Read nande Ĩsaya 44 Bible Online

Ĩsaya 44 - nande bible

Ĩsaya 44

¹Nĩkwa lino uwe Yakobo, omugombe wage uhulikirire lino, na Ĩsraelĩ, oyo nayisoga.

²Omwami Mukulu oyo wakuhangika nʼerikubumba omo nda, oyo wasyakũwatĩkya ati, Sigubahe, uwe Yakobo omugombe wage, nawe Yesũrũnĩ, oyo nayisoga.

³Kusangwa nasyũtũlĩra amagetsi ũkwʼoyũkwĩre enyota, nʼesyonyũsĩ oko kitaka kyũmĩre. Nasyũtũlĩra Omũlĩmũ wage oko bana bawe, nʼeritsumula lyage oko bitsikulu bawe.

⁴Basyalasa omo katĩkatĩ kʼebiti, ngʼamabondo oko migende yʼamagetsi.

⁵Oyũ asyabũga ati, Indi wʼOmwami Mukulu; nʼogundi iniayahula omo lĩna lya Yakobo; nʼogundi iniasaka oko byala biwe ati, Indi wʼOmwami Mukulu, iniahula erĩna lya Ĩsraelĩ nʼerĩsĩkya.

⁶Omwami Mukulu, Omwami wa Ĩsraelĩ, nʼomũtongolya wuwe, Omwami Mukulu wʼemilondo ati, Ĩngye indi wʼerĩmbere, kandi indi wʼendũlĩ. Kandi sihali Nyamuhanga ate ngye.

⁷Kandi nindi, ali nga ngye? Abũge, nʼerĩtũlago, ega, atondekego busana nage, erĩtsũka omugulu nahanganaya ekihanda kya kera. Kandi bakanganayebo emyatsi eyo eyikasa, nʼemĩbĩrĩ eyikandisyasa batũleyo.

⁸Simutitimane simubahe. Mondakubwira kera, nʼerĩkũkangyago kwehĩ? Kandi ĩnywe muli balangĩrĩ bage. Hali Nyamuhanga ate ĩngye kwehĩ? kutse hali erindi Rĩbwe kwehĩ? Sĩnyasĩ nʼeriguma.

⁹Abandu abakabatsa esanamu eyikabatsawa abosĩ ni buyira; nʼemyatsi yabo eyo yʼobũgũlĩ bunene siyendisyaha ndũndĩ. Nʼabalangĩrĩ babo sibelangira kutse eriminya, neryo basyahemulwa.

¹⁰Nindi yo wakokotaya nyamuhanga, kutse oyo wanũnaya esanamu butsira ndũndĩ kwehĩ?

¹¹Lebaya, abalĩkyabo abosĩ basyahemulwa, kusangwa abanyima-nyima nabo ni bandu. Bahĩndane haguma abosĩ, bahangane, batitimane, bahemulawe haguma.

¹²Omũhesĩ akahesa ebyuma mo kindu ekĩkatwa, akakola omũbĩrĩ wuwe omo makala, akategekanayakyo omo nyondo, iniahesakyo omo kuboko kuwe kwʼamaka. Akakwa enzala nibya, nʼamaka wuwe iniabula. Sĩalĩpũlaya amagetsi neryo inialuha.

¹³Ogundi mundu akabatsa omuti akasanza olukoba lwʼerirengako. Iniasakakyo omo kalamu kʼengula. Ĩnĩategekanĩago omo mbatso, akasaka kukyo omo hyuma hyʼolulengo, kandi ĩnĩategekanĩago omo kĩsosekanĩo kyʼomundu omo bubuya bwʼomundu ikyatoka erĩĩkala omo nyũmba.

¹⁴Akayikondera emĩerezĩ, akahamba omuti wʼomũtĩrĩza nʼomwalo, akakũlayago busana naye omo katĩkatĩ kʼemiti yʼomo mũsĩtũ. Akahera ekĩlagũ, nʼembũla ĩkalasayakyo.

