Read nande Abalawĩ 14 Bible Online

Abalawĩ 14 - nande bible

Abalawĩ 14

¹Neryo Omwami Mukulu mwabũga na Musa ati,

²Ekĩ ni kihano kyʼomuhaga omo kiro kyʼeriera liwe; asyaletwa oko mũhererĩ;

³nʼomũhererĩ asyaya ekyaswa kyʼekilaliriro. Nʼomũhererĩ asyayĩtegererya; neryo, obũkonĩ bwʼebihaga bwamabala oko muhaga,

⁴omũhererĩ asyahana ati bahambire oyũkerĩbawa yʼehĩnyonyũ hibiri ehiriho nʼehyowene, nʼomuti wʼomũerezĩ, nʼengohe yʼengula, nʼomukambi.

⁵Neryo omũhererĩ asyahana ati enyonyũ nguma yikererawe omo nyungu yʼeribumba endata oko magetsi awakasenda.

⁶Neryo enyonyũ eyiriho, asyahambayo haguma nʼomuti wʼomũerezĩ, nʼengohe yʼengula, nʼomukambi, asyalũbĩkabyo haguma nʼenyonyũ eyiriho omo musasi wʼenyonyũ eyiriakerawa endata oko magetsi awakasenda.

⁷Neryo asyatsatsangago oko yũkerĩbawa kwʼebihaga engendo sirinda, neryo asyamwahula mʼoyo werĩre, neryo asyalwĩkĩra enyonyũ eyiriho omo kisuki.

⁸Nʼoyũkerĩbawa asyerya esyongimba siwe, nʼerĩsĩsa esyonzwiri siwe syosĩ, nʼeriyikosa omo magetsi, neryo iniera. Nʼenyũma wʼaho ĩnĩahĩka omo kilaliriro, nĩkwa asyĩkala eyĩhya wʼehema yiwe ebiro birinda.

⁹Neryo oko kiro kyʼebirinda, asyasĩsa esyonzwiri siwe syosĩ; omutwe wuwe nʼesyonderũ siwe nʼebĩkĩge biwe, esyonzwiri siwe syosĩ. Neryo asyerya esyongimba siwe, asyakosa omubiri wuwe omo magetsi, neryo asyera.

¹⁰Nʼoko kiro kyʼomunani asyĩmya ehibangale hibiri hyʼembũlĩ ehite ko bulema, nʼekitsugutsi kyʼembũlĩ ekyʼomwaka muguma ekite ko bulema, nʼebitswe bisatu byʼomwʼĩkũmĩ byʼekitiri kyʼeyĩsyano yʼenzelele busana nʼobuhere bwʼeyĩsyano, obũtũlũngene nʼamagũta, nʼekibindi kiguma kyʼamagũta.

¹¹Nʼomũhererĩ oyũkamweraya asyahĩra omundu oyũkerĩbawa haguma nʼebindu ebyo, embere syʼOmwami Mukulu, oko lũkyo lwʼeHema yʼerĩhĩndanamo.

¹²Nʼomũhererĩ asyĩmya akaguma kʼoko hibangale, nʼerihako busana nʼobuhere bwʼolubanza, nʼekibindi kyʼamagũta, nʼerĩhũnga-hũngyabyo busana nʼobuhere bwʼerĩhũnga-hũngya embere syʼOmwami Mukulu.

¹³Neryo asyakera akabangale aho bakakerera obuhere bwʼebibi nʼobuhere bwʼerĩokererya, ahabũyĩrĩre; kusangwa ngoko buhere bwʼebibi ni bʼomũhererĩ, obuhere bwʼolubanza ko bune butya, bũbũyĩrĩre kutsibu.

¹⁴Kandi omũhererĩ asyĩmya oko musasi wʼobuhere bwʼolubanza, nʼomũhererĩ asyahĩrago oko mutwe wʼokũtũ kwʼamali kwʼoyũkerĩbawa, nʼoko kikumo kyʼebyala biwe byʼamali, nʼokwʼĩno lyʼobulume ryʼekisando kiwe kyʼamali.

¹⁵Nʼomũhererĩ asyĩmya ekibindi kyʼamagũta, nʼerĩũtago omo kiganza kyʼebyala biwe byʼamalembe;

¹⁶nʼomũhererĩ asyahĩra omunwe wuwe wʼamali gʼomo magũta awali omo byala biwe byʼamalembe, neryo iniatsatsanga amagũta engendo sirinda omo munwe wuwe embere syʼOmwani Mukulu.

¹⁷Nʼawakasaka oko magũta awali omo byala biwe, omũhererĩ asyahĩrago oko mutwe wʼokũtũ kwʼamali kwʼoyũkerĩbawa, nʼoko kikumo kyʼebyala biwe byʼamali, nʼokwʼĩno lyʼobulume ryʼekisando kiwe kyʼamali, oko musasi wʼobuhere bwʼolubanza;

¹⁸nʼawakasaka oko magũta awali omo byala byʼomũhererĩ asyahĩrago oko mutwe wʼoyũkerĩbawa; nʼomũhererĩ asyamũsanganĩa omo mbanulo embere syʼOmwami Mukulu.

