Read nande Ĩsaya 50 Bible Online

Ĩsaya 50 - nande bible

Ĩsaya 50

¹Omwami Mukulu akabũga ati, Ebarua yʼerihiga koyo wawe eyo namuhigirako iri hahi kwehĩ? Kutse nabĩrĩbagũlya ukundi oyo wanyibweka kwehĩ? Lebaya, mwagũlĩbawa busana nʼebibi byenyũ, na koyo wenyũ ahigawa busana nʼamalolo wenyũ.

²Neryo busana nakĩ omugulu nasa mohatabya mundu kwehĩ? Omugulu nabirikira, busana nakĩ mohatabya mundu ũkanzũbĩraya kwehĩ? Kwʼebyala byage nĩ bĩkũhĩ muti sibyangatoka erĩtongolya kwehĩ? Kutse singwite maka wʼerĩlamya kwehĩ? Lebaya, omwʼikunga lyage ngũmĩrĩraya engetsi, ngayira esyonyũsĩ mo mbwarara. Esĩswĩ syamo sikakumba kusangwa sihali magetsi, sikahola omo nyota.

³Ngambalaya olubula lwʼebĩkĩnĩre, ngayira olukimba lũkĩnĩre mo kiyiswiko kyalo.

⁴Omukama Omwami Mukulu abirinyiha olulimi lwʼomwiga, inabana eriminya erĩsĩkya oyukaluha omo kĩnywa. Akanyĩbũkaya obuli ngyakya akabũkaya okũtũ kwage erihulikirira ngʼomwiga.

⁵Omukama Omwami Mukulu abirihundula okũtũ kwage, nage mondagana erĩowa, kandi mondabũnũkala.

⁶Monaha omugongo wage oko bandu abakanyĩswĩraya, nʼamatema wage ukwʼabo bakula esyonderũ. Mondaswika obũsũ bwage erilola okwʼĩsonĩ, nʼerĩtwĩrwa kwʼamatande.

⁷Kusangwa Omukama Nyamuhanga akanyĩwatĩkaya, busana nʼekyo sindihemuka. Busana nʼekyo nabĩrĩkalya obũsũ bwage ngʼerĩbwe lyʼomutero, nage nyĩnasĩ ko sindiendisyahemulwa.

⁸Oyukanyiganza mo mutunganene ali hakũhĩ; nindi wasyalwa nage kwehĩ? Tuhangane haguma; nindi yuwite omwatsi busana nage kwehĩ? Asegere eyo ndi.

⁹Lebaya, Omukama, Nyamuhanga akangwatĩkaya. Nindi wasyanyitswera omusango kwehĩ? Lebaya, abosĩ basyakula ngʼolukimba; ehinyurugunzu hyasyalyabo.

¹⁰Nindi omo katĩkatĩ kenyũ oyukubaha Omwami Mukulu, oyũkowa omulenge wʼomugombe wuwe kwehĩ? Oyukagenda omo mwĩrĩmya, isiawite ekyakakala kwehĩ? Ayiketere erĩna lyʼOmwami Mukulu, ayisinge Nyamuhanga wuwe.

¹¹Lebaya, ĩnywe bosĩ ko mũkakaya omuliro, ĩnywe mũkayĩkũndĩka kwʼebĩsĩnganĩkya oko mbande syosĩ, mulendere omo kyakakala kyʼomuliro wenyũ, nʼomo katĩkatĩ kʼebĩsĩnganĩkya ebyo mwabĩrĩakya. Mwasyabana ekĩ omo byala byage kandi mwasyagotsera ahisi omo ngitsi.