Read nande Abalawĩ 15 Bible Online

Abalawĩ 15 - nande bible

Abalawĩ 15

¹Kandi Omwami Mukulu mwabũga na Musa na Harũnĩ, ati,

²Ubwire abana ba Ĩsraelĩ mũbũge nabo muti omugulu omundu akakwa ekinyaro kĩkalũa omo mubiri wuwe, nĩ mũtsandĩ rya busana nʼekinyaro ekyo.

³Nʼobũ bwasyabya bũtsandĩrya buwe busana nʼekinyaro kiwe; omubiri wuwe amalĩga erisenda mwʼekinyaro kiwe, kutse omubiri wuwe amatũlera oko kinyaro kiwe, nĩ bũtsandĩrya buwe.

⁴Obuli ngyingo oyũkwĩre ekinyaro akagotserako yasyabya nyĩtsandĩrya; nʼobuli kindu asyĩkalako kyasyabya kĩtsandĩrya.

⁵Nʼoyũkatũla oko ngyingo yiwe asyerya esyongimba siwe, nʼeriyikosa omo magetsi, iniabya mũtsandĩrya erĩhĩka omwʼĩgolo-golo.

⁶Nʼoyũkĩkala oko kĩndũkĩ ekyo yũkwĩre ekinyaro ĩkalako asyerya esyongimba siwe, nʼeriyikosa omo magetsi, naye asyabya mũtsandĩrya erĩhĩka omwʼĩgolo-golo.

⁷Nʼoyũkatũla oko mubiri wʼoyũkwĩre ekinyaro, asyerya esyongimba siwe nʼeriyikosa omo magetsi nʼeribya mũtsandĩrya erĩhĩka omwʼĩgolo-golo.

⁸Nʼoyũkwĩre ekinyaro amatwĩra ebitande oko yo werĩre, neryo ĩnĩerya esyongimba siwe, nʼeriyikosa omo magetsi, nʼeribya mũtsandĩrya erĩhĩka okwʼĩgolo-golo.

⁹Nʼekiseso kyahi ekyoyũkwĩre ekinyaro akagenderako kyasyabya kĩtsandĩrya.

¹⁰Nʼomundu oyũkatũla oko kĩndũkĩ ekyo alwe ĩkereko asyabya mũtsandĩrya erĩhĩka omwʼĩgologolo; nʼoyo wasyaheka ebindu ebyo, asyerya esyongimba siwe nʼeriyikosa omo magetsi, iniabya mũtsandĩrya erĩhĩka omwʼigolo-golo.

¹¹Nʼoyũkatũlawako nʼoyũkwĩre ekinyaro, ate anabya ebyala biwe omo magetsi, asyerya esyongimba siwe, nʼeriyikosa omo magetsi, kandi iniabya mũtsandĩrya erĩhĩka omwʼĩgologolo.

¹²Nʼenyungu yʼeribumba eyĩkatũlawako nʼoyũkwĩre ekinyaro, yasyatulangwa; nʼobuli kibindi kyʼomuti kyasyerĩbwa omo magetsi.

¹³Nʼomugulu oyũkwĩre ekinyaro akerĩbawa kwʼekinyaro kiwe, asyayiganzira ebiro birinda busana nʼeriera liwe, asyerya esyongimba siwe; kandi asyakosa omubiri wuwe omo magetsi awakasenda, iniera.

¹⁴Nʼoko kiro kyʼomunani asyayĩmĩrya ehitungula hibiri, kutse ehyana hibiri hyʼakalĩkũkũ, ĩnĩahĩka embere syʼOmwami Mukulu oko lũkyo lwʼeHema yʼerĩhĩndanamo, nʼerihahyo oko mũhererĩ;

¹⁵nʼomũhererĩ asyaherahyo, akaguma busana nʼobuhere bwʼebibi, nʼakandi busana nʼobuhere bwʼerĩokererya; nʼomũhererĩ asyamũsanganĩa omo mbanulo embere syʼOmwami Mukulu busana nʼekinyaro.

¹⁶Kandi Omundundi obũhalya bwamamũlũamo, iniakosa omubiri wuwe gosĩ, iniabya mũtsandĩrya erĩhĩka omwʼĩgolo-golo.

