Read nande Ĩsaya 25 Bible Online

Ĩsaya 25 - nande bible

Ĩsaya 25

¹Uwe Mwami Mukulu, uwe uli Nyamuhanga wage; Ngandĩkũhamya, ngandiha ewasĩngya oko lĩna lyawe; Kusangwa wabirikola emyatsi yʼeriswekera, Erĩyĩsũnza lyategekanĩbawa kera, omo butalegula bũhĩkene,

²Kusangwa wabiriyira omũyĩ mo kilundo, Omũyĩ owakongotere mo kĩma. Ekikali kyʼabagenĩ sikiri mũyĩ kandi, Siendĩsyaswahĩmbwa na kera.

³Busana nʼekyo ekihanda kyʼamaka kyasyakupipa; Emĩyĩ yʼebihanda byʼomwaga yasyakukenga.

⁴Kusangwa wabiribya ahakangatĩre busana nʼabandu abatawite mũwatĩkya, Ahakangatĩre busana nʼowʼobwaga omo bũlĩge buwe, Ahʼerisagira omugulu wʼakanyabungu, Ekyũtsũtsũ omugulu wʼekĩhũhanĩ, Busana nʼomuka wʼabandu bʼomwaga, Ali ngʼekihunga kyʼembũla oko lũhĩmbo.

⁵Ngʼekĩhũhanĩ ahũmĩre Wasyatũlerya olukanda lwʼabandu bʼehandi; Ngʼekĩhũhanl hakũhĩ nʼekyũtsũtsũ kyʼekĩtũ, Olwimbo lwʼabandu bʼomwaga lũkahũnerĩbawa.

⁶Nʼoko kitwa ekĩ Omwami Mukulu wʼemilondo asyakokotya erirya ĩnene ryʼebindu ebĩnũnĩre busana nʼebihanda byosĩ erirya ĩnene ryʼebĩnyũ ebĩkamatĩre, nʼebindu bĩnũnĩre nʼerĩũsũla nʼomungoso, nʼebĩnyũ ebĩkamwĩrwe ndeke ebya kera.

⁷Kandi asyaherya oko kitwa ekĩ ekiswiko ekikaswika ebihanda byosĩ, nʼekĩsũkũlĩryo ekyasesawa endata wʼebihanda byosĩ.

⁸Asyaherya oluholo busana na kera na kera. Omukama Omwami Mukulu asyasangula emĩsonĩa yosĩ oko mũsũ gosĩ, kandi asyalũsya erihemuka lyʼabandu buwe omo kihugo kyosĩ. Kusangwa Omwami Mukulu abĩrĩbũgakyo.

⁹Nʼoko kiro ekyo kyasyabũgwa, kiti, Lebaya, Oyũ yo na Nyamuhanga wetu Oyo twalinda, naye atoke erĩtũlamya. Oyũ yo na Mwami Mukulu; oyo twabiririnda, Tutsange tutseme omo mulamo wuwe.

¹⁰Kusangwa ebyala byʼOmwami Mukulu byasyĩkala oko kitwa ekĩ; nʼeMoabũ yasyalyatangirirwa ahisi aho wuwe, ngʼebiti byũmĩre ebikalyatangirirawa ahisi omo magetsi wʼekyabũ.

¹¹Nomo Moabũ asyasanzula ebyala biwe omo katĩkatĩ kaho, ngʼoyukatsiha akasanza ebyala biwe akatsiha. Nĩkwa Omukama asyabonderya eriyiheka liwe haguma nʼeriteba lyʼebyala biwe.

¹²Nʼahakangatĩre hakalĩre hʼesyombĩmbo syawe asyahĩraho ahisi, erĩkongomereryaho eyĩkwa nʼerĩtereryaho oko kitaka, erĩhĩka omo lũtũtũ.