¹⁵Neryo kikabya busana nʼomundu eriotakyo. Akaheka olũkwĩ busana nʼeriota. Kandi akakaya omuliro busana nʼeritsumba obundu. Kandi akabatsa enyamuhanga ĩnĩaramyayo. Akayirakyo mo sanamu eyikabatsawa ĩnĩakũkamirayo.

¹⁶Akahĩsaya oluhande lwakyo omo muliro. Omo luhande olo akalya akalyo omugulu akokaya esĩswĩ, ĩnĩũgũta. Kandi akayotereraya, ĩnĩabũga ati, A-a, namahũha, nabirilola oko muliro.

¹⁷Ekihande ekikasaka akayirakyo mo nyamuhanga, esanamu yiwe eyabatsawa. Akawa embere wayo nʼerĩramya, kandi iniakasabayo, ati, Ũnyĩlamaye; kusangwa uli nyamuhanga wage.

¹⁸Sĩbasĩ, kutse sĩbeganĩraya, kusangwa abĩrĩhakabya ameso wabo, syatoke erilangira, nʼemitima yabo sibatoke eriminya.

¹⁹Kandi sihali oyukibuka, kutse sihali amenge kutse erĩganĩrya erĩbũga ati, Namokya oluhande omo muliro, kandi namokya obundu oko makala wayo nibya. Ngokaya esĩswĩ ngalyasyo. Neryo ekyasĩgala kyayo ngayirakyo mo nye, ngũnama ahisi embere wʼekĩsĩkĩ kyʼomuti!

²⁰Akalya erĩbũ. Omutima owatebĩbawa abĩrĩmũkĩtĩrya emũsĩke. Kandi siangatoka erĩyĩlamya, kutse erĩbũga ati, Amabehĩ siali omo byala byage byʼamali kwehĩ?

²¹Uwe Yakobo, Ĩsraelĩ, Wibuke emyatsi eyĩ, kusangwa uli mugombe wage. Nabirikubumba. Uli mugombe wage. Uwe Ĩsraelĩ, sindiendisyakwibirirwa.

²²Nabirisangula ebibi byawe ngʼekĩtũ kinene, nʼamalolo wawe ngʼobuheha bũlĩtohĩre. Unyisubeko, kusangwa nabĩrĩkũtongolya.

²³Mũte obogo nʼobutseme ĩnywe matũkũ, kusangwa Omwami Mukulu abirikolakyo! Mũte obogo nʼobutseme, ĩnywe bihande byʼeyĩkwa wʼekihugo, Mũhũlũkaye obogo bʼobutseme, ĩnywe bitwa, Uwe mũsĩtũ nʼobuli muti mugo, Kusangwa Omwami Mukulu abĩrĩtongolya Yakobo, Akakangaya olukengerwa luwe umu Ĩsraelĩ.

²⁴Omwami Mukulu, Omũtongolya wawe, nʼoyo wakubumba omo nda ati, Ĩngye, Mwami Mukulu, indi mũhangĩkĩ wʼebindu byosĩ, ĩngye ngabamba amatũkũ ĩngyowene, ĩngye ngasanza ekihugo ĩngyowene.

²⁵Ngaleka ebiminyikalo byʼabandu abakayihalamba ibyabya busa, nʼeriyira abalagũlĩ mo bakĩrũ, ngaleka abandu bʼamenge erisuba enyũma, nʼeribindula amenge wabo mo bũkĩrũ,

²⁶ĩngahanganaya ekĩnywa kyʼomugombe wawe, nʼerĩberererya erĩyĩsũnza lyʼabakwenda buwe. Nĩ ngye ngahula eYerũsalema nyiti, Asyĩkalwamo! Na busana nʼemĩyĩ ya Yũda nyiti, Yasyahĩmbwa. Kandi nasyaswahanganĩa omulala wayo.

²⁷Nĩ ngye ngabwira emirindi yʼengetsi nyiti, Mume, kandi nasyũmya esyonyũsĩ syawe.

²⁸Nĩ ngye ngahula Kĩro, nyiti, Nĩ mũlĩsya wage! Asyaberererya ebyosĩ ebĩkanyĩtsemesaya. Nʼeriahula eYerũsalema ati, Asyahĩmbwa; na busana nʼehekalũ ati, Ekibanza kyawe kyasyahalwa.