Read nande Ĩsaya 38 Bible Online

Ĩsaya 38 - nande bible

Ĩsaya 38

¹Oko biro ebyo Hezekĩa mwalwala endwala yʼerihola. Ĩsaya mugala wa Amosĩ mwamũhĩkako, mwamubwira ati, Omwami Mukulu ati, Ũtegekanaye emyatsi yʼekĩtũnga kyawe, kusangwa ukandihola, siwendisyabyaho.

²Neryo Hezekĩa mwabindulira obũsũ buwe oko lũhĩmbo, mwasaba Omwami Mukulu,

³ati, Ngakulemba-lemba, uwe Mwami Mukulu, Wibuke ngoko nabirilendera embere syawe omo kwenene nʼomo mutima ahĩkene, kandi nabirikola ebibuya omo meso wawe. Neryo Hezekĩa mwalira kutsibu-tsibu.

⁴Neryo ekĩnywa kyʼOmwami Mukulu mokyahĩka uku Ĩsaya, kiti,

⁵Ugende, Ubwire Hezekĩa, uti, Omwami Mukulu Nyamuhanga wa tata wawe Dawĩdĩ ati, Nabĩrĩowa erisaba lyawe, nabirilangira emĩsonĩa yawe. Lebaya, nganditomekera ebiro byawe kwʼemyaka erĩkũmĩ nʼeyĩtanu.

⁶Kandi ngandĩkũlamya nʼomũyĩ oyũ omo byala byʼOmwami wʼeAsũrĩa. Ngandisyalwira omũyĩ oyũ.

⁷Nʼekĩ kyasyabya kiminyikalo ukʼuwe kĩkalũa oko Mwami Mukulu, ngoko Omwami Mukulu asyakola omwatsi ogo abĩrĩbũga.

⁸Lebaya, nasyaleka ekyũtsũtsũ oko bisambiro, ekyabĩrĩkĩma omo lyuba oko bisambiro bya Ahazĩ ikyasyasuba enyũma ebika ĩkũmĩ. Neryo ekyũtsũtsũ kyʼeryuba mokyasuba enyũma ebika ĩkũmĩ oko bisambiro ebyo kyalengerako.

⁹Erisaka lya Hezekĩa omwami wʼeYũda, omugulu abya alwere, iniamabilama oko ndwala yiwe:

¹⁰Monabũga nyiti, omo katĩkatĩ kʼebiro byage, Ngandisyiingira omo syongyo syʼeKũlĩmũ. Nabirikagwa amasĩgalira wʼemyaka yage.

¹¹Monabũga nyiti, Sindiendisyalola oko Mwami Mukulu, Omwami Mukulu omo kihugo kyʼabaliho. Sindiendisyaswalola oko mundu omo syondũlanĩ syʼomo kihugo.

¹²Ngʼehema yʼomũlĩsya ahʼerĩĩkala lyage ryabirikulwa nʼerĩlũsĩbwa ũkwʼĩngye. Nabĩrĩrĩnga engebe yage ngʼomũlũkĩ. Akanyĩtwĩrya hali omo mũlũkĩryo. Erĩtsũka oko musibo nʼerĩhĩka omo kiro ukanyibuga.

¹³Monayibombeka erĩhĩka engyakya. Ngʼendale kwʼĩkabũna amakũha wage gosĩ, Erĩtsũka oko musibo nʼerĩhĩka omo kiro ukanyibuga.

¹⁴Ngʼendambira kutse omũrobĩ, ko ngabũga-bũga nyitya; Monabelekũma ngʼakalĩkũkũ; Ameso wage akalĩtoha nʼeritungerera endata Uwe Mukama, namanũbĩbwa, Unyitonganire.

¹⁵Ngandĩbũgakĩ kwehĩ? Kusangwa abĩrĩbũga nage, kandi iye abirikolakyo. Nasyagalaganda omo myaka yage yosĩ Busana nʼerĩsĩrĩkalira lyʼomutima wage.

¹⁶Uwe Mukama, busana nʼemyatsi eyĩ, abandu bakabyaho. Omwʼebĩ byosĩ muli engebe yʼekĩrĩmũ kyage. Neryo Ũnyĩsũbaye munyagasa, uleke nyibyeho.

¹⁷Lebaya, busana nʼobuholo monabya nʼerĩsĩrĩkalira lingi. Ni we wabiribika omutima wage eritendibya omo buhya bwa busa. Kusangwa wabirigusa ebibi byage byosĩ enyũma syʼomugongo wawe.

¹⁸Kusangwa eKũlĩmũ siyangatoka erikuha ewasĩngya, Oluholo silwangatoka erĩkũkengesya. Abakandagalira omo buhya sibangatoka eriyira amaha busana nʼeritendiregula lyawe.

¹⁹Oyuliho, yukakuha ewasĩngya, Ngoko ngakola mũnabwĩre. Ĩse akabwira bagala buwe eritendiregula lyawe.

²⁰Omwami Mukulu yũkandĩsyandamya, Busana nʼekyo tukandisyawata esyonyimbo syage omo binanga, Ebiro byosĩ byʼeribyaho lyetu omo nyũmba yʼOmwami Mukulu.

²¹Nĩkwa Ĩsaya abya ĩnĩabĩrĩbũga ati, bĩmaye ekitole kyʼebĩgũma byʼomũtĩnĩ, bahĩrekyo oko kihute, iniatoka erilama.

²²Neryo Hezekĩa abya ĩnĩabĩrĩbũga ati, Ekiminyikalo ni kyahi kiti nasyahetukira omo nyũmba yʼOmwami Mukulu kwehĩ?