Read nande Ĩsaya 55 Bible Online

Ĩsaya 55 - nande bible

Ĩsaya 55

¹Ego! Obuli mundu oyũkwĩre enyota, mwase oko magetsi; nʼĩnywe mutawite esyofranka mwase, mutugule, mulye; ega, mwase, mugule ebĩnyũ nʼamasabũ butsira franka kandi butsira bũgũlĩ.

²Busana nakĩ mũkahĩtaya esyofranka busana nʼekyo ekite kalyo kwehĩ? Nʼobukumbi bwenyũ busana nʼekyo ekĩtũgũtaya kwehĩ? Mumbulikirire ndeke, kandi mulye ekibuya, ũyĩtsemesaye omo bĩnũnĩre.

³Mutege amatwĩ wenyũ, mwase kwĩngye. Muhulikirire, mutoke eribyaho. Nage nasyayira endagano ya kera na kera haguma nenyũ, ngʼeriganyira literegula eryalagawa uku Dawĩdĩ.

⁴Lebaya, nabĩrĩmũhĩra mo mũlangĩrĩ busana nʼebihanda, omũsondolĩ nʼomukulu busana nʼabandu.

⁵Talebaya, wasyabirikira ekihanda ekyo utabya wasĩ nʼekihanda kitabya kĩkwasĩ kyasyakusayirako, busana nʼOmwami Mukulu Nyamuhanga wawe, nʼoyũbũyĩrĩre wa Ĩsraelĩ, kusangwa abirikupipa.

⁶Mũsonda-sondaye Omwami Mukulu omugulu akinabanika; Mumulakire omugulu akine hakũhĩ.

⁷Omubi aleke enzira yiwe, Nʼomundu utatunganene aleke amalengekanĩa wuwe. Asube oko Mwami Mukulu, Naye asyamuganyira; Asube ahali Nyamuhanga wetu, Kusangwa asyamubuyira ndeke.

⁸Kusangwa amalengekanĩa wage sĩ malengekanĩa wenyũ, kutse esyonzira syenyũ si nzira syage, Omwami Mukulu atya.

⁹Kusangwa ngoko lubula luli endata hali oko kihugo, esyonzira syage ko siri sitya endata oko syonzira syenyũ, nʼamalengekanĩa wage alengĩre amalengekanĩa wenyũ.

¹⁰Kusangwa embũla nʼenzururu bĩkalũa elubula, kandi sibyesubayo bite byaheherya ekitaka, nʼerĩlasya kukyo, nʼerĩkondolya kukyo, ibyaha omũherĩ yʼembuto, nʼakalyo oko yukalya.

¹¹Ekĩnywa ekikahuluka omo buno bwage ko kikandisyabya kitya. Sikyendisyanyisubako buyira kite kyakola ebyo nyanzĩre, kandi kite kyabererererya omwatsi umwʼekyo natumirakyo.

¹²Kusangwa mwasyahuluka nʼobutseme, nʼerisondolwa omo buholo. Ebitwa nʼehitwa byasyũta obogo bwʼobutseme embere syenyũ. Nʼemiti yosĩ yʼomolĩ yasyakangatira ebyala byayo.

¹³Ebirago byasyalasa omo mwanya wʼomusakisaki, Nʼomo mwanya wʼekyatsinge hasyalasa omũhadesĩ. Ekĩ kyasyabya ekĩbũkyo oko Mwami Mukulu, Kyasyabya ekiminyikalo kera na kera Ekĩtendĩsyalũaho.