Read nande Abalawĩ 16 Bible Online

Abalawĩ 16 - nande bible

Abalawĩ 16

¹Kandi Omwami Mukulu mwabũga na Musa enyũma wʼerihola lyʼabagala babiri ba Harũnĩ, omugulu basegera embere syʼOmwami Mukulu, nʼerihola.

²Neryo Omwami Mukulu nwabũga na Musa ati, Ubwire Harũnĩ mugala wenyũ, uti syingire emigulu yosĩ omo mwanya wʼahabũyĩrĩre enyũma wʼolukimba olũkasũkũlĩraya embere wʼekĩtũmbĩ kyʼeriganyira ekiri endata wʼerĩsandũkũ; akasyahola; kusangwa nasyahuluka omo kĩtũ oko kĩtũmbĩ kyʼeriganyira.

³Harũnĩ asyingira ahabũyĩrĩre nʼebindu ebĩ: enume ndere busana nʼobuhere bwʼebibi, nʼembangale busana nʼobuhere bwʼerĩokererya.

⁴Asyambala erĩkotĩ ribũyĩrĩre lyʼekĩtanĩ, asyabya nʼakaputula kʼekĩtanĩ oko mubiri, kandi asyakũndĩkwa omukoba wʼekĩtanĩ, kandi asyambalĩbwa akakwa kʼekĩtanĩ; ni ngimba sĩbũyĩrĩre; asyakosa omubiri wuwe omo magetsi neryo iniambalasyo.

⁵Neryo asyĩmya oko ndeko yʼabagala ba Ĩsraelĩ esyombaya ĩbĩrĩ busana nʼobuhere bwʼebibi, nʼembangale nguma busana nʼobuhere bwʼerĩokererya.

⁶Kandi Harũnĩ asyaleta enume yʼende yʼobuhere bwʼebibi, eyiri busana naye, iniayirihira embanulo nʼekĩtũnga kiwe.

⁷Kandi asyĩmya esyombene ĩbĩrĩ nʼerĩsĩhĩra embere syʼOmwami Mukulu oko lũkyo lwʼeHema yʼerĩhĩndanamo.

⁸Na Harũnĩ mwagerekera esyombene ĩbĩrĩ; omugereko muguma busana nʼOmwami Mukulu, nʼogundi mugereko busana nʼembene yʼerihigwa.

⁹Na Harũnĩ asyaleta embene eyiryawira kʼomugereko busana nʼOmwami Mukulu, nʼeriherayo busana nʼobuhere bwʼebibi.

¹⁰Nĩkwa embene eyiriawira kʼomugereko busana nʼembene yʼerihigwa, yasyahĩka embere syʼOmwami Mukulu iyineho, eririhirayo embanulo nʼerĩlolyayo omo mbwarara ngʼembene yʼerihigwa.

¹¹Neryo Harũnĩ asyaleta enume yʼende yʼobuhere bwʼebibi busana naye, kandi asyayirihira embanulo busana nʼekĩtũnga kiwe, neryo asyakera enume eyo yʼobuhere bwʼebibi, busana naye.

¹²Neryo asyĩmya ekibindi ekyoswĩre mwʼamakala wʼomuliro akalũa oko kiherero embere syʼOmwami Mukulu, nʼebyala biwe ĩbyoswĩre mʼobukwa obukakumba ndeke, ĩbwabĩrĩtũndũlwa kutsibu, nʼeriretabo omo kisenge enyũma wʼekĩsũkũlĩryo kyʼehekalũ.

¹³Neryo asyahĩra obukwa obo oko muliro embere syʼOmwami Mukulu, ekĩtũ kyʼomũkĩ wʼobukwa ikyatoka eriswika ekĩtũmbĩ kyʼeriganyira, ekiri endata wʼerĩtũlago, akasyahola.

¹⁴Neryo asyĩmya oko musasi wʼenume yʼende, nʼeritsatsangago oko kĩtũmbĩ kyʼeriganyira omo munwe wuwe oko luhande olukasira kwʼeryuba; nʼembere syʼekĩtũmbĩ kyʼeriganyira asyatsatsanga kʼomusasi oyo omo munwe wuwe ngendo sirinda.

¹⁵Neryo asyakera embene yʼobuhere bwʼebibi, busana nʼabandu, nʼerireta omusasi wayo omo kisenge kyʼolukimba olũkasũkũlĩraya nʼerikola omusasi wayo ngoko akola nʼomusasi wʼenume yʼende, nʼerĩlagĩryago oko kĩtũmbĩ kyʼeriganyira, nʼembere syʼekĩtũmbĩ kyʼeriganyira.

¹⁶Neryo asyalihira embanulo yʼahabũyĩrĩre, busana nʼobũtsandĩrya bwʼabana ba Ĩsraelĩ, na busana nʼamalolo wabo, nʼebibi byabo byosĩ; kwʼasyakola atya busana nʼeHema yʼerĩhĩndanamo, eyĩkere haguma nabo omo katĩkatĩ kʼobũtsandĩrya bwabo.

