Read nande Ĩsaya 63 Bible Online

Ĩsaya 63 - nande bible

Ĩsaya 63

¹Oyũ nindi oyũkalũa eEdomũ, Nʼowʼesyongimba sĩhakabĩre engula sĩkalũa eBosra kwehĩ? Oyuli mubuya nʼerĩsĩkĩbwa omo ngimba siwe, Oyukagendera omo bukulu bwʼamaka wuwe kwehĩ? Nĩna ngye oyũkabũga omo litunganene. Embangĩ yʼerĩlamya.

²Busana nakĩ esyongimba syawe ni ngula, Nʼesyongimba syawe siri ngʼoyukakamira ebĩnyũ omo muhe wʼebĩnyũ kwehĩ?

³Nabiriryatangirira ekĩrĩnga kyʼebĩnyũ ĩngyowene, Isihali mundu omo bihanda byʼabandu oyo wabya haguma nage. Monalyatangirirabo omwʼihitana lyage nibya, Monahĩnolerabo omwʼihitana lyage. Omusasi wabo wʼeribyaho mwayitsatsanga omo ngimba syage, Kandi nabĩrĩtsandya esyongimba syage syosĩ.

⁴Kusangwa ekiro kyʼerĩkĩsya mokyabya omo mutima wage, Nʼomwaka wage wʼerĩtongolya abĩrĩhĩka.

⁵Kandi monasamalira isihali mundu wʼerĩwatĩkya. Neryo monasweka kandi sihabya mundu owʼerĩhanganĩa. Neryo okuboko kwage mokwanyiretera omulamo. Nʼerihitana lyage molyanyĩsĩyĩkĩrĩra.

⁶Monahĩnolera ebihanda omwʼihitana lyage, Monatamĩryabo omwʼihitana lyage, Kandi monũta omusasi wʼengebe yabo ahisi oko kihugo.

⁷Nasyahula obubuya bwʼeriganyira lyʼOmwami Mukulu, nʼeripipa lyʼOmwami Mukulu, ngʼebyosĩ ebyo Mwami Mukulu abirituha, nʼobubuya bunene oko kĩtũnga kya Ĩsraelĩ, obo abirihabo ngʼeriganyira liwe, kandi ngʼobubuya bunene buwe bʼolwanzo.

⁸Kusangwa abĩrĩbũga ati, Kwenene, ibo bo bandu bage, abagala abatekola omwʼibiha. Naye mwabya Mũlamya wabo atya.

⁹Omo malĩge wabo gosĩ naye mwagalwa, nʼomũlaĩka wʼembere siwe mwalamyabo. Mwatongolyabo omo lwanzo luwe nʼerisasira liwe. Kandi mwatelulabo, mwahekabo ebiro byosĩ bya kera.

¹⁰Nĩkwa mobahona, mobagalĩranĩa Omũlĩmũ wuwe Abũyĩrĩre. Busana nʼekyo mwabinduka eribya nzĩgũ yabo, kandi mwalwa nabo.

¹¹Neryo abandu buwe mobibuka ebiro bya kera, mobibuka ebiro bya Musa. Alihi oyo wasabũkayabo erĩlũa omo ngetsi haguma nʼabalĩsya bʼekĩhyo kiwe kwehĩ? Ali hahi oyo wahĩra Omũlĩmũ wuwe Abũyĩrĩre omo katĩkatĩ kabo kwehĩ?

¹²Oyo walolaya okuboko kuwe kʼolukengerwa oko byala byʼamali bya Musa kwehĩ? Oyo wagaba amagetsi embere syabo, eriyibanira erĩna lyʼerikota kwehĩ?

¹³Oyo wasondolabo omo mitobero kwehĩ? Ngʼesabayĩrĩ omo mbwarara, mobatatwĩkala.

¹⁴Ngʼesyonde esikandagalira omo musya, Omũlĩmũ wʼOmwami Mukulu mwalũhũkyabo. Ko wasondola abandu bawe bʼutya, eriyibanira erĩna lyʼolukengerwa.

¹⁵Usamalire eyĩkwa wʼelubula, usamalire eyĩkwa wʼahʼerĩĩkala lĩbũyĩrĩre lyawe nʼolukengerwa lwawe. Omũhwa wawe nʼemĩbĩrĩ yĩkala-kalĩre yawe biri hahi kwehĩ? Olukando lwʼomutima wawe nʼeriganyira lyawe byabĩrĩkakĩrĩbwa ũkwʼĩngye.

¹⁶Kusangwa uli Tata wetu, nomo Abrahamũ atanatwasĩ, na Ĩsraelĩ sialituminya. Uwe, Mwami Mukulu uli Tata wetu, Omũtongolya wetu erĩtsũka kera lyo lĩna lyawe.

¹⁷Uwe Mwami Mukulu busana nakĩ ũkatũtalĩsaya oko nzira syawe, nʼerĩkalya emitima yetu eritendikubaha kwehĩ? Usubule busana nʼabakobe bawe, ebihanda byʼomwandu wawe.

¹⁸Abandu bawe babũyĩrĩre mobasĩgalya ahabũyĩrĩre hawe oko katambĩ kake. Esyonzĩgũ syetu syabiriryatangirira ahabũyĩrĩre hawe.

¹⁹Twabiribya ngʼabandu ute watatabalako na kera, ngʼabandu abatahulawa omo lĩna lyawe.