Read nande Abalawĩ 18 Bible Online

Abalawĩ 18 - nande bible

Abalawĩ 18

¹Kandi Omwami Mukulu mwabũga na Musa ati,

²Ũbũge nʼabana ba Ĩsraelĩ, ubwirebo uti, Ĩngye indi Mwami Mukulu Nyamuhanga wenyũ.

³Simusyekola ngʼemikolere yʼekihugo kyʼeMĩsĩrĩ, eyo mwabya mwĩkere; kandi simusyekola ngʼemikolere yʼekihugo kyʼeKanana, eyo ngabatwala, kutse simusyerendera omo migambo yabo.

⁴Erihamula lyage lyo mwasyakola, nʼemigambo yage yo mwasyateya, erigendera mubyo; Ĩngye indi Mwami Mukulu Nyamuhanga wenyũ.

⁵Neryo mwasyabika emigambo yage, nʼerihamula lyage; omundu amakolabyo, asyabyaho busana nabyo; Ĩngye indi Mwami Mukulu.

⁶Sihabye ũmwʼĩnywe oyũkĩmaya owʼekĩtũnga kiwe, eriswikula endũmbũ yiwe; Ĩngye indi Mwami Mukulu.

⁷Endũmbũ ya tata wawe, eyo nĩ ndũmbũ ya koyo wawe, susyeswikulayo; iye ni koyo wawe; susyeswikula endũmbũ yiwe;

⁸Susyeswikula endũmbũ yʼomũkalĩ wa tata wawe nĩ ndũmbũ ya tata wawe.

⁹Susyeswikula endũmbũ eya mwali wenyũ, mwali wa tata wawe, kutse mwali wa koyo wawe; kutse oyũbũtĩrwe omo nyũmba, kutse oyũbũtĩrwe ehandi.

¹⁰Endũmbũ ya mwali wa mugala wawe, kutse eya mwali wa mwali wawe, ye ndũmbũ yabo, susyeswikulayo; kusangwa endũmbũ yabo nĩ ndũmbũ yawe wowene.

¹¹Endũmbũ ya mwali wʼomũkalĩ wa tata wawe, oyo wabutawa na tata wawe, iye ni mwali wenyũ, susyeswikula endũmbũ yiwe.

¹²Susyeswikula endũmbũ ya so-ngalĩ wawe; iye nĩ wʼekĩtũnga kya tata wawe.

¹³Susyeswikula endũmbũ ya mwali wabo koyo wawe; kusangwa iye nĩ wʼekĩtũnga kya koyo wawe.

¹⁴Susyeswikula endũmbũ ya so-mulere wawe, susyesegera hakũhĩ na mũkalĩwe; iye ni koyo wawe.

¹⁵Susyeswikula endũmbũ ya mwalĩana wawe; iye nĩ mũkalĩ wa mugala wawe; susyeswikula endũmbũ yiwe.

¹⁶Susyeswikula endũmbũ ya mulamu wawe; nĩ ndũmbũ yʼomugala wenyũ.

¹⁷Susyeswikula endũmbũ yʼomũkalĩ nʼeyʼomwali wuwe; Sũsyĩmaya mwali wʼomugala wuwe, eriswikula endũmbũ yiwe; ibo nĩ bʼekĩtũnga kyʼahakũhĩ kyʼabakalĩ; nĩ lolo itsibu.

¹⁸Sũhalĩkanaye omũkalĩ na mwalĩ wabo, bakasyakwa obũha nʼeriswikula endũmbũ yiwe, haguma nʼogundi omugulu akineho.

¹⁹Susyesegera hakũhĩ nʼomũkalĩ eriswikula endũmbũ yiwe omugulu akayisolola busana nʼomugesera wuwe.

²⁰Susyegotsera nʼomũkalĩ wa mũlĩkyenyũ omo buragane, ũkayĩtsandya naye.

²¹Susyeha abana bawe uku Molekĩ erĩlabyabo omo muliro; kutse Susyetsuma erĩna lya Nyamuhanga wawe. Ĩngye indi Mwami Mukulu.

²²Susyegotsera nʼabalume ngʼabakalĩ; ni nye.

²³Kandi susyegotsera nʼenyama nʼenguma erĩyĩtsandya muyo; kutse nʼomũkalĩ wahi siahangane embere syʼenyama erigotsera nayo; nĩ mũtũlũnganĩo.

²⁴Sĩmũyĩtsandaye omo myatsi eyĩ kutse nʼomuguma; kusangwa umwʼeyo ebihanda ebyo nahiga embere syenyũ byabĩrĩyĩtsandya muyo.

²⁵Nʼekihugo kyabiritsanda; kikaleka inasuyira ebibi byakyo kukyo, nʼekihugo kikasala esyondũlanĩ syakyo.

²⁶Nĩkwa Ĩnywe mwasyateya emigambo yage nʼerihamula lyage, isimwasyakola nʼekiguma ekyʼesyonye esĩ; kutse oyũbũtĩrwe eka, kutse owʼehandi oyukabungira omo katĩkatĩ kenyũ;

²⁷(kusangwa abandu bʼekihugo ababya embere syenyũ, babirikola esyonye syosĩ esĩ, nʼekihugo kyabiritsanda);

²⁸neryo ekihugo sikibasalire eyĩhya nibya, omugulu mũkatsandayakyo, ngoko kyasalira eyĩhya ekihanda ekyabya embere wenyũ.

²⁹Kusangwa omundu wahi oyukakola ekiguma kyʼesyonye esĩ, abandu abakakolasyo basyahigwa omo bandu babo.

³⁰Neryo mwasyateya erihana lyage, isimwasyakola nʼekiguma oko mitsye eyĩ yʼesyonye, esyakolawa embere syenyũ, mũkasyayĩtsandya musyo. Ĩngye indi Mwami Mukulu Nyamuhanga wenyũ.