Read nande Ĩsaya 53 Bible Online

Ĩsaya 53 - nande bible

Ĩsaya 53

¹Nindi yo wabĩrĩkĩrĩrya erĩtũlago lyetu kwehĩ? Nʼokuboko kwʼOmwami Mukulu kwabĩrĩbĩsũlĩra amaka wuwe ukundi kwehĩ?

²Kusangwa mwakulira embere siwe ngʼekiti kyolo-kyolo, kandi ngʼomũlĩhĩ omo kitaka kyũmĩre. Siawite omubiri atendere kutse erĩkangabasanĩa lyʼOmwami erikaleka itwamulolako. Kandi siawite olulangiro olukaleka itwamwanza.

³Abiriponwa nʼerĩsĩganĩbwa nʼabandu, omundu wʼamalĩge nʼoyo wasĩ amagalĩ. Kandi abya ngʼoyo abandu bakabĩsako obũsũ bwabo. Mwaponwa, netu motutamũsĩma.

⁴Kwenene abiriheka amagalĩ wetu, kandi abiriheka malĩge wetu, nĩkwa ĩtwe, motwamuganza ngʼabĩrĩhũnzwa, ĩnĩabĩrĩswĩrĩbwa na Nyamuhanga, nʼerĩagalĩranĩbwa.

⁵Nĩkwa mwahũtalĩbwa busana nʼamalolo wetu, mwahĩnokala busana nʼebibi byetu. Erisuyirwa lyʼobuholo bwetu molyamubyako, nʼomo mĩbĩbũ yiwe tũkalamĩbawa.

⁶Ĩtwe bosĩ ngʼesyombũlĩ twabiritala. Twabirikita obuli mundu omo nzira yiwe, nĩkwa Omwami Mukulu abirireka ebibi byetu ĩtwe bosĩ erimuwirako.

⁷Mwanũbĩbwa, nʼerĩagalĩranĩbwa, nĩkwa mwatakũmbũla obuno buwe. Ngʼekyana kyʼembũlĩ ekikatwalawa okwʼikerwa, kandi ngʼembũlĩ kwʼikabya bũkũtũ embere syʼabatwĩ bʼobweya bwayo, naye mwatabũga ekĩnywa nʼekiguma.

⁸Omwʼĩnũbĩbwa nʼeritswerwa mwatwalwa, kandi busana nʼolulengo luwe, nindi oyo waganĩraya ngoko atwĩrawa erĩlũa oko kihugo kyʼabaliho? Mwaswĩrĩbwa busana nʼamalolo wʼabandu bage.

⁹Eyisinda yiwe yahamulawa eribya haguma nʼababi, kandi ibye haguma nʼomundu wʼebindu omo luholo luwe; nomo atakola ebyʼomwaga, kutse amatebo mwatabya omo mĩnywa yiwe.

¹⁰Nĩkwa molyatsemesya Omwami Mukulu erĩmũhũnza. Abĩrĩmwagalya. Amayiyira eribya buhere bwʼolubanza, asyalola oko bana buwe, asyatomekera ebiro biwe, nʼeritsemesya libuya lyʼOmwami Mukulu lyasyagasa omo byala biwe,

¹¹Busana nʼeriagalwa lyʼomutima wuwe, asyalangira ekyakakala nʼerĩsĩma. Busana nʼamenge wuwe, Oyutunganene, omugombe wage, asyayira abangi mo batunganene, kandi asyaheka ebibi byabo.

¹²Busana nʼekyo, nasyamugabira erĩgabo haguma nʼabakulu, naye asyagaba eminyego haguma nʼesyombangĩ, kusangwa ũta omutima wuwe erĩhĩka okwʼihola, kandi mwaganzirwa haguma nʼababi. Nĩkwa mwaheka ebibi byʼabangi kandi mwasabira abahalĩrya.