Read nande Ĩsaya 49 Bible Online

Ĩsaya 49 - nande bible

Ĩsaya 49

¹Ĩnywe bitsira, munyihulikirire, ĩnywe bandu bʼehali mowe. Omwami Mukulu mwanyibirikira isindinabutwa. Inyine omo nda ya koyo mwahula erĩna lyage.

²Kandi abiriyira obuno bwage ngʼomũyalĩ atwĩre. Abĩrĩnyĩbĩsa omo kyũtsũtsũ kyʼebyala biwe. Abirinyiyira mo musoha owatwĩre. Abĩrĩnyĩbĩsa omo lubo luwe.

³Kandi mwabũga nage ati, Uli mugombe wage Ĩsraelĩ, nasyakangya olukengerwa lwage umʼuwe.

⁴Nĩkwa, monabũga nyiti, Nabirikola busa, nabiribuga amaka wage go busa bute mugaso. Nĩkwa kwenene erĩbanza litunganene lyage liri haguma nʼOmwami Mukulu, nʼoluhembo lwage luli umu Nyamuhanga wage.

⁵Na lino Omwami Mukulu ati, Oyo wanyihangika omo nda ati nyibye mugombe wuwe, erireta Yakobo ukwʼiye kandi, ahĩndanaye Ĩsraelĩ ukwʼiye (kusangwa ĩngye nyĩsĩkĩbwe omo meso wʼOmwami Mukulu, na Nyamuhanga wage ni maka wage).

⁶Ati, Ni mwatsi muke uwe eribya mugombe wage erĩhanganĩa ebihanda bya Yakobo, nʼerĩsũbya abateyĩbawa ba Ĩsraelĩ. Kandi nasyakuyira eribya ekyakakala busana nʼebihanda, omulamo wage ahĩke oko ndũlĩ yʼekihugo.

⁷Omwami Mukulu akabũga, yo Mũtongolya wa Ĩsraelĩ, nʼoyũbũyĩrĩre wuwe, akabwira oyo abandu bakapona, nʼoyo ekihanda kĩkakwa nye, oko mugombe wʼabatabalĩ. Abami basyalangira, basyahangana, abanya-mwami nibya basyũnama ahisi, busana nʼOmwami Mukulu oyuteregula, Oyũbũyĩrĩre wa Ĩsraelĩ, oyo wayisoga we.

⁸Omwami Mukulu ati, Oko mugulu wʼerĩsĩmwa monakũsũbĩrya, nʼoko kiro kyʼomulamo monakũwatĩkya. Kandi nasyakũteya, nʼerikuha eribya endagano yʼabandu, erĩhanganĩa ekihugo, erihabo eribana erilaga lyʼemyandu yʼomulala.

⁹Nʼeribwira ababohĩre, nyiti, Muhuluke; nʼeribwira abali omo mwĩrĩmya nyiti, Mũyĩkanganaye. Basyalira omo nzira, nʼahendata hosĩ hasyabya obũlĩsĩryo bwabo.

¹⁰Sibendĩsyaswakwa enzala kutse enyota, nʼekĩhũhanĩ kutse eryuba sĩbyendĩsyaswĩryabo ahisi. Kusangwa oyukaganyirabo asyasondolabo, asyasondolabo oko syongũnũnũko syʼamagetsi.

¹¹Kandi nasyayira ebitwa byage byosĩ eribya nzira, nʼesyombalu nene syage syasyasumbwa.

¹²Lebaya, aba basyalũa hali, kandi lebaya, aba basyalũa elutambi lwʼendata nʼebwanga bwʼeyĩkwa, nʼaba basyalũa omo kihugo kyʼeSĩnĩmũ.

¹³Uwe lubula, wũte obogo bʼobutseme! Nawe kihugo, utseme! Ĩnywe bitwa, musumbe emirenge yʼobogo bʼobutseme! Kusangwa Omwami Mukulu abĩrĩkĩranĩa abandu buwe, Kandi asyaganyira abendererĩbawa buwe.

¹⁴Nĩkwa Sĩonĩ mwabũga ati, Omwami Mukulu abĩrĩnyĩsĩganĩa, nʼomukama abirinyibirirwa.

¹⁵Kwʼomũkalĩ anganatoka eribirirwa omwana wuwe oyukonga, isialiganyira omugala wʼenda yiwe kwehĩ? Aba banganibirirwa, nĩkwa ĩngye sindiendisyakwibirirwa.

¹⁶Lebaya, nabirikusaka omo biganza byʼebyala byage. Uwe Sĩonĩ esyombĩmbo syawe siri embere syage emigulu yosĩ.

¹⁷Abahĩmbĩ bawe bakanguha. Abakakũheraya nʼabakakuyira mo mulala basyakũlũako.

¹⁸Usumbe ameso wawe usamalire oko mbande syosĩ, abosĩ bakayĩhĩndanaya haguma, bakakũhĩkako. Omwami Mukulu ati, Ngoko nyiriho, wasyatsemerabo abosĩ ngʼomũherũkĩ kwʼakatsemera ebyambalo biwe.

¹⁹Nĩkwa, busana nʼomulala wawe, nʼebĩma byawe, nʼekihugo kyawe ekyabĩrĩherĩbwa, kwenene lino Wasyabya muke busana nʼesyondũlanĩ, nʼabakumera basyabya hali.

²⁰Abana wakwĩrawako basyabũgĩra omo matwĩ wawe bati, Omwanya ono ni muke busana nage. Umba aho nangabana obwĩkalo.

²¹Neryo wasyabũga omo mutima wawe uti, Nindi wanyibutira aba kwehĩ? Kusangwa nabĩrĩkwĩrwa abana bage, kandi indi mugumba, indi mũhũmĩ, nʼoyukaganga-ganga, kandi, nindi oyo wakũlaya aba kwehĩ? Lebaya, monasĩganĩbwa ĩngyowene, aba nabo balũahi kwehĩ?

²²Omukama Omwami Mukulu ati, Lebaya, nasyasumba ebyala byage oko bihanda, nʼerisingika ebendera yage oko bihanda. Basyaleta abagala bawe omo bĩkũba byabo, nʼabali bawe basyahekwa oko bitigo byabo.

²³Abami basyabya bateya bawe bʼerĩkũkũlya, nʼabanya-mwami bʼobũkalĩ babo basyabya balemberĩ bawe. Basyakũnamira nʼamũsũ wabo oko kitaka, kandi basyalyatsirira olũtũtũ lwʼebisando byawe. Nawe wasyaminya kwʼindi Mwami Mukulu, abakanyirinda nʼamaha sibendisyahemulwa.

²⁴Abanyegwa basyahũngwa oko mbangĩ, kutse ababohwa bʼomutsibu basyalamĩbwa kwehĩ?

²⁵Kwenene Omwami Mukulu ati, Abʼomũlĩkĩ bʼesyombangĩ basyalũsĩbwaho, nʼabanyegwa bʼabatsibu basyalamĩbwa. Kusangwa nasyalwa nʼoyukalwa nawe, kandi nasyalamya abana benyũ.

²⁶Kandi nasyalĩsya abakabanũbaya omo sĩswĩ syʼemibiri yabo. Kandi basyakũnda omo musasi wabo-wabo, ngʼebĩnyũ bĩsĩhĩre. Abandu bosĩ basyaminya ngoko ĩngye, Mwami Mukulu, indi Mũlamya wawe, nʼomũtongolya wawe, Embangĩ ya Yakobo.