Read nande Ĩsaya 39 Bible Online

Ĩsaya 39 - nande bible

Ĩsaya 39

¹Oko mugulu oyo Merodakĩ-baladanĩ mugala wa Baladanĩ omwami wʼeBabelĩ, mwatumira Hezekĩa esyobarua nʼolũsũnzo kusangwa ĩnĩamabĩowa kwʼabya alwere, kandi ngoko abirilama.

²Neryo Hezekĩa mwatsemerabo, mwakangyabo enyũmba yosĩ yʼobũsokĩ buwe, ebĩtsĩpa, nʼesyamagetsi, nʼebikasiha ndeke byʼamanũkato nʼamagũta wʼobũgũlĩ bunene, nʼenyũmba yiwe yosĩ yʼebindu byʼamalwa, nʼebyosĩ byabanika omo mbĩso siwe syʼebindu. Mohatabya kindu omo nyũmba yiwe kutse omo bwami buwe, ekyo Hezekĩa atakangayabo.

³Neryo omũmĩnyererĩ Ĩsaya mwahĩka eyiri omwami Hezekĩa, mwamubwira ati, Abalume aba mobakabũgakĩ kwehĩ? Kandi balĩalũahi bakakũhĩkako kwehĩ? Neryo Hezekĩa mwabũga ati, Bakanyĩhĩkako bakalũa omo kihugo kyʼehali eBabelĩ.

⁴Neryo Ĩsaya mwabũga ati, Bamalola ũkũkĩ omo nyũmba yawe kwehĩ? Neryo Hezekĩa mwasũbĩrya ati, Babirilola oko byosĩ ebiri omo nyũmba yage. Sihali kindu omo bũsokĩ bwage ekyo ndetakangyabo.

⁵Neryo Ĩsaya mwabwira Hezekĩa ati, Wowe ekĩnywa kyʼOmwami Mukulu wʼemilondo,

⁶Lebaya, ebiro bikasa, omugulu ebindu byosĩ ebiri omo nyũmba yawe, nʼebyo abotata wawe babya bakabika erĩhĩka mũnabwĩre, byasyahekerwa eBabelĩ. Omwami Mukulu ati, Sihali kindu nʼekiguma ekyasyasĩganĩbwa.

⁷Kandi basyatwala bagala bawe kũndũ, abo ukandisyabuta. Basyahũngwa basyabya omo kikali kyʼOmwami wʼeBabelĩ.

⁸Neryo Hezekĩa mwabwira Ĩsaya ati, Ekĩnywa kyʼOmwami Mukulu ekyo ũlĩabũga ni kibuya. Kusangwa mwanganĩrya ati, Hasyabya Obuholo nʼekwenene omo biro byage.