Read nande Ĩsaya 41 Bible Online

Ĩsaya 41 - nande bible

Ĩsaya 41

¹Ĩnywe emĩsĩke yʼengetsi muhune embere syage muhulikirire, nʼebihanda biyibanire amaka mahya-mahya. Bisegere embere, bĩbũge; tũhĩndane haguma busana nʼeritswera.

²Nindi abĩrĩhanganĩa omundu muguma oyũkalũa eyo eryuba likahuluka, oyukabirikira omo litunganene oko bisando biwe kwehĩ? Akamũkĩndĩra ebihanda embere siwe, akamũtabalaya endata wʼabami. Akahabo babye ngʼolũtũtũ omo mũyalĩ wuwe, ngʼesyombuba sĩkagũlũkĩbawa oko buta buwe.

³Akakwamabo, inialaba buholo omo nzira eyo atalabamo omo bisando biwe.

⁴Nindi abirikola nʼerĩhĩkanĩabyo, eribirikira esyondengo okwʼĩtsũka erĩmbere kwehĩ? Ĩngye, Mwami Mukulu, indi wʼenzũko, haguma nʼowʼendũlĩ. Ĩngye indi ye.

⁵Emĩsĩke yʼengetsi yabirilangira, yabiriubaha. Esyondũlĩ syʼekihugo sikatitimana. Syabirisegera hakũhĩ, syabĩrĩhĩka.

⁶Bĩkawatĩkanaya obuli mundu mũlĩkyabo akabwira mugala wabo ati, Uhande omutima!

⁷Litya omunyima akagongomeraya oyũkatsũhaya, nʼoyũkabandĩkaya nʼenyondo akawatĩkya oyukagotola oko lĩhesero, akahula erigotola ati, Lyowene; neryo akawatayakyo omo mĩsũmalĩ, sikisegere nʼeritenga-tengana.

⁸Nĩkwa uwe Ĩsraelĩ, omugombe wage, Yakobo oyo nayisoga, omwana wa Abrahamũ omwĩra wage,

⁹ĩnywe nahamba oko syondũlĩ syʼekihugo, abo nabirikira oko syondũlĩ syʼehali syakyo, kandi monababwira nyiti, Uwe uli mugombe wage, nabiriyisoga we sinditakugana;

¹⁰Sigubahe, kusangwa indi haguma nawe. Susamalire handi nʼerisweka, kusangwa indi Nyamuhanga wawe. Ngandikuha amaka, kwenene ngandĩkũwatĩkya, kwenene ngandikuwatirira omo byala byʼamali byʼeritunganene lyage.

¹¹Lebaya, abosĩ abakuhitanako basyahemulwa nʼerĩsĩngwa. Abakalwa nawe basyabya busa, kandi basyahera.

¹²Mwasyasonda-sonda, abakanegena nenyũ isimwendisyabanabo. Abakalwa nenyũ basyabya buyira, isibaliho.

¹³Kusangwa ĩngye indi Mwami Mukulu, Nyamuhanga wenyũ, oyukakuwatirira omo byala byawe byʼamali, oyukakubwira ati, Sigubahe, ngandĩkũwatĩkya.

¹⁴Sigubahe, uwe kihanda kya Yakobo, uwe munyole, nenyũ abalume ba Ĩsraelĩ simubahe. Omwami Mukulu ati, Ngandĩkũwatĩkya, nʼomũtongolya wawe, Oyũbũyĩrĩre wa Ĩsraelĩ.

¹⁵Lebaya, nabirikuyira mo muhamba muhya-muhya wʼerigesa owawite amoya abiri. Wasyahũmba ebitwa, nʼerĩnoyabyo, kandi wasyayira ehitwa ngʼomusunga.

¹⁶Wasyagũlũkyabyo, nʼerihunga lyasyahekabyo, nʼakanyabungu kasyapanza-panzabyo. Nawe wasyatsemera Omwami Mukulu, wasyayihalamba ũmwʼOyũbũyĩrĩre wa Ĩsraelĩ.

¹⁷Abera nʼabʼobwaga bakasondaya amagetsi, nago siali, nʼolulimi lwabo lukuma busana nʼenyota. Ĩngye Mwami Mukulu nasyasũbĩryabo, ĩngye Nyamuhanga wʼeĨsraelĩ, sĩndĩendĩsyasĩgabo.

¹⁸Nasyalĩbũla esyonyũsĩ oko bitwa ebite ko biti, nʼesĩsoko omo katĩkatĩ kʼemisya. Nasyayira embwarara mo kitsinga kyʼamagetsi, nʼekitaka kyũmĩre mwʼesĩsoko syʼamagetsi.

¹⁹Nasyahĩra omwʼirungu omuti wʼomũerezĩ, nʼomũsĩta, nʼomuhadasĩ, nʼomuti wʼolubono. Kandi nasyahĩra omo mbwarara ekĩlagũ nʼomugabi.

²⁰Batoke erilangira, nʼeriminya, nʼerĩrengekanĩa, nʼeribana amenge nibya ngoko ebyala byʼOmwami Mukulu byabirikola ekĩ, Nʼoyũbũyĩrĩre wa Ĩsraelĩ yo wahangikakyo.

²¹Omwami Mukulu ati, Mũtũle omwatsi wenyũ. Omwami wa Yakobo ati, Mũhũlũkaye obuhaka bwenyũ bũkalĩre.

²²Bahũlũkayebyo, kandi batũtũlĩre ebyo ebikandisyabya. Mũtũle emyatsi yʼerĩmbere, nga yabya yahi, itwatoka erĩrengekanĩayo, nʼeriminya endũlĩ yayo, kutse mũtũkangaye emyatsi eyikandisyasa.

²³Mũtũle emyatsi eyikandisyasa enyũma, itwatoka eriminya ko muli esyonyamuhanga. Ega, mukole ekibuya kutse ekibi, itwatoka netu erisamalira nʼerisweka nʼeriubaha haguma.

²⁴Mũlebaye, muli buyira, nʼemĩbĩrĩ yenyũ si kindu. Nʼoyukayisoga nywe ni wʼesyonye.

²⁵Nabĩrĩhanganĩa omuguma akalũa elutambi lwʼendata, kandi abiriasa. Aho eryuba likasira asyalakira erĩna lyage. Kandi asyasa oko batabalĩ ngʼakalaba oko londo, ngʼomũbũmbĩ akalyatangirira eribumba.

²⁶Nindi oyo wabĩrĩtũlago okwʼĩtsũka lyʼerĩmbere, itwatoka eriminya kwehĩ? Kutse oyo wabũga oko migulu ya kera, itwatoka erĩbũga tuti, Iye ni kwenene. Ega, sihabya oyo watũlago, ega, kwenene. Ega, sihabya oyo wakanganaya, ega kwenene sihabya oyo wakanganaya, ega kwenene sihabya oyo wowa ebĩnywa byenyũ.

²⁷Erĩmbere monabwira Sĩonĩ, nyiti, Lebaya, hano ho bali. Kandi monabwira eYerũsalema nyiti, Nasyaha omukwenda wʼengulu yowene.

²⁸Nĩkwa omugulu ngasamalira, isihali mundu, nʼomo katĩkatĩ kabo sihali mũhanĩ oyo nangabũlya, oyo wangatoka erĩsũbĩrya ekĩnywa.

²⁹Lebaya, abosĩ ba kubo ni bʼamabehĩ. Emĩbĩrĩ yabo siri na mugaso, esyosanamu syabo syʼerĩnyenyetya ni hunga nʼekĩhũlũ-hũlũ.