi, kandi siyendisyaswĩkalwamo kandi nʼoko ndengo nʼoko ndengo. Kutse Omuharabu siendisyahanda ehema yiwe yoko; kutse, abalĩsya sibendĩsyalĩsĩrya ebihangulo byabo byoko.

²¹Nĩkwa esyonyama syʼomo mbwarara syasyabundamayo, nʼamanyũmba wabo asyũsũla mwʼebĩbũkũlũ. Esyotuhe syasĩkalaho, nʼesyombene syʼomolĩ syasyasatiraho.

²²Esyombĩtĩ syasyalakira omo manyũmba mali-mali wabo, nʼesyoboha omo bikali byabo bibuya. Omugulu wʼeBabelĩ ali hakũhĩ nʼerĩhĩka, nʼebiro byago sibyendisyatomekerwako.