Read nande Ĩsaya 3 Bible Online

Ĩsaya 3 - nande bible

Ĩsaya 3

¹Kusangwa lebaya, Omukama, Omwami Mukulu wʼemilondo, asyalũsya oko Yerũsalema nʼoko Yũda emberekerero nʼomũtso, emberekerero yosĩ yʼakalyo, nʼemberekerero yosĩ yʼamagetsi,

²nʼembangĩ, nʼomundu wʼamalwa, omũtswerĩ, nʼomũmĩnyererĩ, omũlagũlĩ, nʼomukulu,

³omukulu wʼamakũmĩ atanu, nʼomundu wʼerikengwa, nʼomũhanĩ, nʼomunyima-nyima, nʼoyo wasĩ kutsibu obusaki.

⁴Nasyayira abalwana eribya banya-mwami babo, nʼabana batya-batya basyatabalirabo.

⁵Nʼabandu basyanũbĩbwa, obuli mundu asyanũbya ogundi nʼobuli mundu asyanũbya mũlĩkyabo. Omũlwana asyalwa nʼomukulu, nʼomundu mutya-mutya asyalwa nʼomundu wʼerikengwa.

⁶Omugulu omundu akahamba mugala wabo omo nyũmba ya tata wuwe, ati, Uwe uwite olukimba Wasyabya mũtabalĩ wetu, nʼahasambukere hano hasyabya omo hamũlĩ yawe;

⁷oko kiro ekyo asyatanda omulenge wuwe, ati, Sindiendisyabya mũlamya; kusangwa omo nyũmba yage Simuli kalyo kutse olukimba. Simutolere erinyiyira mo mũtabalĩ wʼabandu.

⁸Kusangwa eYerũsalema yabĩrĩherĩbwa, nʼeYũda yabiriwa, kusangwa olulimi lwabo nʼemĩbĩrĩ yabo nĩ bũyĩgũ oko Mwami Mukulu, erihona embere syʼowʼolukengerwa.

⁹Erisosa lyʼameso wabo lĩkatũlago busana nabo; bakakangaya ebibi byabo ngʼeSodomo, sĩbebĩsabyo. Obũlĩge kubo! Kusangwa babiriyiretera ebibi.

¹⁰Mubwire abatunganene muti, ni mbolere, kusangwa basyalya ebĩgũma byʼemĩbĩrĩ yabo.

¹¹Obũlĩge oko mundu mubi! Kusangwa asyakolwa ngʼebyo ebimutolere.

¹²Ĩnywe bandu bage! Abana bo bakanũbayabo, nʼabakalĩ bakatabalirabo. Ĩnywe bandu bage! abakabasondola bakaleka imwatala, nʼerĩrĩba-lĩbanĩa enzira mukalabamo.

¹³Omwami Mukulu akahangana erilwa, akahangana eritswera abandu.

¹⁴Omwami Mukulu asyatswera abakulu bʼabandu buwe, nʼabanya-mwami babo. Nĩnywe mwalya eririma lyʼebĩnyũ. Eminyego yʼabera iri omo manyũmba wenyũ.

¹⁵Mũtĩkĩ, muti mũkahĩnola abandu bage, nʼerigoga obũsũ bwʼabera kwehĩ? Omukama Omwami Mukulu wʼemilondo atya.

¹⁶Kandi Omwami Mukulu mwabũga ati, Kusangwa bali ba Sĩonĩ bakayiheka, bakagenda nʼebĩkya bireherere nʼameso akayĩtsũtsa, bakalendera bakasata ibanemugenda, nʼerĩhĩnda esyonzoga omo bisando byabo.

¹⁷Neryo Omukama asyahĩra obukoba oko kahũlĩ-hũlĩ kʼemitwe yʼabali bʼeSĩonĩ, nʼOmwami Mukulu asyayira obũsũ bwabo mo ndũmbũ.

¹⁸Oko kiro ekyo, Omukama asyalũsya obukange bwʼamahĩnda wʼehĩkongũlo hyabo, nʼebĩtwĩ, nʼebĩtĩmbĩre ngʼomugenda,

¹⁹nʼesyombũka syʼamatwĩ, nʼemisege yʼoko byala, nʼebiraka,

²⁰nʼebiremba, nʼamahĩnda, nʼemiremba, nʼotũtambya tʼobukwa, nʼendewe,

²¹nʼesyombũka, nʼesyombũka syʼomo nĩndo,

²²nʼesyongimba syʼebiro bikulu nʼesyodebwanĩ, nʼebipahasa, nʼesyongunza syʼesyofranka

²³ebisasamira, nʼomusohe wʼekĩtanĩ, nʼebiremba, nʼebikaswika ameso.

²⁴Neryo kyasyabya omo mwanya wʼebikakumba ndeke hasyabya erihonda, nʼomo mwanya wʼomukoba hasyabya omũlĩkĩ, nʼomo mwanya wʼesyonzwiri sĩrĩngĩre ihabya oluhala, nʼomo mwanya wʼekanzu, hasyabya eriambala emisarandwe. Emyokyo omo mwanya wʼobubuya.

²⁵Abalume bawe basyawa omo mũyalĩ, nʼesyombangĩ syawe syasyakwa omo malwa.

²⁶Nʼesyongyo syasyasũsũmana nʼeririra, nʼerĩsĩganĩbwa asyĩkala ahisi oko kitaka.