¹⁹Nʼomũhererĩ asyahera obuhere bwʼebibi, nʼerikolera oyũkerĩbawa yʼembanulo busana nʼemĩtĩndũ yiwe. Nʼenyũma wʼaho asyakera obuhere bwʼerĩokererya.

²⁰Nʼomũhererĩ asyahera obuhere bwʼerĩokererya nʼobuhere bwʼeyĩsyano yʼengano oko kiherero. Neryo omũhererĩ asyamũsanganĩa omo mbanulo, neryo asyera.

²¹Nĩkwa amabya mwera, isiangatoka eribana ebyo, asyĩmya akabangale kaguma busana nʼobuhere bwʼolubanza busana nʼerĩhũnga-hũngya, erimukolera embanulo nʼekitswe kiguma kyʼomwʼĩkũmĩ, ekitiri kyʼeyĩsyano yʼenzelele eyĩtũlũngene nʼamagũta busana nʼobuhere bwʼeyĩsyano yʼengano, nʼekibindi kyʼamagũta;

²²nʼehitungula hibiri, kutse ehĩrĩkũkũ hirere, ngoko angatoka eribanahyo; nʼakaguma kasyabya buhere bwʼebibi, nʼakandi, obuhere bwʼerĩokererya.

²³Nʼoko kiro kyʼomunani inialetahyo oko mũhererĩ busana nʼeriera liwe oko lũkyo lwʼeHema yʼerĩhĩndanamo embere syʼOmwami Mukulu.

²⁴Nʼomũhererĩ asyĩmya ekyana kyʼembũlĩ kyʼobuhere bwʼolubanza, nʼekibindi amagũta, nʼomũhererĩ asyahera kyʼbyo busana nʼobuhere bwʼerĩhũnga-hũngya embere syʼOmwami Mukulu,

²⁵Neryo asyakera ekyana kyʼembũlĩ kyʼobuhere bwʼolubanza; nʼomũhererĩ asyĩmya oko musasi wʼobuhere bwʼolubanza, nʼerĩhĩrago oko mutwe wʼokũtũ kwʼamali kʼoyũkasyerĩbawa, nʼoko kikumo kyʼebyala biwe byʼamali, nʼokwʼĩno lyʼobulume lyʼekisando kiwe kyʼamali.

²⁶Nʼomũhererĩ asyũta oko magũta omo kiganza kyʼebyala biwe byʼamalembe.

²⁷Nʼomũhererĩ asyatsatsanga omo munwe wuwe wʼamali otũgũta tuke-tuke otuli omo byala biwe byʼamalembe ngendo sirinda embere syʼOmwami Mukulu.

²⁸Neryo omũhererĩ asyahĩra oko magũta awali omo byala biwe oko mutwemutwe wʼokũtũ kwʼamali kwʼoyũkandĩsyerĩbwa, nʼoko kikumo kyʼebyala biwe byʼamali, nʼokwĩno lyʼobulume lyʼekisando kiwe kyʼamali, omo mwanya wʼomusasi wʼobuhere bwʼolubanza.

²⁹Amagũta awakasaka awali omo byala byʼomũhererĩ asyahĩrago oko mutwe wʼoyũkandĩsyerĩbwa, erĩmũsanganĩa omo mbanulo embere syʼOmwami Mukulu.

³⁰Kandi asyahera akaguma kʼehitungula, kutse kʼehĩrĩkũkũ hirere ngoko angatoka eribanako.

³¹Asyahera ngoko angatoka eribanako, akaguma busana nʼobuhere bwʼebibi, nʼakandi busana nʼobuhere bwʼerĩokererya, haguma nʼobuhere bwʼeyĩsyano yʼengano. Nʼomũhererĩ asyasanganĩa oyũkasyerĩbawa omo mbanulo embere syʼOmwami Mukulu.

³²Ekĩ ni kihano kyʼoyukabanika kʼobũkonĩ bwʼebihaga oyute nʼebindu busana nʼeriera liwe.

³³Kandi Omwami Mukulu mwabũga na Musa na Harũnĩ, ati,

³⁴Omugulu mũkahĩka omo kihugo kyʼeKanana, ekyo ngabaha mo kitaka kyenyũ, neryo ngahĩra ekiminyikalo kyʼebihaga oko nyũmba omo kihugo kyʼekitaka kyenyũ;

³⁵neryo Omwenye enyũmba asyasa eribwira omũhererĩ, ati, Ngalebaya omo nyũmba nga muli kiminyikalo kyʼebihaga.

