Read nande Ĩsaya 59 Bible Online

Ĩsaya 59 - nande bible

Ĩsaya 59

¹Lebaya, ebyala byʼOmwami Mukulu sĩbyetakũhĩha uti byangataluka erĩlamya; kutse okũtũ kuwe si kutsiha uti sikwangatoka erĩowa.

²Nĩkwa ebibi byenyũ byabiribagaba na Nyamuhanga wenyũ, nʼebibi byenyũ byabĩrĩbĩsa obũsũ buwe ũkwʼĩnywe, kikaleka ĩnĩatowa.

³Kusangwa ebyala byenyũ byabiritsanda omo musasi, nʼeminwe yenyũ yabiritsanda nʼebibi. Emĩnywa yenyũ yabĩrĩbũga amabehĩ, olulimi lwenyũ lwabĩrĩbũga-bũga ebibi.

⁴Sihali oyũkatũhaya omo litunganene, sihali oyũkabũga omo kwenene. Bakayiketera eriremwa, bakabũga mabehĩ. Bakaheka obukule bwʼepono, ibabuta ebibi.

⁵Bakatwa amayi wʼenzoka, nʼeriluka Olutu lwʼekisengula. Oyukalya amayi wasyo akahola, nʼerĩkatũtĩbawa likahuluka mwʼenzoka.

⁶Olutatangula lwabyo silwendisyabya ngimba, kutse sibendisyayiswika oko mibiri yabo. Emĩbĩrĩ yabo nĩ mĩbĩrĩ yʼebibi, nʼerikola omwaga liri omo byala byabo.

⁷Ebisando byabo bikatibita oko bibi, bakanguha erĩũta omusasi ate nʼomusango. Obũlengekanĩa bwabo nĩ bũlengekanĩa bwʼebibi. Erĩtogotya nʼerĩherya biri ehosĩ bakaya.

⁸Sĩbasĩ enzira yʼobuholo, kandi sihali erĩbanza litunganene omo migendere yabo. Babĩrĩyĩkokoterya esyonzira sĩhengemĩre. Omundundi oyukalaba musyo sĩasĩ Obuholo.

⁹Busana nʼekyo, erĩbanza litunganene liri hali ũkwʼĩtwe, nʼeritunganene siryetũhĩkako. Tuli nʼamaha wʼekyakakala, nĩkwa lebaya, omwĩrĩmya. Tuli nʼamaha wʼerĩhenĩa, nĩkwa tukalendera bũlĩmalĩma.

¹⁰Tukamata-mata oko lũhĩmbo ngʼendĩmatĩme; ega, tukamata-mata ngʼabatawite ameso; tũkatwĩkangala omwʼitungi ngʼomo bwĩrĩre; omo katĩkatĩ kʼabandu abakalĩre tuli ngʼabandu abaholĩre.

¹¹Ĩtwe bosĩ tũkahũma ngʼedubu, ĩtwabelekũma kutsibu ngʼehĩrĩkũkũ. Tũkahĩra amaha oko lĩbanza litunganene nĩkwa siriri. Tũkahĩra amaha busana nʼomulamo, nĩkwa liri hali ũkwʼĩtwe.

¹²Kusangwa amalolo wetu abirikanya embere syawe, nʼebibi byetu byamatuhandikirira, kusangwa amalolo wetu ali haguma netu, nʼebibi byetu tũnasĩbyo.

¹³Tũkahalaya nʼerigana Omwami Mukulu nʼerikita erikwama Nyamuhanga wetu, erĩbũga ebyʼerĩnũbya, nʼerihona, eriheka obukule bwʼebĩnywa byʼamabehĩ omo mutima nʼerĩbũgabyo omo mutima.

¹⁴Nʼerĩbanza lĩkasũbĩbawa enyũma, nʼeritunganene lyamahangana hali, kusangwa ekwenene yabĩrĩtwĩkala omo nzira nene, nʼekitunganene sikyetoka eriingiramo.

¹⁵Ega, ekwenene ikabula. Nʼoyukaleka ebibi akayiyira mo munyego. Neryo Omwami Mukulu mwalangira ekyo, neryo mwatatsemesĩbwa kusangwa sihabya erĩbanza litunganene.

¹⁶Kandi mwalangira isihali mundu, kandi, mwasweka kusangwa sihabya omũtonganĩrĩ. Neryo okuboko kuwe mokwamuletera omulamo; nʼeritunganene riwe molyamuhamba ndeke.

¹⁷Neryo mwambala eritunganene ngʼobupa bwʼekĩkũba, nʼengofĩro yʼomulamo oko mutwe wuwe. Kandi mwambala esyongimba syʼerĩkĩsya eribya ngimba, kandi iniambite omũhwa ngʼenzobe.

¹⁸Asyalihabo ngʼemĩbĩrĩ yabo, erihitana oko nzĩgũ siwe, nʼerĩkĩsĩrya oko nzĩgũ siwe. Akasyakĩsĩraya emĩsĩke yʼengetsi.

¹⁹Neryo basyubaha batya erĩna lyʼOmwami Mukulu erĩtsũka eyo eryuba likalengera, nʼolukengerwa luwe erĩtsũka eyo eryuba likahuluka, kusangwa asyasa ngʼomũgũmba wʼolũsĩ olo erihunga lyʼOmwami Mukulu lĩkakũna.

²⁰Omũtongolya asyahĩkĩra eSĩonĩ, nʼukwʼabo abakabũnũkala erireka malolo ewa Yakobo, Omwami Mukulu atya.

²¹Nĩkwa ĩngye, Mwami Mukulu, nyiti, Eyĩ ni ndagano yage haguma nabo, Ekĩrĩmũ kyage ekiri ukʼuwe, nʼebĩnywa byage ebyo nabĩrĩhĩra omo buno bwawe, sibyendisyateruka omo buno bwawe, kutse omo buno bwʼabana bawe, kutse omo buno bwʼabitsikulu bawe, Omwami Mukulu atya, erĩtsũka lino nʼerĩhĩka kera na kera.