Read nande Ĩsaya 21 Bible Online

Ĩsaya 21 - nande bible

Ĩsaya 21

¹Eriminyerera busana nʼembwarara yʼengetsi. Ngʼehinyabungu hyʼelutambi lwʼeyĩkwa hikalaba, hĩkalũa omo mbwarara, hĩkalũa omo kihugo kyʼerĩũbahya.

²Namakangĩbwa erilota lĩkalĩre, Omũtebya akinakola ebyʼamatebo, nʼOmũherya akĩnaheraya. Hetuka, uwe Elamũ, uwe Medĩa, ugotere. Nabiribuga erĩsĩmba lyosĩ eryo abirituma.

³Busana nʼekyo esyombindi syage syamũsũla mwʼamagalĩ. Amagalĩ amanyihamba ngʼamagalĩ wʼomũkalĩ oyukakunda. Namalemwa, kikaleka indatoka erĩowa, namubaha, kikaleka indatoka erilangira.

⁴Omutima wage akapũka-pũka, obuba bũkanyĩta. Obwĩrĩre obo nasonda-sondaya bwabirinyibindukira mwʼititimana.

⁵Bakasesa emesa, bakasesa olukimba, bakalya, bakapũlaya. Muhangane ĩnywe basondolĩ, mũhĩre amagũta oko ngabo.

⁶Kusangwa Omukama abirimbwira ati, Ũyahĩre omũteya, abũge ebyo akalangira.

⁷Omugulu akalangira abĩkere oko sabayĩrĩ abali oko syosabayĩrĩ abakagenda babiri babiri, omulondo wʼesyopunda, omulondo wʼesyongamia, asyahulikirira kũndũ nʼerĩrebya kutsibu.

⁸Neryo omũteya mwalaka ngʼendale ati, Uwe Mukama, omo musibo nyimene haguma-guma oko nyũmba yʼobũteya, nabĩrĩhĩrwa obuli kiro omo bũteya bwage.

⁹Neryo lebaya, omulondo wʼabandu goyũ akasa, abali oko syosabayĩrĩ bakasa mo babiri babiri. Naye mwasũbĩrya, ati, eBabelĩ yamatera, yamatera. Ebĩsosekanĩo byosĩ ebĩbatsĩre byʼesyonyamuhanga syago byabĩrĩtwĩrwa ahisi!

¹⁰Ĩnywe bandu bage ababĩrĩhũmbwa, nʼabandu bage bʼobũlĩge bʼekĩhũmbĩro kyage! Nabĩrĩbatũlĩra ebyo nowa oko Mwami Mukulu wʼemilondo, Nyamuhanga wa Ĩsraelĩ.

¹¹Eriminyerera lya Dũma. Omundu akinambirikira akalũa eSeĩrĩ ati, Uwe mũteya, nĩ ndambĩ yingahi yʼekiro kwehĩ? Uwe mũteya, nĩ ndambĩ yingahi yʼekiro kwehĩ?

¹²Omũteya mwabũga ati, Bukakya nʼekiro kĩkahĩka nibya. Mwamasonda erĩbũlya, mũbũlaye, mwasyaswasa kandi.

¹³Eriminyerera busana nʼeArabĩa. Omo mũsĩtũ wʼeArabĩa mwasyalalirira Ĩnywe bagendĩ bʼeDedanĩ.

¹⁴Muletere abakwĩre enyota amagetsi; Ĩnywe ndũlanĩ syʼekihugo kyʼeTema, Mũhĩndane nʼabandu abatibita nʼakalyo.

¹⁵Kusangwa basaga emĩyalĩ, emĩyalĩ eyĩkũlĩre, Nʼobuta obũkandĩre, nʼobũhĩga-hĩga bwʼamalwa.

¹⁶Kusangwa Omukama abĩrĩbũga nage ati, Omo mugulu gʼomwaka muguma ngoko mũhĩngĩ akaganza, obubuya bosĩ bwʼeKedarĩ bwasyabulirana.

¹⁷Abasĩgalira bʼemiganzo yʼabakakanda obuta, esyombangĩ syʼabana ba Kedarĩ, basyabya bake, kusangwa Omwami Mukulu Nyamuhanga wa Ĩsraelĩ, abĩrĩbũgakyo.