³⁶Neryo omũhererĩ asyahana ati balũsaye ebindu byosĩ byʼomo nyũmba, omũhererĩ ate ingiramo erĩrebya ekiminyikalo ekyo, ebyosĩ ebiri omo nyũmba sibiyirawe mo bĩtsandĩrya; nʼenyũma wʼaho omũhererĩ asyingira erĩyĩtegererya enyũmba.

³⁷Neryo omũhererĩ asyayĩtegererya ekiminyikalo ekyo, neryo ekiminyikalo oko mbĩmbo syʼenyũmbakyamabya kiwite mirera-mirera, omwisi ngʼebiti bibisi kutse ngʼengula nʼerisosa lyʼaho likingira omwisi wʼolũhĩmbo;

³⁸neryo omũhererĩ asyahuluka omo lũkyo lwʼenyũmba, nʼerikinga enyũmba yo biro birinda.

³⁹Neryo omũhererĩ asyasubaho ekiro kyʼakalinda, nʼerĩyĩtegererya. Neryo ekiminyikalo ekyo kyamabitanda omo mbĩmbo syʼenyũmba,

⁴⁰neryo omũhererĩ asyahanabo ati basambule amabwe awali mwʼekiminyikalo, nʼerigusago oko kyabũ omo kyaswa kyʼomũyĩ.

⁴¹Neryo asyahamula erikorogota enyũmba yʼomwisi erĩtĩmbamo, neryo basyũta embembe yaʼhalyakorogotawa omo kyaswa kyʼomũyĩ oko kyabũ.

⁴²Neryo basyĩmya awandi mabwe, nʼerĩhĩrago omo myanya yʼawandi mabwe; neryo asyĩmya eyindi mdemba, nʼerĩhakabyayo omo nyũmba.

⁴³Nĩkwa ekiminyikalo ekyo, kyamaswahuluka omo nyũmba, enyũma wʼerĩlũsyamo amabwe nʼenyũma wʼerikorogota enyũmba, nʼenyũma wʼerĩhakabyamo embemba.

⁴⁴Neryo omũhererĩ asyingiramo erĩyĩtegererya. Neryo amalangira ekiminyikalo ikyabiritandana omo nyũmba, ni kibute kĩkalĩre; ĩnĩ nyĩtsandĩrya.

⁴⁵Neryo asyasambula enyũmba eyo, nʼamabwe wayo, nʼemiti yayo, nʼembemba yosĩ yʼenyũmba eyo; neryo asyahekerabyo ekyaswa kyʼomũyi oko kyabu.

⁴⁶Kandi oyukingira omo nyũmba eyo omugulu ĩkĩngĩre asyabya mũtsandĩrya erĩhĩka omwʼĩgolo-golo.

⁴⁷Nʼoyukagotsera omo nyũmba eyo asyerya esyongimba siwe; nʼoyukalira omo nyũmba eyo asyerya esyongimba siwe.

⁴⁸Neryo omũhererĩ amingira, nʼerĩyĩtegererya, neryo, ekiminyikalo ekyo isikyetatanda omo nyũmba, yabĩhakabĩbwa embemba; omũhererĩ asyahula enyũmba eyo mo yerĩre, kusangwa ekiminyikalo ekyo sikyetaswahuluka.

⁴⁹Neryo busana nʼerĩerya enyũmba eyo asyĩmya esyonyonyũ ĩbĩrĩ, nʼomuti wʼomũerezĩ, nʼengohe yʼengula, nʼomukambi;

⁵⁰neryo asyakerera akaguma kʼesyonyonyũ omwʼĩrega lyʼeribumba endata oko magetsi awakasenda.

⁵¹Neryo asyĩmya omuti wʼomũerezĩ nʼomukambi, nʼengohe yʼengula, nʼenyonyũ eyiriho, nʼerĩlũbĩkabyo omo musasi wʼenyonyũ eyiryakerawa, nʼomo magetsi awakasenda nʼeritsatsanga oko nyũmba ngendo sirinda.

⁵²Kandi asyerya enyũmba eyo omo musasi wʼenyonyũ, nʼomo magetsi awakasenda, nʼomo nyonyũ eyiriho, nʼomo muti wʼomũerezĩ, nʼomo mukambi, nʼomo ngohe yʼengula.

⁵³Nĩkwa enyonyũ eyiriho asyalwĩkĩrayo ekyaswa kyʼomũyĩ omo bwerere. Neryo asyalihira enyũmba eyo embanulo yʼatya; nayo yasyabya eyerĩre.

⁵⁴Ekĩ ni kihano kyʼemĩsĩndo yosĩ yʼebiminyikalo byʼebihaga, nʼobwʼebĩsũlĩ,

⁵⁵kandi busana nʼebihaga byʼolukimba, nʼebyʼenyũmba,

⁵⁶na busana nʼekĩsũsũ kyʼerĩbĩmba nʼekĩkokyo, nʼekĩtĩngũ kĩhenĩrye;

⁵⁷erĩkangya omugulu kĩtsandĩre, nʼomugulu kyerĩre. Ekĩ kye kihano kyʼebihaga.