Read nande Ĩsaya 43 Bible Online

Ĩsaya 43 - nande bible

Ĩsaya 43

¹Nĩkwa lino Omwami Mukulu, oyo wakuhangika ati, uwe Yakobo, nʼoyo wakubumba, uwe Ĩsraelĩ ati: Sigubahe, kusangwa nabĩrĩkũtongolya. Nabirikubirikira omo lĩna lyawe. Uli wage!

²Omugulu ukalaba omo magetsi, nasyabya haguma nawe, nʼerilaba omo syonyũsĩ, sisyendisyakubwayirako. Omugulu ukalaba omo muliro siwendisyahya, kutse ekirimi kyʼomuliro sĩkyendĩsyakũhĩsya.

³Kusangwa ĩngye indi Mwami Mukulu Nyamuhanga wawe, Oyũbũyĩrĩre wa Ĩsraelĩ, Omũlamya wawe. Nabiriha eMĩsĩrĩ eribya endongolya yawe, nʼeEtĩopĩa nʼeSeba omo mwanya wawe.

⁴Kusangwa uli wʼobũgũlĩ bunene omo meso wage, kusangwa wabĩrĩsĩkĩbwa, kandi nabirikwanza, busana nʼekĩ nasyaha abandi bandu omo mwanya wawe, nʼebindi bihanda busana nʼerĩhĩnganĩa engebe yawe.

⁵Sigubahe, kusangwa indi haguma nawe. Nasyaleta abana bawe erĩlũa eyo eryuba likahuluka, kandi nasyakũhĩndanĩa eyo eryuba likalengera.

⁶Nasyabwira elutambi lwʼendata nyiti, Hũlũkayabo! Olundi lutambi lwʼeyĩkwa nyiti, Sũkakĩrayebo. Mulete abagala bage erĩlũa ehali, nʼabali bage, erĩlũa oko ndũlĩ yʼekihugo,

⁷obuli mundu oyukahulawa omo lĩna lyage, nʼoyo nabirihangika busana nʼolukengerwa lwage, oyo nahangika, yo nʼoyo nabiribumba.

⁸Mũhũlũkaye esyondĩmatĩme nomo banawite ameso, nʼabatsiha nomo banawite amatwĩ.

⁹Ebihanda byosĩ bĩhĩndane haguma, abandu batoke erĩhĩndana haguma. Nindi omo katĩkatĩ kabo angatoka erĩtũla ekĩ, nʼerĩtũkangya emyatsi yʼerĩmbere kwehĩ? Balete abatũlĩ babo bʼomwatsi ibatoka erĩsĩngana, kutse bowe, babũge bati, Ni kwenene.

¹⁰Omwami Mukulu ati, Ĩnywe muli balangĩrĩ bage, nʼomugombe wage oyo nabiriyisoga, imwatoka eriminya nʼerĩnyĩkĩrĩrya, nʼeriminya kwʼindi ye. Embere syage sihahangikawa Nyamuhanga, kutse enyũma wage sihendisyabya nʼomuguma.

¹¹Ĩngye, nĩna ngye, indi Mwami Mukulu. Kandi butsira ngye sihali omũlamya.

¹²Nĩ ngye nabĩrĩtũlago, kandi nabĩrĩlamya, kandi nabĩrĩkanganĩa. Kandi sihabya nyamuhanga wʼehandi omo katĩkatĩ kenyũ. Busana nʼekyo muli balangĩrĩ bage, Omwami Mukulu atya, Ĩngye indi Nyamuhanga.

¹³Ega okwʼĩtsũka lyʼebiro ĩngye indi ye. Kandi sihali oyo wangatoka erĩlamya omo byala byage. Ngakola, nindi wasyabindulakyo kwehĩ?

¹⁴Omwami Mukulu, Omũtongolya wenyũ, Oyũbũyĩrĩre wʼeĨsraelĩ ati, Busana nenyũ nabiritumira eBabelĩ, kandi nasyandagalĩryabo abosĩ ngʼabasayĩ, ibo Abakaldea, omo mato wabo bakatsemera.

¹⁵Ĩngye indi Mwami Mukulu Oyũbũyĩrĩre wenyũ, Omũhangĩkĩ wa Ĩsraelĩ, Omwami wenyũ.

¹⁶Omwami Mukulu atya, oyũkahĩra enzira omo ngetsi, nʼembalu omo magetsi awali nʼamaka,

¹⁷oyũkahũlũkaya egalĩ nʼesabayĩrĩ, omulondo wʼabasĩrĩkanĩ nʼembangĩ. Basyagotsera ahisi haguma, sibendisyaswahangana. Bamahwerekerera, babĩrĩrĩma ngʼembũmba.

¹⁸Simwibuke emyatsi yʼerĩmbere, kutse erĩganĩrya emyatsi ya kera.

¹⁹Lebaya, ngandikola omwatsi muhya-muhya. Lino asyahuluka nenyũ simwendisyaminyago kwehĩ? Nasyahĩra enzira omo mbwarara, nʼesyonyũsĩ omo lukurutsu.

²⁰Esyonyama syʼomwʼirungu syasyanyĩsĩkya, esyoboha nʼetuhe. Kusangwa ngahasyo amagetsi omo lukurutsu, nʼesyonyũsĩ omo mbwarara, erĩnywĩsya abandu bage, abayisogawa bage.

²¹Abandu abo nayihangikira, basyabũga eripipa lyage.

²²Nĩkwa uwe Yakobo, Sulitanyilakira; nĩkwa uwe Ĩsraelĩ wabiriluha busana nage.

²³Simulitanyiretera esyombũlĩ syʼamahere wenyũ wʼerĩokererya, kutse momũtanyĩsĩkya omwʼihonga lyenyũ, sinditakũlĩtohya omo mahere kutse sinditakũlũhya omo bukwa obukakumba ndeke.

²⁴Sulitanyigulira ebĩsĩhĩre oko franka, kutse sũlĩtanyũgũtya omo bĩsabũ byʼamahere wawe. Nĩkwa mwabĩrĩnyĩrĩtohya omo bibi byenyũ, mwabĩrĩnyĩlũhya omo malolo wenyũ.

²⁵Ĩngye, nĩna ngye, oyukasangula ebibi byenyũ busana nage ĩngyowene. Kandi sindiendisyibuka ebibi byawe.

²⁶Mũnyĩbũkaye. Tũkanĩranaye haguma. Mũtũle omwatsi wenyũ mutoke erĩsĩngana.

²⁷Tata wawe wʼerĩmbere mwahalya, nʼesyombũyĩ syenyũ babĩrĩnyĩhalyako.

²⁸Busana nʼekyo ngandĩsyatsandya abanya-mwami bʼahabũyĩrĩre, nasyayira Yakobo mwʼitakira, na Ĩsraelĩ mo kĩtsũmĩ.