Read nande Ĩsaya 54 Bible Online

Ĩsaya 54 - nande bible

Ĩsaya 54

¹Utseme, uwe mũkalĩ oyutabuta; Uyitsangure, wamaye, iwe utakunda; kusangwa omũkalĩ oyo walekeranĩbawa, awite abana kwilaba omũkalĩ oyuwite ĩba, kusangwa Omwami Mukulu atya.

²Ũgalĩhaye omwanya wʼerĩhema lyawe, usanze ebĩsũkũlĩryo byʼahʼerĩĩkala lyawe. Sũbalayebyo. Ũlehayeobulibwʼebikoba byawe, kandi ũwataye esyongyingyi syawe.

³Kusangwa wasyabwarara oko mali nʼoko malembe, nʼabana bawe basyasĩgalya ebihanda, basyaswĩkala omo mĩyĩ eyabya bĩma.

⁴Sigubahe kusangwa sĩwendĩsyakwa esĩsonĩ. Kutse susweke, kusangwa siwendisyahemuka. Nĩkwa wasyibirirwa esĩsonĩ syʼobwana-buto bwawe, kandi siwendisyaswibuka eritsumwa lyʼobũkwakalĩ bwawe.

⁵Kusangwa Omũhangĩkĩ wawe nĩ ĩba we, Omwami Mukulu wʼemilondo nĩ rĩna liwe. Oyũbũyĩrĩre wa Ĩsraelĩ nĩ Mũtongolya wawe. Oyukahulawa mo Nyamuhanga wʼekihugo kyosĩ.

⁶Kusangwa Omwami Mukulu abirikubirikira, ngʼomũkalĩ oyo wasĩgawa nʼoyukagalawa omo mutima, ngʼomũkalĩ oyũhĩkĩbwe omo bumbesa buwe omugulu akahigawa, Nyamuhanga wawe atya.

⁷Oko katambĩ kake monakũsĩganĩa nĩkwa nasyakũhĩndanĩa omwʼiganyira lingi.

⁸Omwʼihitana eryabwaga monakũbĩsa obũsũ bwage akatambĩ kake, nĩkwa nasyakuganyira nʼerisasira eritabahwa, Omwami Mukulu Omũtongolya wawe atya.

⁹Kusangwa ekĩ ũkwʼĩngye kiri ngʼebiro bya Noa: omugulu nalahĩraya nyiti amagetsi wa Noa siendisyagunga kandi oko kihugo, nabĩrĩlahĩrya litya nyiti sindiendisyakuhitanako, kutse erikukunga.

¹⁰Kusangwa ebitwa byanganalũaho, nʼehitwa ihyatitimana, nĩkwa erisasira lyage sĩryendĩsyakũlũako, nʼendagano yage yʼobuholo sĩyendĩsyasũkanĩbwa, Omwami Mukulu oyukakuganyira atya.

¹¹Uwe wendererĩbawa, uwe wagusawa nʼerihunga, uwe ũtekĩranĩbawa, lebaya, nasyasingika amabwe wawe omo mĩrĩngo mibuya, nʼerĩhĩra ebibanza byawe omo mabwe wʼesafĩro.

¹²Kandi nasyahĩmba amadĩrĩsa wawe omo mabwe wʼelũbĩro, nʼesyongyo syawe omo mabwe awakangĩre, nʼolũhĩmbo lwawe losĩ mo lwʼamabwe wʼobũgũlĩ bunene.

¹³Nʼabagala bawe bosĩ basyakangĩrĩrĩbwa nʼOmwami Mukulu, nʼobuholo bwʼabagala bawe bwasyabya bungi.

¹⁴Wasyahanganĩbwa omo litunganene. Wasyabya hali okwʼĩnũbĩbwa, kusangwa siwendisyubaha. Wasyabya hali okwʼĩũbahya, sĩryendĩsyahĩka hakũhĩ nawe.

¹⁵Omundu amakubambira kutsibu sĩ ngye. Oyukakubambira asyawa busana nawe.

¹⁶Lebaya nabirihangika omũhesĩ oyukawata omũgũba gʼomuliro wʼamakala, nʼerĩhũlũkya ekyuma kyʼamalwa busana nʼomũbĩrĩ wako, nage nabirihangika omũherya wʼerĩherya.

¹⁷Sihali kindu kyʼamalwa ekikahesawa erilwa nawe ekikandisyagasa, nʼobuli lulimi olũkakũhandĩkĩrĩraya omwʼitswera wasyasĩngalo. Oyũ ni mwandu wʼabagombe bʼOmwami Mukulu nʼerĩsĩngana lyabo lĩkalũa ũkwʼĩngye, Omwami Mukulu atya.