Read nande Abalawĩ 20 Bible Online

Abalawĩ 20 - nande bible

Abalawĩ 20

¹Kandi Omwami Mukulu mwabũga na Musa ati,

²Kandi, wasyabwira abana ba Ĩsraelĩ uti, Omundu oyuli gʼoko bana ba Ĩsraelĩ, kutse oko bʼehandi abakabungira BwʼAbaĩsraelĩ, oyukaha omwana wuwe uku Molekĩ; kwenene asyĩtwa; abʼomo kihugo basyamwĩta omo mabwe.

³Nage nasyahĩnĩrya omundu oyo yʼobũsũ bwage, nage nasyamũlũsya omo bandu buwe; kusangwa abiriha abana buwe uku Molekĩ, erĩtsandya ahʼerĩĩkala hage, nʼerĩtsandya erĩna lyage lĩbũyĩrĩre.

⁴Nʼabandu bʼekihugo ekyo bamaleka omundu oyo, omugulu akaha omwana wuwe uku Molekĩ, bati, sĩbendĩmwĩta;

⁵neryo nasyahĩnĩrya obũsũ bwage oko mundu oyo, nʼoko kĩtũnga kiwe, nasyamũlũsya oko bandu buwe, haguma nʼabosĩ abakamukwama omo luteto olo, erikola oluteto haguma na Molekĩ.

⁶Nʼomundu oyukabindukira abʼesyombĩnga nʼabakũmũ, okwʼitetana nabo, nasyahĩnĩra omundu oyo, nʼerĩmũlũsya omo bandu buwe.

⁷Neryo muyihigule, mubye babũyĩrĩre; kusangwa Indi Mwami Mukulu Nyamuhanga wenyũ.

⁸Mwasyateya emigambo yage, nʼerikolayo. Ĩngye indi Mwami Mukulu oyukabahigula.

⁹Kusangwa obuli mundu oyukatsuma ĩse wuwe kutse koyo wuwe asyĩtwa kwenene; abiritsuma ĩse wuwe na nyĩnya wuwe; omusasi wʼolubanza luwe asyamubyako.

¹⁰Nʼomundu oyũkasĩngĩra omũkalĩ wʼogundi mundu, nʼoyũkasĩngĩra omũkalĩ wa mwĩra wuwe, omũtetĩ wʼobulume nʼomũtetĩ wʼobũkalĩ kwenene basyĩtwa.

¹¹Nʼomundu oyukagotsera nʼomũkalĩ wʼĩse wuwe abiriambula endũmbũ ya tata wuwe; ababiri bosĩ basyĩtwa kwenene; olubanza lwabo lwʼomusasi luli kubo.

¹²Nʼomundu amagotsera na mwalĩana wuwe kwenene ababiri bosĩ basyĩtwa; babirikola kitya-kitya; olubanza lwabo lwʼomusasi luli kubo.

¹³Omulume amasĩngĩra omulume ngoko bakasĩngĩra omũkalĩ, ababiri bosĩ babirikola esyonye. Basyĩtwa kwenene. Olubanza lwabo lwʼomusasi luli kubo.

¹⁴Omundu amahĩkya omũkalĩ na nyĩnyĩ-byala haguma, ni kibi; basyahĩsĩbwa omo muliro iye nabo; Sihabye kibi omo katĩkatĩ kenyũ.

¹⁵Nʼomundu amagotsera nʼenyama, kwenene asyĩtwa; mwasyĩta nʼenyama eyo nibya.

¹⁶Kandi omũkalĩ amasegera ahali enyama erigotsera nayo, wasyĩta omũkalĩ oyo, nʼenyama eyo; kwenene basyĩtwa; olubanza lwabo lwʼomusasi luli kubo.

¹⁷Kandi omundu amĩmya mwali wabo, mwali wʼĩse, kutse mwali wa nyĩnya wuwe, akalangira endũmbũ yiwe, nʼomwali wabo akalangira endũmbũ yiwe; ni kindu kyʼerihemula; basyahigwa erĩlũa oko meso wʼabana bʼabandu babo. Abiriambula endũmbũ ya mwali wabo; akaheka olubanza luwe.

¹⁸Kandi omundu amagotsera nʼomũkalĩ oyuli oko mugesera, nʼeriswikula endũmbũ yiwe; abiriswikula enzaro yiwe, nʼomũkalĩ naye abiriswikula enzaro yʼomusasi wuwe; ababiri bosĩ basyahigwa omo katĩkatĩ kʼabandu.

¹⁹Nawe susyeswikula endũmbũ ya mwali wabo koyo wawe, kutse so-ngalĩ wawe; kusangwa abirimuyira mo ndũmbũ, omundu wʼekĩtũnga kiwe kyʼahakũhĩ; nabo basyabya oko lubanza lwabo.

²⁰Kandi omundu amagotsera nʼomũkalĩ wa nyĩnya-lume, akaswikula endũmbũ ya nyĩnya-lume; basyabya oko lubanza lwabo; basyahola bute mwana.

²¹Nʼomundu amĩmya omũkalĩ wa mugala wabo, ebyo ni nye; abiriswikula endũmbũ yʼomugala wabo; basyabya bute mwana.

²²Neryo mwasyateya emigambo yage yosĩ, nʼebilayiro byage byosĩ, nʼerikolabyo; ekihugo ekyʼaho ngabatwala erĩĩkalamo, sikibasale.

²³Kandi simulendere omo mitsye yʼekĩhanda ekyo ngabinga embere syenyũ; kusangwa mobakola emyatsi yosĩ eyĩ, kyaleka ĩnakwa bo nye.

²⁴Nĩkwa nabiribabwira nyiti, Mwasyalya omwandu wʼekihugo kyabo, nage nasyabahakyo eribya kyenyũ, ekihugo ekikasenda mwʼamasabũ nʼobuki. Ĩngye indi Mwami Mukulu Nyamuhanga wenyũ oyo wabasolola oko bihanda.

²⁵Neryo mwasyasolola omo katĩkatĩ kʼesyonyama syowene nʼesĩtowene nʼomo katĩkatĩ kʼesyonyonyũ esĩtowene nʼesyowene; ĩsĩmwatsandaya emitima yenyũ busana nʼenyama, kutse busana nʼenyonyũ, kutse busana nʼekĩndũkĩ ekikakululuka oko kitaka, ebyo nabirigabula kwĩnywe ngʼemĩtsandĩrya.

²⁶Nenyũ mwasyabya babũyĩrĩre busana nage; kusangwa ĩngye Mwami Mukulu indi mũbũyĩrĩre, nabiribasolola oko bihanda, imwabya bage.

²⁷Nĩkwa omulume kutse omũkalĩ, hamabya oyuli kwʼembĩnga, kutse omũkũmũ omo katĩkatĩ kabo, kwenene basyĩtwa; basyaguswa kwʼamabwe; omusasi wʼolubanza lwabo asyabya kubo.