Read nande Ĩsaya 45 Bible Online

Ĩsaya 45 - nande bible

Ĩsaya 45

¹Omwami Mukulu akabwira oyo ayisoga, ye Kĩro ati, Nabiriwata oko byala biwe byʼamali, erĩkĩnda ebihanda embere siwe, nʼerĩlũsya amaka wʼabami, erikingula esyonyũyĩ embere siwe, neryo esyongyo sisiendisyakingwa.

²Nasyagenda embere syawe, nʼerĩtenderya ahakũrũmbũkĩre. Nasyabũnanga mo bitswe-bitswe esyonyũyĩ syʼemiringa, nʼerĩtwa esyongomo syabo syʼebyuma.

³Kandi nasyakuha obuteke bʼomwĩrĩmya, nʼobuteke bwʼomwanya abĩsamĩre, iwatoka eriminya kwʼindi nĩna ngye, Mwami Mukulu, elĩ oyukakubirikira omo lĩna lyawe.

⁴Busana na Yakobo omugombe wage, na busana na Ĩsraelĩ oyo wayisogawa wage, nabirikubirikira omo lĩna lyawe nibya, nabirikuha erĩna lyʼerĩsĩkĩbwa, nomo wangabya ĩsũnyasĩ.

⁵Ĩngye indi Mwami Mukulu, sihali gundi. Butsira ngye sihali Nyamuhanga. Nasyakwambalya ebindu byʼamalwa, nomo wangabya ũtanyasĩ.

⁶Abandu batoke eriminya erĩtsũka okwʼihuluka lyʼeryuba, nʼerĩhĩka okwʼirenga lyalyo, ko hate ogundi ate nĩ ngye. Ĩngye indi Mwami Mukulu, sihali gundi.

⁷Ĩngye yo yukayira ekyakakala, kandi ngahangika omwĩrĩmya. Ngahĩra Obuholo, nʼerihangika erĩkwa. Ĩngye indi Mwami Mukulu, oyukakola emyatsi yosĩ eyĩ.

⁸Ĩnywe matũkũ, mũwĩsaye, endata eyo, Nʼebĩtũ byũte ekitunganene. Ekihugo kibohokale, nʼerilama libute ebĩgũma, Kandi ekitunganene kilase haguma nakyo. Ĩngye Mwami Mukulu, nabirihangikakyo.

⁹Obũlĩge ukwʼoyũ kalwa nʼOmũhangĩkĩ wuwe—enyungu yʼeribumba omo katĩkatĩ kʼesyonyungu syʼekihugo! Eribumba lyasyabwira omũbũmbĩ liti, Ukakolakĩ kwehĩ? Kutse ekindu ũkakokotaya kyasyabũga kiti, Siawite byala kwehĩ?

¹⁰Obũlĩge ukwʼoyukabwira tata wuwe ati, Uli ĩse wandi kwehĩ? Kutse uku nyĩnya wuwe ati, Ukabutakĩ kwehĩ?

¹¹Omwami Mukulu akabũga atya Oyũbũyĩrĩre wa Ĩsraelĩ, nʼOmũhangĩkĩ wuwe ati, Ũnyĩbũlaye busana nʼemyatsi eyikandisyasa, busana nʼabagala bage, nawe wasyanyĩhĩra kwʼemĩbĩrĩ yʼebyala byage.

¹²Nabiribumba ekihugo, kandi nabirihangika omundu yo kukyo. Ĩngye, omo byala byage nabiribamba ekyanya, kandi monahamula emilondo yakyo yosĩ.

¹³Nabĩrĩmũhanganĩa omo lituganene, kandi nasyatenderya esyonzira siwe syosĩ. Asyahĩmba omũyĩ wage, kandi nʼeribohola abasayĩ bage butsira eririha kutse luhembo, Omwami Mukulu wʼemilondo atya.

¹⁴Omwami Mukulu ati, Omũbĩrĩ wʼeMĩsĩrĩ, nʼerĩtũndya lyʼeEtĩopĩa, nʼAbanya Saba, abandu bali-bali, basyakusokera basyabya bawe. Basyakukwamirira enyũma, basyasoka omo mahulula kandi basyayũnamya embere syawe. Basyakulakira bati, Kwenene, Nyamuhanga ali haguma nawe, sihali gundi, sihali gundi Nyamuhanga.

¹⁵Kwenene uli Nyamuhanga oyũkayĩbĩsa, uwe Nyamuhanga wa Ĩsraelĩ, Omũlamya!

¹⁶Basyahemulwa, ega basyasĩngwa, abosĩ ba kubo. Abahesĩ bʼesyosanamu basyagenda haguma omo sĩsonĩ.

¹⁷Ĩsraelĩ abĩrĩlamĩbwa nʼOmwami Mukulu nʼerilama lya kera na kera. Ĩnywe simwendisyahemulwa kutse erĩsĩngwa na kera na kera.

¹⁸Omwami Mukulu oyo wahangika olubula. Iye ni Nyamuhanga oyo wabumba ekihugo, nʼerihangikakyo mwahanganĩakyo, mwatahangikakyo eribya mulala, mwabumbakyo kyĩkalawemo ati, Ĩngye indi Mwami Mukulu sihali gundi.

¹⁹Sĩndĩtabũga bũbĩso-bĩso omo kihugo kyʼomwĩrĩmya. Sinditabwira abana ba Yakobo, nyiti, Mũnyĩsonda-sondaye omo mulala. Ĩngye, Mwami Mukulu, ngabũga ekitunganene, ngatũla emyatsi eyitunganene.

²⁰Mũyĩhĩndanaye mwase. Musegere hakũhĩ haguma, ĩnywe basayĩ bʼebihanda. Abakaheka esanamu yabo yʼomuti, nʼerisaba nyamuhanga oyute wangalamya, sibawite amenge.

²¹Mũtũlego, mũhũlũkaye omwatsi wenyũ. Ega, baye mbĩta haguma. Nindi wakanganaya ekĩ okwʼĩtsũka omugulu wa kera kwehĩ? Nindi watũlago kera kwehĩ? Sĩ ngye, Mwami Mukulu kwehĩ? Kandi sihali gundi Nyamuhanga ate ngye, Nyamuhanga wʼeritunganene nʼomũlamya. Sihali gundi ate ngye.

²²Munyikebere, mũlamĩbawe, ĩnywe ndũlĩ syosĩ syʼekihugo, kusangwa ĩngye indi Nyamuhanga, kandi sihali gundi.

²³Nabĩrĩyĩlahĩryako, ekĩnywa kyabirihuluka kĩkalũa omo buno bwage omo litunganene, sĩkyendĩsyabũnũkala, kiti, Obuli mundu asyakũkama embere syage, erinyikenga nʼobuli mundu asyalahĩrya erikenga.

²⁴Basyanyahula bati, Omo Mwami Mukulu musa muli eritunganene nʼamaka. Abandu basyamwasirako, nʼabosĩ bamuhitanako basyahemulwa.

²⁵Omo Mwami Mukulu abana bosĩ ba Ĩsraelĩ basyabana erĩbanza libuya, nʼeriyihalamba.