Read nande Ĩsaya 60 Bible Online

Ĩsaya 60 - nande bible

Ĩsaya 60

¹Hangana, ũkoleraye, kusangwa ekyakakala kyawe kyamasa, nʼolukengerwa lwʼOmwami Mukulu lwabirikuhulukira.

²Kusangwa lebaya, omwĩrĩmya asyabomba ekihugo, nʼomũhĩndanĩa asyabombera ebihanda. Nĩkwa Omwami Mukulu asyakuhulukira, nʼolukengerwa luwe lwasyakubutukira.

³Ebihanda byasyasa oko kyakakala kyawe, nʼabami basyasa Okwʼĩkangabasanĩa lyʼerihangana lyawe.

⁴Usumbire ameso wawe oko mbande syosĩ, Ũlebaye. Abosĩ bakayĩhĩndanaya, bakakũhĩkako. Abagala bawe basyasa bakalũa ehali, nʼabali bawe basyahekwa buboko-boko.

⁵Neryo wasyalangira wasyakangabasanĩa, nʼomutima wawe asyayitsangura kandi nʼeritsema, kusangwa obungi bwʼengetsi bwasyakubindukira, nʼobũsokĩ bwʼebihanda bwasyakũhĩkako.

⁶Obungi bwʼesyongamia bwasyakuswika, esyondabana syʼesyongamia syʼeMĩdĩanĩ nʼeEfa. Abosĩ bʼeSeba basyasa. Basyaleta esyamagetsi nʼobukwa, basyaleta engulu yowene yʼeripipa lyʼOmwami Mukulu.

⁷Nʼebihangulo byosĩ byʼeKedarĩ byasyahĩndanĩbwa ukʼuwe, Esyombangale syʼeNebayotĩ syasyakukolera. Syasyahetukira oko kiherero kyage nʼerĩrĩgwa, Nage nasyasĩkya enyũmba yage yʼolukengerwa.

⁸Ni bahi aba, abakaguluka ngʼekĩtũ, Kandi ngʼehĩrĩkũkũ omo madĩrĩsa wahyo?

⁹Kwenene emĩsĩke yʼengetsi yasyandinda, Nʼamato wʼeTarsisi asyatsũka erĩhĩka. Erireta abagala bawe bakalũa ehali, Ebĩtsĩpa byabo nʼesyamagetsi syabo haguma nabo, Busana nʼerĩna lyʼOmwami Mukulu, Nyamuhanga wawe, Na busana nʼoyũbũyĩrĩre wa Ĩsraelĩ, Kusangwa abiribasitika.

¹⁰Nʼabʼehandi basyahĩmba esyombĩmbo syawe, Nʼabami babo basyakukolera. Kusangwa omwʼihitana lyage monakũswĩrya, Nĩkwa omwʼisasira lyage nabirikuganyira.

¹¹Nʼesyongyo syawe syasyabya isinakingukere luguma-guma. Sisyendisyakingwa omo musibo nʼomo kiro. Abandu batoke erikuletera obuteke bwʼebihanda, Nʼabami babo ibanasondwere omo mulondo.

¹²Kusangwa ekihanda ekyo nʼobwami obo, Ebĩtanzĩre erikukolera byasyahera Nʼebihanda ebyo byasyatĩngĩtĩbwa kutsibu.

¹³Olukengerwa lwʼeLebanonĩ lwasyakwasira, Omũberosĩ, nʼomũtĩzarĩ, nʼomũteasũrĩ haguma, Erĩbũyahĩrĩrya ahabũyĩrĩre hage. Nage nasyayira ahʼebisando byage mo hʼolukengerwa.

¹⁴Kandi abagala bʼabandu abakwagalaya, Basyakwasako bakakũnamira. Abosĩ abakupona basyayũnamya oko bisando byawe. Kandi basyakwahula mo mũyĩ wʼOmwami Mukulu, ESĩonĩ omũyĩ wʼOyũbũyĩrĩre wa Ĩsraelĩ.

¹⁵Nomo wanasĩganĩbawa nʼerĩkũbwa obusu, Isihali mundu ukakulabako, Nasyakuyira eribya eriyiheka lyʼerikota, Nʼobutseme bwʼesyondengo nʼesyondengo.

¹⁶Wasyalya amasabũ wʼebihanda, Kandi wasyalya obukamahe bwʼabami. Neryo wasyaminya kwʼindi ĩngye Mwami Mukulu, Omũlamya wawe, Nʼomũtongolya wawe, Embangĩ ya Yakobo.

¹⁷Omo mwanya wʼemiringa nasyaleta esyamagetsi, Omo mwanya wʼebyuma nasyaleta ebĩtsĩpa, Omo mwanya wʼomuti nasyaleta omulinga, Nʼomo mwanya wʼamabwe nasyaleta ekyuma. Kandi nasyayira Obuholo eribya batabalĩ bawe, Nʼekitunganene eribya balangĩrĩ bawe.

¹⁸Omwaga sĩendĩsyasyogũbwa omo kihugo kyawe Nʼerĩtogotya nʼerĩherya sĩbyendĩsyasyogũbwa omo mitano yawe, Nĩkwa wasyahula esyombĩmbo syawe mo mulamo, Kandi wasyahula esyongyo syawe mwʼipipa.

¹⁹Eryuba siryendisyaswabyg ekyakakala kyawe omo musibo, Kutse omukera siendisyaswakuha ekyakakala mo mubano. Nĩkwa Omwami Mukulu asyabya kuwe ekyakakala kyʼerikota, Na Nyamuhanga wawe asyabya lukengerwa lwawe.

²⁰Eryuba lyawe siryendisyaswalenga kandi, Kutse omukera wawe siendisyabagana erirenga. Kusangwa Wasyabya nʼOmwami Mukulu mo kyakakala kyawe kya kera na kera, Nʼebiro byawe byʼeririra byasyahwa.

²¹Neryo abandu bawe basyabya batunganene abosĩ. Basyasĩgalya ekihugo kera na kera. Omutahi ogo nahera, omũbĩrĩ wʼebyala byage, Inatoka erikengwa.

²²Omuke asyabya kihanda, Omuke kutsibu asyabya kihanda kĩkalĩre. Ĩngye Mwami Mukulu, nasyangũhyabyo oko mugulu wabyo.