¹⁷Sihasyebya mundu omo Hema yʼerĩhĩndanamo omugulu akingira eririhira embanulo yʼahabũyĩrĩre, erĩhĩka aho akalũĩramo, atoke eriyirihira embanulo busana nʼekĩtũnga kiwe, na busana nʼendeko yosĩ ya Ĩsraelĩ.

¹⁸Neryo asyahulukira ahali ekiherero ekiri embere syʼOmwami Mukulu, nʼeririhirakyo embanulo, neryo asyĩmya oko musasi wʼenume yʼende, nʼoko musasi wʼembene, ĩnĩahĩrago oko mahembe wʼekiherero oko mbande syosĩ.

¹⁹Kandi asyatsatsangaho omusasi omo munwe wuwe ngendo sirinda, nʼerĩeryakyo, nʼerihigulakyo oko mĩtĩndũ yʼabana ba Ĩsraelĩ.

²⁰Neryo asyabya abibuga eririhira ahabũyĩrĩre, nʼeHema yʼerĩhĩndanamo nʼekiherero, asyahera embene eyiriho.

²¹Na Harũnĩ asyahĩra ebyala biwe bibiri oko mutwe wʼembene eyiriho, nʼeribikulira kuyo kwʼebibi byosĩ byʼabana ba Ĩsraelĩ, nʼamalolo wabo, nʼebibi byabo byosĩ; neryo asyahĩrabyo oko mutwe wʼembene, nʼerĩlolyayo omo mbwarara, omo byala byʼomundu oyũsĩkĩre aho.

²²Nʼembene yasyaheka ebibi byabo byosĩ omo kihugo ekite mo bandu; naye asyalekerayo omo mbwarara.

²³Na Harũnĩ asyingira omo Hema yʼerĩhĩndanamo, asyambula esyongimba syʼekĩtanĩ, esyo ambala omugulu ingira ahabũyĩrĩre, neryo asyasĩga syoho.

²⁴Kandi asyakosa omubiri wuwe omo magetsi ahabũyĩrĩre, nʼeriambala esyongimba siwe, nʼerihuluka nʼerihera obuhere buwe bwʼerĩokererya nʼobuhere bwʼerĩokererya obwʼabandu, nʼeriyirihira embanulo, na busana nʼabandu.

²⁵Kandi asyahĩsĩrĩrya ebĩsabũ byʼobuhere bwʼebibi oko kiherero.

²⁶Nʼoyũkalwĩka embene erigenda busana nʼerihigwa, asyerya esyongimba siwe, nʼerikosa omubiri wuwe omo magetsi, nʼenyũma wʼaho asyingira omo mũyĩ wʼekilaliriro.

²⁷Nʼenume yʼende busana nʼobuhere bwʼebibi, nʼembene yʼobuhere bwʼebibi, omusasi wasyo owaletawa ahabũyĩrĩre, syasyatwalwa ekyaswa kyʼekilaliriro; kandi basyahĩsĩrĩrya esyongobĩ syasyo omo muliro nʼesĩswĩ syasyo nʼebise byasyo.

²⁸Nʼoyũkahĩsĩrĩrayabyo asyerya esyongimba siwe, nʼerikosa omubiri wuwe omo magetsi, nʼenyũma wʼaho asyingira omo kilaliriro.

²⁹Neryo kyasyabya mugambo busana nenyũ ebiro byosĩ; omo mukera wʼakalinda, oko kiro kyʼerĩkũmĩ kyʼomukera, mwasyayĩkehya omo mitima yenyũ, isimwasyakola omũsĩndokĩ wʼomũbĩrĩ, oyũbũtĩrwe eka, kutse oyũtasĩbwe oyukabungira omo katĩkatĩ kenyũ,

³⁰kusangwa oko kiro ekĩ mwasyalihirwa embanulo erĩberya; mwasyera kwʼebibi byenyũ byosĩ embere syʼOmwami Mukulu.

³¹Ni Sabato yʼeriluhuka lĩbũyĩrĩre busana nenyũ, imwatoka erĩyĩkehya omo mitima yenyũ; ni mugambo wʼebiro byosĩ.

³²Nʼomũhererĩ oyo wahakabĩbawa, nʼoyo wabirihigulwa eribya mũhererĩ omo mwanya wʼĩse wuwe, asyayira eririha embanulo eyo, kandi asyambala esyongimba esyʼekĩtanĩ, sye syongimba sĩbũyĩrĩre.

³³Kandi asyaliha embanulo busana nʼahʼerĩĩkala habũyĩrĩre; kandi asyaliha embanulo busana nʼeHema yʼerĩhĩndanamo na busana nʼekiherero; kandi asyaliha embanulo busana nʼabahererĩ nʼabandu bosĩ bʼendeko.

³⁴Nʼekĩ kyasyabya mugambo busana nenyũ ebiro byosĩ, eririha embanulo busana nʼabana ba Ĩsraelĩ ngendo nguma oko mwaka busana nʼebibi byabo byosĩ. Neryo omũhererĩ mwakola atya ngoko Mwami Mukulu ahana Musa.