Read nande Ĩsaya 46 Bible Online

Ĩsaya 46 - nande bible

Ĩsaya 46

¹Balĩ akayilambika ahisi, Nebo akũnama. Esyosanamu syabo siri oko syonyama nʼoko syonde. Ebindu ebyo mukaheka bĩrĩtohĩre, ni muheke busana nʼenyama eyĩlũhĩre.

²Bakũnama, bakũnama ahisi haguma. Mobatatoka erĩlamya omuheke, nĩkwa mobaya omo bunyegwa.

³Ĩnywe kĩtũnga kya Yakobo, munyihulikirire, nenyũ abasĩgalira bosĩ bʼekĩtũnga kya Ĩsraelĩ, ĩnywe nabiribaheka erĩtsũka okwʼibutwa lyenyũ, kandi mwabirihekwa erĩtsũka omo nda.

⁴Nʼerĩhĩka okwʼikula lyenyũ ĩngye nasyabya nyitya, kandi erĩhĩka oko mbwĩ syenyũ nasyabaheka! Nabirikolakyo, kandi nasyabaheka, nasyabaheka, nasyabalamya.

⁵Mukandisyanyĩsosekanĩa nandi, nʼerĩnyĩrĩngĩrĩranĩa, nʼerinyirenga haguma nandi, itwasosana kwehĩ?

⁶Abakahũlũkaya esyamagetsi syʼomo ngunza nʼerirenga ebĩtsĩpa omo lulengo lwʼekĩlo, bakabirikira omũhesĩ wʼesyamagetsi, naye iniahesasyo mo nyamuhanga. Bakũnama nʼerĩramyasyo.

⁷Bakaheka oko kitigo, bakahekasyo, bakasingikasyo aho wasyo, nasyo sikahanganaho, sĩsĩrĩlũa aho wasyo. Ega, nomo mundu angalakirasyo, sĩsyangamũsũbĩrya. Na sisyetoka erĩmũlamya omo bũlĩge buwe.

⁸Mwibuke ekĩ, mũsĩkaye emitima, mũyĩbũkayebyo kandi omo bũlengekanĩa, ĩnywe mũkahalaya.

⁹Mũyĩbũkaye emyatsi yʼerĩmbere eya kera. Kusangwa ĩngye indi Nyamuhanga, sihali gundi. Ĩngye Nyamuhanga, kandi sihali gundi nga ngye.

¹⁰Erĩtũla ebyʼendũlĩ inandi oko nzũko, nʼerĩtsũka oko migulu ya kera erĩtũla emyatsi eyite yakolwa. Nyiti, Erĩyĩsũnza lyage lyasyahangana, kandi nasyaberererya ebyosĩ ebĩkanyĩtsemesaya.

¹¹Ngabirikira akasara kakalũa eyo eryuba likasira, omundu wʼerĩyĩsũnza lyage akalũa omo kihugo mo hali. Kwenene nabĩrĩbũga, kwenene nasyaberereryakyo. Nabirikikandayirira, kwenene nasyakolakyo nibya.

¹²Munyihulikirire, ĩnywe bʼemitima mitsibu, ĩnywe muli hali oko litunganene.

¹³Ngaleta eritunganene ryage hakũhĩ, siriri hali. Omulamo wage siendisyamala. Kandi nasyaha omulamo eSĩonĩ, nʼolukengerwa lwage busana na Ĩsraelĩ.