Read nande Ĩsaya 65 Bible Online

Ĩsaya 65 - nande bible

Ĩsaya 65

¹Monalĩga abandu erinyisondasonda abatambũlaya. Monalĩga eribanika ukwʼabo abatanyisonda-sonda. Monabũga nʼekihanda ekitalakira erĩna lyage nyiti, Ĩngye yono hano, ĩngye yono hano.

²Nabĩrĩkanganĩa ebyala byage omo musibo gosĩ oko bandu bʼerihona, abakalendera omo nzira ĩtowene, ibakakwama amalengekanĩa wabo.

³Ni bandu abakanyĩhĩtanaya ebiro byosĩ oko bũsũ bwage, abakahongera amahere omo malima, nʼerĩhĩsya obukwa oko matafalĩ.

⁴Abakĩkala omo masinda, nʼerisiba omo kiro ahabĩsamĩre. Abakalya esĩswĩ syʼengulube, nʼomuto wʼesĩswĩ syʼesyonye siri omo nyungu syabo.

⁵Abakabũga bati, Ubye aho ĩwowene, siwase hakũhĩ nage, kusangwa indi mũbũyĩrĩre kwilaba we. Aba nĩ mũkĩ omo nĩndo yage, omuliro owakaka omo musibo gosĩ.

⁶Lebaya, ekĩ kĩsakĩre embere syage: Sindiendisyahuna, nĩkwa nasyaliha, ega nasyaliha omo kĩkũba kyabo.

⁷Omwami Mukulu ati, Ebibi byenyũ nʼebibi byʼabotata wenyũ haguma. Kusangwa babĩrĩhĩsya obukwa oko bitwa, nʼerinyipona oko hitwa. Busana nʼekyo nasyalenga omũbĩrĩ wabo wʼerĩmbere omo bĩkũba byabo.

⁸Omwami Mukulu ati, Ngʼebĩnyũ bihya-bihya bikabanika omo kĩkũto, nʼomundu muguma ĩnĩabũga ati, Sũtsandayekyo, kusangwa endũndĩ iri mukyo, ko nasyakola nyitya busana nʼabagombe bage, ĩsĩnangaheryabo abosĩ.

⁹Nage nasyahũlũkya abana umu Yakobo, nʼomũlĩ wʼomwandu wʼebitwa byage umu Yũda. Nʼabayisogawa bage basyasĩgalyakyo, nʼabagombe bage basyĩkalaho.

¹⁰NʼeSaronĩ yasyabya olũlĩsĩryo busana nʼebĩhyo byʼesyombũlĩ, nʼomusya wʼeAkorĩ ahʼeribundama busana nʼebihangulo, busana nʼabandu bage abakanyisonda-sonda.

¹¹Nĩkwa ĩnywe mũkasĩga Omwami Mukulu, ĩnywe mukibirirawa ekitwa kyage kĩbũyĩrĩre, ĩnywe mukasesa emesa busana na Gadĩ, ĩnywe mũkũsũlĩraya ebĩnyũ bĩtũlũngene busana na Menĩ.

¹²Neryo nasyabalayirira omũyalĩ, nʼĩnywe bosĩ mwasyũnamira erĩĩtwa. Kusangwa nabirikira, nĩkwa momutitaba. Monabũga, momũtowa. Nĩkwa momwakola ebibi omo meso wage, kandi momwayisoga ebyo ndetsemera.

¹³Busana nʼekyo, Omukama Omwami Mukulu ati, Lebaya, abagombe bage basyalya, nĩkwa ĩnywe mwasyakwa enzala. Lebaya, abagombe bage basyapũlya, nĩkwa ĩnywe mwasyakwa enyota. Lebaya, abagombe bage basyatsema, nĩkwa ĩnywe mwasyahemuka.

¹⁴Lebaya, abagombe bage basyũta obogo mo butseme bʼomutima, nĩkwa ĩnywe mwasyalira omo bũlĩge obʼomutima, kandi mwasyayilakira busana nʼekĩrĩmũ kĩbũnĩkĩre.

¹⁵Kandi mwasyasĩga erĩna lyenyũ eribya kĩtsũmĩ oko bayisogawa bage, Omukama Omwami Mukulu asyabĩta. Nĩkwa abagombe bage basyahulwa omo lindi rĩna.

¹⁶Kusangwa oyukatsumulawa omo kihugo, asyatsumulwa uku Nyamuhanga wʼekwenene. Oyũkalahĩrĩraya omo kihugo, asyalahĩrya uku Nyamuhanga wʼekwenene, kusangwa amalĩge wʼerĩmbere iniamabibiriranwa, kandi kusangwa abĩsamĩre oko meso wage!

¹⁷Kusangwa lebaya, ngahangika olubula luhya-luhya nʼekihugo kihya-kihya nʼemyatsi yʼerĩmbere siyendisyasyibukwa, kutse erĩhĩka oko mutima.

¹⁸Nĩkwa emigulu yosĩ mutseme mutsange umwʼebyo ngahangika, kusangwa lebaya, ngahangika eYerũsalema eribya bũyĩsyandiro, nʼabandu bago eribya busana nʼobutseme.

¹⁹Kandi nasyatsemera eYerũsalema, nʼerĩyĩsyandirira omo bandu bage, neryo sĩhendĩsyasyowĩbwa omulenge wʼekiriro nʼomulenge wʼerĩsũsũmanĩa.

²⁰Sihendisyaswabya lumekeke lwʼebiro bike, kutse musyakulu oyute waberererya ebiro biwe, kusangwa omwana asyahola ini wʼemyaka erĩgana, nʼoyũtehĩka oko myaka erĩgana, basyamwahula mo mutakirwa.

²¹Kandi basyahĩmba amanyũmba nʼerĩĩkala mugo. Basyahera amalima wʼebĩnyũ nʼerirya ebĩgũma byago.

²²Sĩbendĩsyahĩmba, nʼogundi akĩkala muyo. Sibendisyabiba nʼogundi akalyabyo. Kusangwa ebiro byʼabandu bage byasyabya ngʼebiro byʼomuti, nʼabayisogawa bage basyatsemera omũbĩrĩ wʼebyala byabo emigulu miri.

²³Sibendisyakolera busa, kutse eributa abana busana nʼobũlĩge: kusangwa ni bana bʼabandu Omwami Mukulu akatsumula, nʼabitsikulu babo haguma nabo.

²⁴Neryo kyasyabya bate babirikira, nasyasũbĩrya. Omugulu bakĩnabũga, nasyowa.

²⁵Omukenge nʼekyana kyʼembũlĩ byasyalira haguma, nʼendale yasyalya ebiti ngʼende, nʼolũtũtũ lwasyabya kalyo kʼenzoka. Sisyendisyakola ebibi kutse omwaga omo kitwa kyage kyosĩ kĩbũyĩrĩre, Omwami Mukulu atya.