Read nande Ĩsaya 48 Bible Online

Ĩsaya 48 - nande bible

Ĩsaya 48

¹Uwe nyũmba ya Yakobo, uhulikirire ekĩ, ĩnywe mukahulawa omo lĩna lya Ĩsraelĩ, ĩnywe mwalũa omo kihanda kya Yũda; ĩmũkalahĩraya oko lĩna lyʼOmwami Mukulu, nʼerimwahula mo Nyamuhanga wa Ĩsraelĩ, nĩkwa butsira omo kwenene, kutse omo litunganene.

²Kusangwa bakayahula abʼomũyĩ abũyĩrĩre, bakasegemera Nyamuhanga wa Ĩsraelĩ. Omwami Mukulu wʼemilondo lyo lĩna liwe.

³Nabĩrĩtũla emyatsi yʼerĩmbere erĩtsũka kera, moyahuluka omo buno bwage, nage monakanganĩayo. Monakola lũba-lũba, neryo mobyabererera.

⁴Kusangwa nyasĩ ngoko Ũkalĩre, nʼebĩkya byawe nĩ mũsĩsa wʼekyuma, nʼembũmo yawe ni mulinga.

⁵Busana nʼekyo nabĩrĩkũtũlĩrago erĩtsũka kera, monakũkangyago isiali abererera, ũkasyabũga uti, Esanamu yage yo yakolabyo, nʼesanamu yage yʼeribatswa, nʼesanamu yage yʼerĩnũnĩa, syo syahanabyo.

⁶Wabĩrĩowakyo. Usamalire ebĩ byosĩ. Nenyũ, sĩmwendĩsyatũlago kwehĩ? Ngabakangaya emyatsi mihya-mihya erĩtsũka omugulu ono, emyatsi eyĩbĩsamĩre, eyo utabya wasĩ.

⁷Byamahangikwa lino butsira kera. Embere wa mũnabwĩre mũtowabyo, ũkasyabũga uti, Lebaya, nanabya nyasĩbyo.

⁸Sũlĩtowago. Sulitaminya. Nʼerĩtsũka kera okũtũ kwawe mokutahundukala. Kusangwa nabya nyasĩ kʼukanditeba, kandi ko wahulawa mo mundu wʼerihona erĩtsũka omo nda.

⁹Busana nʼerĩna lyage ngamalaya erihitana lyage, kandi busana nʼeripipa lyage ngakakĩrĩrayalyo busana nawe, isinangakũtĩnda iguma.

¹⁰Lebaya, nabĩrĩkwerya, nĩkwa butsira ngʼebĩtsĩpa. Monayisoga we omwʼirunga lyʼobũlĩge.

¹¹Busana nage ĩngyowene, busana nage ĩngyowene, nasyakolago. Kusangwa erĩna lyage lĩkatsandĩbawa liti kwehĩ? Olukengerwa lwage sindiendisyahalo uku gundi.

¹²Uwe Yakobo na Ĩsraelĩ oyo nabirikira, munyihulikirire. Ĩngye indi ye; ĩngye indi wʼerĩtsũka, ĩngye indi wʼendũlĩ nibya.

¹³Kwenene ebyala byage byo byahĩra ekibanza kyʼekihugo, nʼebyala byage byʼamali byo byabamba olubula. Omugulu ngabirikira kubyo, bikahanganira iguma.

¹⁴Ĩnywe bosĩ, mũyĩhĩndanaye, mowe. Nindi omo katĩkatĩ kabo yo watũla emyatsi eyĩ kwehĩ? Omwami Mukulu amwanzĩre. Asyaberererya erisonda liwe ribuya oko Babelĩ, nʼokuboko kuwe kwasyalwa nʼAbakaldea.

¹⁵Ĩngye, nĩna ngye, nabĩrĩbũga. Kwenene, nabirimubirikira, nabirimuleta, kandi asyaleka esyonzira siwe ĩsyowana.

¹⁶Mwase hakũhĩ nage, muhulikirire ebĩ. Okwʼĩtsũka erĩmbere sĩndĩtabũga omwʼĩkũmbo, erĩtsũka oko mugulu byakoleka, ĩngye nabyaho. Na lino Omukama Omwami Mukulu, abirinyituma, nʼOmũlĩmũ wuwe.

¹⁷Omwami Mukulu, Omũtongolya wawe, Oyũbũyĩrĩre wa Ĩsraelĩ, akabũga ati, Ĩngye indi Mwami Mukulu Nyamuhanga wawe, oyũkakũkangĩrĩraya ubane endũndĩ, oyukakusondola omo nzira eyo wangalenderamo.

¹⁸Kumbe wahulikirira ebihano byage! Neryo Obuholo bwawe nga bwabiribya ngʼolũsĩ, nʼeritunganene ryawe ngʼebisunda byʼomo ngetsi.

¹⁹Nʼabana bawe nga babiribya ngʼomusege, nʼabana bawe ngʼehĩgũma hyʼekisweswe kyago. Erĩna lyabo sĩryangalĩma kutse erĩherĩbwa embere syʼameso wage.

²⁰Muhuluke mũlũe eBabelĩ! Musage mũlũe eyiri Abakaldea! Mũtũlego omo mulenge wʼobogo bʼobutseme, mũbũgego, Mũtũlego oko ndũlĩ yʼekihugo, muti, Omwami Mukulu abĩrĩtongolya omugombe wuwe, ye Yakobo.

²¹Mobatakwa nyota omugulu asondolabo omo mbwarara. Mwahũlũkya amagetsi omwʼĩbwe erisenda busana nabo. Mwatula erĩbwe, nʼamagetsi mwahuluka nʼamaka.

²²Omwami Mukulu ati, Sihali Obuholo oko babi.