Read nande Abalawĩ 2 Bible Online

Abalawĩ 2 - nande bible

Abalawĩ 2

¹Neryo omugulu omundu akaherera Omwami Mukulu obuhere bwʼerĩhĩtya lyʼeyĩsyano, obuhere buwe bwasyabya bwʼeyĩsano yʼenzelele; asyũtũlĩra kuyo kwʼamagũta, nʼerĩhĩra kuyo kwʼoũbanĩ.

²Neryo asyaletabo oko bahererĩ, abagala ba Harũnĩ; naye asyĩmya ekiganza kiwe kiguma okwʼĩsyano yʼenzelele nʼoko magũta wabo, haguma nʼoũbanĩ bosĩ bwabo. Nʼomuhererĩ asyokereryabo ngʼeryĩbũkya lyabo oko kiherero, obuhere obũkokĩbawa oko muliro, ekikumbo ekĩsĩhĩre busana nʼOmwami Mukulu,

³nʼebikasaka byʼobuhere bwʼeyĩsyano byasyabya bya Harũnĩ nʼabagala buwe; ni kindu kĩbũyĩrĩre kutsibu omo mahere wʼOmwami Mukulu, awakokĩbawa oko muliro.

⁴Omugulu ukahera obuhere bwʼeyĩsyano yʼengano, obuhere obũgũmbĩkĩre omo lĩko, bwasyabya bibambale byʼeyĩsyano yʼenzelele eyite mo kĩhamya eyĩtũlũngene nʼamagũta, kutse ehitole hike-hike ehĩhakabĩrye amagũta ehite mo kĩhamya.

⁵Nʼobuhere bwawe bwamabya ini buhere bwʼeyĩsyano eyĩkalangĩre oko luyo, bwasyabya bwʼeyĩsyano yʼenzelele eyite mo kihamya, eyĩtũlũngene nʼamagũta.

⁶Wasyagabahyo mo hike-hike, nʼerĩũtũlĩra kuhyo kwʼamagũta, ni buhere bwʼeyĩsyano.

⁷Kandi obuhere bwawe bwamabya ini buhere bwʼeyĩsyano obũkalangĩre oko luyo, bwasyayirwa omo yĩsyano yʼenzelele haguma nʼamagũta.

⁸Kandi wasyaletera Omwami Mukulu obuhere bwʼeyĩsyano obũkokotĩrye omo bindu ebyo; kandi bwasyaletwa oko mũhererĩ naye inialetabo oko kiherero.

⁹Nʼomũhererĩ asyĩmya oko buhere bwʼeyĩsyano yʼengano, nʼerĩokereryabo oko kiherero, abuhere obwabĩrĩokĩbura oko muliro, ekikumbo kĩsĩhĩre busana nʼOmwami Mukulu.

¹⁰Nʼobukasaka oko buhere bwʼeyĩsyano nʼengano, bwasyabya bwa Harũnĩ nʼabagala buwe; ni kindu kĩbũyĩrĩre kutsibu ekyʼomo mahere wʼOmwami Mukulu awakokĩbawa oko muliro.

¹¹Sihali buhere bwʼeyĩsyano obo mwasyaherera Omwami Mukulu obwasyakokotĩbwa omo kĩhamya kusangwa sĩmũsyokereraya ekĩhamya kyʼomo mũkĩ kutse obuki, eribya buhere obũkokĩbawa oko muliro busana nʼOmwami Mukulu.

¹²Busana nʼobuhere bʼobuyilula mwasyaletabo oko Mwami Mukulu; nĩkwa sibwendisyahetuka eribya kikumbo kĩsĩhĩre oko kiherero.

¹³Nʼobuli buhere bwenyũ bwʼeyĩsyano yʼengano mwasyahĩramo omũnyũ; kutse Susyereka omo buhere bwawe bwʼeyĩsyano mukabula omũnyũ wʼerilagana lya Nyamuhanga wawe; wasyahera omũnyũ haguma nʼamahere wenyũ gosĩ.

¹⁴Kandi wamaletera Omwami Mukulu yʼobuhere bwʼeyĩsyano yʼengano yʼobuyilula, wasyaleta obuhere bwʼeyĩsyano yʼengano yʼobuyilula bwawe bwʼerĩmbere wasyaleta engano eyiri Kwʼamakũndĩ eyĩrĩokĩbawa omo muliro, engano eyĩrĩatũndũlawa eyʼamakũndĩ mabisi.

¹⁵Wasyũtũlĩra kwʼamagũta, nʼerĩhĩra kwʼoũbanĩ; ni buhere bwʼeyĩsyano.

¹⁶Nʼomũhererĩ asyokererya erĩgabo lyabo lyʼeryĩbũkya lyʼomo mũkĩ, akatswe kʼengano yabo eyĩtũndwĩre, nʼakatswe kʼamagũta wabo, haguma nʼobukwa bwabo bosĩ nʼobuhere obokĩrye omo muliro busana nʼOmwami Mukulu.