Read nande Ĩsaya 66 Bible Online

Ĩsaya 66 - nande bible

Ĩsaya 66

¹Omwami Mukulu ati, Olubula nĩ kĩtũmbĩ kyage kyʼobwami, nʼekihugo nĩ kĩtũmbĩ kyʼebisando byage. Enyũmba iri hahi eyo mwasyambĩmbĩra kwehĩ? Nʼaho nasyaluhukira ni hahi kwehĩ?

²Kusangwa ebyala byage byo byakola ebĩ byosĩ, nʼebindu ebĩ byosĩ mobyabyaho bitya, Omwami Mukulu atya. Nĩkwa nasyasamalira omundu oyũkayĩkehaya nʼowʼekĩrĩmũ kihehere, nʼoyukatitimana busana nʼekĩnywa kyage.

³Oyukakera ende ali ngʼoyũkĩta omundu. Oyukahonga ekyana kyʼembũlĩ alingene nʼovũkabũna ebĩkya byʼembwa. Oyukahera obuhere bwʼengano ali ngʼovukahera omusasi wʼengulube. Oyũkokaya obukwa ali ngʼoyukatsumula esanamu. Kusangwa babiriyisoga esyonzira syabo, nʼomutima wabo akatsemera esyonye syabo;

⁴Nage nibya nasyayisoga erisuyirabo, kandi nasyaleterabo ebyo bakubaha. Kusangwa nabirikira, nĩkwa isihali oyo witaba. Monabũga, nĩkwa mobatahulikirira. Mobakolera ebibi omo meso wage, mobayisoga ebyo ndetsemera.

⁵Mowe kĩnywa kyʼOmwami Mukulu, ĩnywe mukatitimanira ekĩnywa kiwe: Abagala benyũ abakabakwa obusu, abakabagana busana nʼerĩna lyage, babĩrĩbũga bati, Omwami Mukulu apipawe, itwatoka erilola oko butseme bwenyũ. Nĩkwa basyahemulwa.

⁶Omulenge wʼolukanda lũkalũa eka! Omulenge akalũa omo Hekalũ, Ni mulenge wʼOmwami Mukulu oyukaliha endĩhĩ yʼesyonzĩgũ siwe.

⁷Embere ate akunda, mwabuta. Obwagalĩ bute bwahĩka, mwabuta omũlwana.

⁸Nindi abĩrĩowa ekĩnywa ngʼekĩ kwehĩ? Nindi wabirilola oko myatsi ngʼeyĩ kwehĩ? Ekihugo kyanganabutwa kiro kiguma kwehĩ? Ekihanda kyanganabutwa iguma kwehĩ? Kusangwa omugulu Sĩonĩ akunda, Mwabuta bagala buwe nibya.

⁹Omwami Mukulu ati, Nasyabalyatya okwʼibuta, ĩsĩnangababũtya kwehĩ? Nyamuhanga wawe ati, Kutse ĩngye oyũkabũtaya, ĩnaswalĩba enda kwehĩ?

¹⁰Mutseme haguma nʼeYerũsalema, mutsemereko ĩnywe bosĩ mwanzĩreko. Ĩnywe bosĩ mukalirirako, mutseme kutsibu haguma nayo omo butseme.

¹¹Mutoke erionga nʼerĩũgũta omo mabere wago wʼerĩsĩbĩkya. Imwatoka erionga nʼerĩtsemesĩbwa omo lukengerwa luwe lunene.

¹²Kusangwa Omwami Mukulu ati, Lebaya, nasyamũhererya Obuholo ngʼolũsĩ, nʼolukengerwa lwʼebihanda ngʼolũsĩ lũbwayĩre. Nenyũ mwasyonga, mwasyahekwa oko ndungu, mwasyasumbangirwa oko marwĩ.

¹³Ngʼoyũkalembesanĩbawa na nyĩnya wuwe, ko nasyabalembesanĩa nyitya kandi mwasyakĩranĩbwa eYerũsalema.

¹⁴Nenyũ mwasyalangirakyo, nʼemitima yenyũ yasyatsema, nʼamakũha wenyũ asyaboga ngʼebiti bibisi bihya-bihya. Ebyala byʼOmwami Mukulu byasyaminyikala oko bagombe buwe, nĩkwa asyabya nʼerihitana busana nʼesyonzĩgũ siwe.

¹⁵Kusangwa lebaya, Omwami Mukulu asyasa nʼomuliro, nʼesyogalĩ siwe syasyasa ngʼerihunga lyʼakanyabungu, erĩberererya erihitana liwe omo bukali, nʼerihaya liwe omo birimi byʼomuliro.

¹⁶Kusangwa Omwami Mukulu asyaberererya eritswera omo muliro nʼomo mũyalĩ wuwe oko mibiri yosĩ. Nʼabo abakandĩsyĩtwa nʼOmwami Mukulu basyabya bangi.

¹⁷Abakayisolola nʼerĩyerya eriya omo malima, erikwama oyuli omo katĩkatĩ, abakalya esĩswĩ syʼengulube, nʼebyʼesyonye, nʼembeba, basyahwerera haguma, Omwami Mukulu atya.

¹⁸Kusangwa nyĩnasĩ emĩbĩrĩ yabo nʼamalengekanĩa wabo. Omugulu asyasa wʼerĩhĩndanĩa ebihanda byosĩ nʼemĩbũge yosĩ. Nabo basyasa ibalangira olukengerwa lwage.

¹⁹Nage nasyahĩra ekiminyikalo omo katĩkatĩ kabo, kandi nasyatuma abakabala ba kubo oko bihanda: eTarsisi, ePũlĩ, nʼeLũdĩ, nʼabakakanda obuta, eTũbalĩ, nʼeYawanĩ, oko mĩsĩke yʼengetsi eyiri hali, abatetowa engulu yage kutse erilangira olukengerwa lwage. Nabo basyatũla omwatsi wʼolukengerwa lwage omo katĩkatĩ kʼebihanda.

²⁰Neryo basyaleta abagala benyũ bosĩ abakalũa omo bihanda byosĩ busana nʼeribya ehongo yʼengano busana nʼOmwami Mukulu ĩbahekĩrwe oko syosabayĩrĩ, nʼoko syogalĩ, nʼoko syongyingo, nʼoko syonyumbu, nʼoko syongamia, oko kitwa kyage kĩbũyĩrĩre eYerũsalema, Omwami Mukulu atya, ngoko bana ba Ĩsraelĩ ko bakaleta ehongo yabo yʼengano omo nyũmba yʼOmwami Mukulu omo nyungu yerĩre.

²¹Omwami Mukulu ati, Nasyahamba abandi ba kubo eribya bahererĩ nʼAbalawĩ.

²²Kusangwa Omwami Mukulu ati, Ngoko lubula luhya-luhya nʼekihugo kihya-kihya, ebyo nasyahangika byasyakota ndeke embere syage, litya abana benyũ nʼerĩna lyenyũ ko byasyakota bitya.

²³Omwami Mukulu ati, Kyasyabya erĩtsũka oko mukera muhya-muhya erĩhĩka oko gundi, nʼerĩtsũka oko Sabato nguma erĩhĩka oko yindi, abandu bosĩ basyasa erĩũnama embere syage.

²⁴Neryo basyahuluka nʼerisamalira ebĩnda byʼabandu ababĩrĩnyĩhalyako. Kusangwa emihuka yabo siyendisyahola, kutse omuliro wabo sĩendĩsyalĩma, nabo basyabya nye oko bandu bosĩ.