Read nande Abalawĩ 12 Bible Online

Abalawĩ 12 - nande bible

Abalawĩ 12

¹Kandi Omwami Mukulu mwabũga na Musa, ati,

²Ubwire abana ba Ĩsraelĩ, uti, Omũkalĩ amaheka obukule, akabuta omwana wʼobulume, asyabya mũtsandĩrya ebiro birinda; ngʼomo biro byʼemĩtĩndũ yʼeribya oko mugesera.

³Nʼoko kiro kyʼomunani omwana asyabanĩbwa.

⁴Neryo nyĩnya asyabya omo musasi wʼeriera liwe ebiro makũmĩ asatu nʼebisatu; sĩendĩsyatũla oko kindu kĩbũyĩrĩre, kutse eriingira ahabũyĩrĩre, erĩhĩka aho ebiro biwe byʼeriera byasyahĩkana.

⁵Nĩkwa amabuta omwana wʼobũkalĩ, neryo asyabya mũtsandĩrya oko yenga ĩbĩrĩ, ngʼomwʼitsanda lyʼeribya oko mugesera; kandi asyabya omo musasi wʼeriera liwe ebiro makũmĩ ndatu nʼendatu.

⁶Neryo ebiro byʼeriera liwe byasyabya byabĩhĩkana, busana nʼomugala, kutse busana na mwali, asyaletera omũhererĩ ekyana kyʼembũlĩ kyʼomwaka muguma busana nʼobuhere bwʼerĩokererya, nʼakalĩkũkũ kalere, kutse akatungula, busana nʼobuhere bwʼebibi oko lũkyo lwʼeHema yʼerĩhĩndanamo.

⁷Naye asyaherabo embere syʼOmwami Mukulu, nʼerĩmũsanganĩa omo mbanulo, naye asyerĩbwa okwʼĩtsũrũrũka lyʼomusasi wuwe. Ekĩ ni kihano busana nʼoyukabuta omwana wʼobulume kutse owʼobũkalĩ.

⁸Amalindatoka eribana ekyana kyʼembũlĩ, neryo ĩnĩmya ehitungula hibiri, kutse ehĩrĩkũkũ hibiri hirere, akaguma kʼobuhere bwʼerĩokererya, nʼakandi busana nʼobuhere bwʼebibi; nʼomũhererĩ asyamũsanganĩa omo mbanulo, naye asyera.