¹⁷Nʼobuli lukimba, nʼobuli ngobĩ ebiri kwʼobũhalya, byasyerĩbwa omo magetsi, ibyabya bĩtsandĩrya erĩhĩka omwʼĩgolo-golo.

¹⁸Nʼomũkalĩ nibya oyo mulume akagotsera naye, ihali obũhalya, ababiri bosĩ basyayikosa omo magetsi, ibabya batsandĩrya erĩhĩka omwʼĩgologolo.

¹⁹Nʼomũkalĩ amabya nʼekikasendamo, ekikasenda kiwe ekyo omo mubiri wuwe kyamabya ini musasi, asyabya omo bũtsandĩrya buwe; ebiro birinda nʼomundu oyũkamũtũlako asyabya mũtsandĩrya erĩhĩka omwʼĩgolo-golo.

²⁰Nʼobuli kindu akagotsererako omo bũtsandĩrya buwe kyasyabya kĩtsandĩrya; nʼobuli kindu ekyo akĩkalako kyasyabya kĩtsandĩrya.

²¹Nʼoyũkatũla oko ngyingo yiwe asyerya esyongimba siwe, nʼeriyikosa omo magetsi, iniabya mũtsandĩrya erĩhĩka omwʼĩgolo-golo.

²²Nʼoyũkatũla oko kindu ekyo akĩkalako asyerya esyongimba siwe, nʼeriyikosa omo magetsi, iniabya mũtsandĩrya erĩhĩka omwʼĩgolo-golo.

²³Kyamabya oko ngyingo, kutse oko kindu ekyo akĩkalako, omugulu omundu akatũla kukyo, asyabya mũtsandĩrya erĩhĩka omwʼĩgolo-golo.

²⁴Nʼomulume wahi amagotsera naye nʼobũtsandĩrya buwe bukamubyako, asyabya mũtsandĩrya ebiro birinda; nʼobuli ngyingo akagotserako yasyabya nyĩtsandĩrya.

²⁵Kandi omũkalĩ amalũsya omusasi wuwe ebiro bingi ebite oko mugulu wʼomugesera wuwe; ebiro byasyabya ngʼebiro byʼomugesera wuwe; iye nĩ mũtsandĩrya.

²⁶Obuli ngyingo eyo akagotserako ebiro byosĩ byʼerĩlũsya omusasi yasyabya busana naye ngʼengyingo yʼomugesera wuwe; nʼekindu kyahi ekyo akĩkalako kyasyabya kĩtsandĩrya, ngʼobũtsandĩrya bʼomugesera wuwe.

²⁷Nʼoyũkatũla oko bindu ebyo asyabya mũtsandĩrya, kandi asyerya esyongimba siwe nʼeriyikosa omo magetsi, iniabya mũtsandĩrya erĩhĩka omwʼĩgolo-golo.

²⁸Nĩkwa amabĩũmbya, neryo asyayiganzira biro birinda, nʼenyũma wʼaho iniabya oyo werĩre.

²⁹Nʼoko kiro kyʼomunani asyayĩmĩrya ehitungula hibiri, kutse ehĩrĩkũkũ hirere-hirere hibiri, nʼerireterahyo omũhererĩ, oko lũkyo lwʼeHema yʼerĩhĩndanamo.

³⁰Nʼomũhererĩ asyahera akaguma busana nʼobuhere bwʼebibi, nʼakandi busana nʼobuhere bwʼerĩokererya, nʼomũhererĩ asyamũsanganĩa omo mbanulo embere syʼOmwami Mukulu busana nʼobũtsandĩrya buwe.

³¹Ko mwasyagaba mutya abana ba Ĩsraelĩ oko bũtsandĩrya bwabo, bakasyahola omo bũtsandĩrya bwabo, omugulu bakatsandaya eHema yage eyiri omo katĩkatĩ kabo.

³²Ebĩ bye bihano byʼoyũkalũsaya omusasi, nʼebyo wʼobũhalya obũkalũamo, ibwamuyira mo mũtsandĩrya;

³³nʼoko mũkalĩ oyulwere omo mugesera wuwe, nʼoko yũkwĩre ekikasenda, ekyʼomulume kutse ekyʼomũkalĩ, nʼoko yukagotsera nʼomũkalĩ oyũtsandĩre.