Read nande Ĩsaya 57 Bible Online

Ĩsaya 57 - nande bible

Ĩsaya 57

¹Omundu oyutunganene akahera, isihali mundu oyukatsomana. Abandu bakakenga Nyamuhanga bakalũsĩbawaho, isihali oyũkaganĩraya. Kusangwa omundu oyutunganene akalũsĩbawa ahali ebibi.

²Iye akingira omo buholo. Bakaluhukira omo sisinda syabo, obuli mundu oyo walendera omo nzira yiwe itunganene.

³Nĩkwa mwase hano ĩnywe bagala bʼomũkũmũ-kalĩ, abana bʼomũsĩngĩrĩ nʼomũmalaya.

⁴Mukasekandi kwehĩ? Nindi yo mukatandira obuno bwenyũ nʼerikonga olulimi lwʼomo buno ukundi kwehĩ? Ĩnywe Simuli bana bʼerihona, nʼabana bʼamatebo kwehĩ?

⁵Ĩnywe mũkakaya esyongumbu syenyũ omo miti yʼemĩalonĩ, omo ndĩna yʼobuli muti mubisi. Ĩnywe mũkĩtĩra abana bʼomo misya, omwisi wʼesyombatatariĩa syʼolukuka lwʼamabwe.

⁶Erĩgabo lyawe liri omo katĩkatĩ kʼamabwe awatendere wʼomusya; igo ni mugereko wawe. Wabĩrĩũtũlĩra kubo obuhere bwʼerĩpũlya, wabirihonga obuhere bwʼeyĩsyano. Nasyaleka emyatsi eyĩ kwehĩ?

⁷Wabĩrĩhĩra engyingo yawe oko kitwa kiri ekĩyĩsũmbĩre. Kandi mowahetukirayo eriyahonga obuhere.

⁸Wabirihanda ekĩmĩnyĩsyo kyawe enyũma wʼesyonyũyĩ nʼesyonzeguliro. Kwenene wabiriyisukulira hali kwĩngye, kandi wabirihetuka nʼerĩgalĩhya engyingo yawe, wabirilagana nabo. Wabirianza engyingo yabo, aho wabirilangira obulume bwabo.

⁹Mowaya eyiri omwami nʼamagũta, mowakanyĩrĩrya ebikakumba ndeke byawe. Kandi mowatuma abakwenda bawe bo hali, nʼerireka ibandagalira eKũlĩmũ.

¹⁰Wabya iwamaluha busana nʼobuli bwʼenzira yawe, nĩkwa mũtabũga uti, Sihakiri maha. Mowabana erisuba lyʼamaka wawe, busana nʼekyo mutalembera.

¹¹Kandi mowaswekerandi nʼerĩkwa obuba, omugulu wabiha, nʼeritendinyibuka kwehĩ? Kutse erĩnyĩganĩrya? Mondakubya bũkũtũ omugulu muli, kikaleka utanyubaha kwehĩ?

¹²Ĩngye nasyatũla omwatsi wʼeritunganene ryawe nʼemĩbĩrĩ yawe, nĩkwa sibyendisyakugasirakĩ.

¹³Omugulu ukalaka, esyosanamu esyo wabĩrĩhĩndanĩa sĩkũlamaye. Nĩkwa erihunga lyasyahekasyo, nʼomuka asyatwalasyo erya. Nĩkwa oyukanyisayirako asyasĩgalya ekitaka mo mwandu, kandi asyasĩgalya ekitwa kyage kĩbũyĩrĩre.

¹⁴Ekĩnywa kyasyahuluka kiti, Muhale embalu, muhaleyo, mũkokotaye enzira, Mũlũsaye ekĩkatwĩkalaya, Omo nzira yʼabandu bage.

¹⁵Kusangwa Oyuli wʼendata nʼoyũyĩsũmbĩre, oyukakota kera na kera, erĩna liwe lĩbũyĩrĩre, yũkabũga ati, Nyĩkere ahʼendata nʼahabũyĩrĩre, kandi nyĩkere haguma nʼoyuli nʼekĩrĩmũ kyolo-kyolo nʼerĩyĩkehya, nyitoke erĩsũbya ekĩrĩmũ kyʼerĩyĩkehya nʼerĩsũbya omutima wʼoyũkwĩre obũlĩge.

¹⁶Kusangwa sindiendisyalwa biro byosĩ, kutse sinangabya ngahitana ebiro byosĩ, kusangwa ekĩrĩmũ kyanganalemberera embere syage, nʼomuka wʼabandu nahangika.

¹⁷Monahitana busana nʼebibi biwe, byʼendũndĩ itatolere monamũswĩrya. Monabĩsa obũsũ bwage monahitana, naye mwakwamirira erikitira ehandi, omo nzira yʼomutima wuwe.

¹⁸Nabirilangira esyonzira siwe, nĩkwa nasyamũlamya. Nasyamusondola, nʼerĩmũsũbũlĩrya erĩkĩranĩa, nʼoko bandu abamulirira.

¹⁹Ĩngye ngahangika eripipa lyʼemĩnywa. Obuholo, Obuholo bubye uko yuli hali nʼoko yuli hakũhĩ, Omwami Mukulu atya; kandi, Nasyamũlamya.

²⁰Nĩkwa ababi basosĩre engetsi eyĩgũngĩre, kusangwa siyiritoka eritekana, nʼamagetsi wayo akahũlũkaya olondo nʼerĩtaka.

²¹Nyamuhanga wage ati, Sihali buholo oko babi.